بيىل استىقتى ايماق ەل كولەمىندە ۇن وندىرۋدەن ءبىرىنشى ورىنعا شىعىپ, يوگۋرت, جارما جانە ماكارون ونىمدەرىن شىعارۋدان ءۇشىنشى ورىنعا تابان تىرەپ وتىر. جيىندا بيىلعى اۋا رايىنىڭ ەگىنگە قولايسىز بولعانىنا قاراماستان, كۇزگى جيىن تەرىندە بىتىك شىققان ەگىندى شىعىنسىز جيناپ, قامباعا 4,2 ملن توننا استىق قۇيعان ديقانداردىڭ ەرەن ەڭبەگى دارىپتەلدى. وراق ناۋقانى ناتيجەسى بويىنشا جوعارعى كورسەتكىشكە قول جەتكىزگەن ءداندى اۋدانداردىڭ جەتىستىگى جونىندە دە اڭگىمە قوزعالدى. ماسەلەن, بيىل سارىكول اۋدانىنا قاراستى شارۋاشىلىقتار ءار گەكتار القاپتان – 14,5 تسەنتنەر, ال فەدوروۆ اۋدانىنىڭ ديقاندارى – 13,4, ۇزىنكول, قاراسۋ, قوستاناي, مەڭدىقارا اۋداندارى 12 تسەنتنەردەن بيداي الىپ, تابىستى ەڭبەكتىڭ وزىق ۇلگىسىن كورسەتىپ وتىر.
كوك شىقپاي جاتىپ جەر قىرتىسىنا سوقا ءتۇسىرىپ, توسكەيگە سەبىلگەن ءاربىر ءداندى الا جازداي ماڭداي تەرىمەن سۋارعان كانىگى ديقان ءۇشىن بيىل بەس ايلىق بەينەتتىڭ ءباسى جوعارى. جيىن بارىسىندا تاجىريبە مەن وزىق تەحنولوگيانى ءساتتى ۇشتاستىرىپ, مول ءونىم الىپ, كوپتەن وزىق شىققان بىرقاتار شارۋاشىلىقتاردىڭ جوعارى جەتىستىگى جونىندە وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ تە سۇيسىنە ءسوز ەتتى.
– اگروتەحنولوگيا جەتىستىكتەرىن جەتىك يگەرگەن اۋىلشارۋاشىلىق كاسىپورىندارى مەن شارۋا قوجالىقتارى اۋا رايىنا تاۋەلدىلىكتەن ارىلىپ, سوڭعى ەكى جىل بويى جازدىڭ اپتاپ ىستىعى پەن قۋاڭشىلىعىنا قاراماستان تۇراقتى تۇردە جوعارى ءونىم الىپ كەلەدى. مىسالى, سارىكول اۋدانىنداعى «سارىكول اگرو» جاۋاپكەرشىلىگى شەكتەۋلى سەرىكتەستىگى بيىلعى ەگىن ورۋ ناۋقانىندا ءاربىر گەكتاردان 40 تسەنتنەردەن, التىنسارين اۋدانىنداعى «ايدالا» سەرىكتەستىگى – 21, مەڭدىقارا اۋدانىنداعى «ورلان 2004» سەرىكتەستىگى – 20, وسى اۋدانعا قاراستى «ولجا ارىستان» جشس-ءى 17,6 تسەنتنەردەن بيداي الىپ وتىر, – دەدى وبلىس اكىمىنىڭ ءبىرىنشى ورىنباسارى.
ايماقتىڭ ەگىن شارۋاشىلىعىنا قاتىستى اۋىز تولتىرىپ ايتۋعا تۇرارلىق تاعى ءبىر جاقسى جاڭالىق – بيىلعى بيدايدىڭ ساپاسى جوعارى. اسىرەسە سولتۇستىك اۋدانداردا بيداي قامىرلىلىعى وتكەن جىلداردىڭ كورسەتكىشىنەن اسىپ ءتۇستى. بيىل ەلەۆاتورلارعا قابىلدانعان بيدايدىڭ 79%-ى 3-كلاسقا جاتادى. بۇل بيدايدىڭ 60%-عا جۋىعىنىڭ قامىرلىلىعى 28% جانە ودان جوعارى.
ونلاين-جيىندى تۇيىندەگەن ايماق باسشىسى ارحيمەد مۇحامبەتوۆ بيىلعى كاراتيندىك شەكتەۋلەر كوكتەمگى ءدان ەگۋ ناۋقانىنا دا, كۇزگى جيىن-تەرىن بارىسىنا دا ايتارلىقتاي كەدەرگى كەلتىرگەنىن تىلگە تيەك ەتتى.
– ايماقتا جاپپاي شەكتەۋ شارالارى قابىلدانعانىنا قاراماستان, جەرگىلىكتى اتقارۋشى ورگاندار اۋىل شارۋاشىلىعى سالاسىنا بارىنشا قولداۋ كورسەتتى. مۇنىڭ سىرتىندا بيىل اۋا رايى قولايسىز بولعانىن وزدەرىڭىز جاقسى بىلەسىزدەر. بىراق شارۋاشىلىقتار جوعارى ءونىم الدى. ءبىز ەگىن شارۋاشىلىعى ماقساتىنداعى القاپتاردى ءارتاراپتاندىرۋ بويىنشا باستالعان جۇمىستى الداعى جىلى دا جالعاستىرامىز. جىلدان-جىلعا مايلى داقىلداردىڭ ۇلەسىن ەسەلەي ءتۇسۋىمىز كەرەك. بۇعان قولداۋ كورسەتەتىن جاڭا باعدارلامالار بار. وسى ماسەلەگە كوبىرەك نازار اۋدارۋ قاجەت, – دەدى ا.مۇحامبەتوۆ.
جيىن سوڭىنا قاراي اۋىلشارۋاشىلىق ەڭبەككەرلەرى كۇنىنە وراي, وبلىس اكىمى ەسەلى ەڭبەگىمەن دارالانعان اگرونومدارعا, ينجەنەرلەرگە, شارۋا قوجالىقتارىنىڭ باسشىلارىنا گراموتالار تاپسىردى. بىرقاتار ديقاننىڭ ومىراۋىنا توسبەلگىلەر تاعىلدى. ديقان ەڭبەگى دارىپتەلگەن وسى تاقىلەتتەس سالتاناتتى جيىندار وبلىستىڭ بارلىق اۋداندارىندا ءوتتى.
قوستاناي وبلىسى
