تالدىقورعان گارنيزونىنداعى اسكەري اەرودرومنىڭ ۇشۋ-قونۋ جولاعىن قايتا قۇرىلىمداۋ جۇمىستارى جالعاسۋدا. قۇرىلىس جۇمىستارىنىڭ بارىسىمەن قورعانىس ءمينيسترىنىڭ ورىنباسارى گەنەرال-مايور باعدات مايكەەۆ تانىسىپ قايتتى.
تالدىقورعان گارنيزونىنداعى اسكەري اەرودرومنىڭ ۇشۋ-قونۋ جولاعىن قايتا قۇرىلىمداۋ جۇمىستارى جالعاسۋدا. قۇرىلىس جۇمىستارىنىڭ بارىسىمەن قورعانىس ءمينيسترىنىڭ ورىنباسارى گەنەرال-مايور باعدات مايكەەۆ تانىسىپ قايتتى.
وتكەن عاسىردىڭ 70-جىلدارىنىڭ باسىندا پايدالانۋعا بەرىلگەن اۆيابازانى تولىق قايتا قۇرىلىمداۋ تۇڭعىش رەت جۇرگىزىلىپ وتىر. جاڭا ۇشۋ-قونۋ جولاعىنا ارنايى تەمىر-بەتوندى تاقتالار توسەلمەك. ولار ارتىق سالماققا ءتوزىمدى ءارى قاۋىپسىز. سونداي-اق, ونى پايدالانۋ مەرزىمى دە ۇزاراتىن بولادى. جوندەۋ جۇمىستارى بارىسىندا جولاقتىڭ ەنى مەن ۇزىندىعى دا ۇلعايادى.
– قورعانىس ءمينيسترى اۆيابازالاردىڭ جاعدايىنا بارىنشا كوڭىل اۋدارۋدا جانە بارلىق اسكەري اەرودرومدارعا جاڭعىرتۋ جۇرگىزۋ تۋرالى تاپسىرما بەردى. قوسىمشا جوندەۋ مەن ەكسپلۋاتاتسيانى قاجەت ەتەتىن اسكەري اەرودرومداردىڭ بارلىق ۇشۋ-قونۋ جولاقتارى اۆياتسيانىڭ زاماناۋي تالاپتارىنا ساي قايتا وڭدەۋدەن ءوتۋى كەرەك. سەبەبى, بۇل اسكەري اەرودرومداردىڭ ۇشۋ-قونۋ جولاعىنا جويعىش ۇشاقتار, شابۋىلداۋشى ۇشاقتار, بومبالاۋشى جانە كوپتوننالى كولىكتىك ۇشاقتار قونادى, – دەپ اتاپ ءوتتى گەنەرال-مايور باعدات مايكەەۆ. ول, سونىمەن قاتار, جاۋىنگەرلىك ۇشاقتار مەن تىكۇشاقتاردىڭ ۇدايى ازىرلىگىن قامتاماسىز ەتەتىن اەرودروم جولدارىنىڭ ساپالى قۇرىلىسىنىڭ ستراتەگيالىق ماڭىزى بار ەكەنىن دە ايتتى.
قورعانىس ءمينيسترىنىڭ ورىنباسارى اسكەرلەردى پاتەرلەرگە ورنالاستىرۋ باس باسقارماسىنىڭ باسشىسى پولكوۆنيك يلدار گينياتۋلينگە قۇرىلىس جۇمىستارىن اعىمداعى جىلدىڭ اياعىنا دەيىن اياقتاۋدى تاپسىردى. جۇرگىزىلگەن جۇمىستاردىڭ ساپاسىنا كوڭىلى تولاتىنىن جەتكىزدى.
بۇعان دەيىن حابارلاعانىمىزداي, «تالدىقورعان» اەرودرومى قايتا جوندەۋدەن ءوتكەن سوڭ قازاقستان اسكەري-اۋە كۇشتەرى ءاسكەر تەگىنىڭ جاۋىنگەرلىك قابىلەتى مەن مەملەكەتتىك اۆياتسيانىڭ ۇشۋ قاۋىپسىزدىگىن ارتتىراتىن جاڭا قۇرالدارمەن جاراقتانعان زاماناۋي اەرودرومعا يەلىك ەتەتىن بولادى. اەرودرومدار جەلىسىن جوندەۋگە مەملەكەتتەن بولىنگەن قاراجات ۇشۋ قاۋىپسىزدىگى ماسەلەلەرىندەگى ماڭىزدى باعىت بولىپ تابىلادى.
«ەگەمەن-اقپارات».
