جەرگىلىكتى تەلەارنانىڭ تىكەلەي ەفيرى ارقىلى وبلىس تۇرعىندارىمەن بايلانىسقا شىعىپ, كوك جاجىككە كوز تىككەن كوپشىلىككە گاز قۇبىرى تارتىلاتىن اۋىلدار قاتارى جىل ساناپ ەسەلەنە بەرەتىنىن جەتكىزگەن «Nur Otan» پارتياسى قوستاناي وبلىستىق فيليالى توراعاسىنىڭ ءبىرىنشى ورىنباسارى ەلدار كۇزەنباەۆ ايماقتىڭ الەۋمەتتىك ينفراقۇرىلىمىن دامىتۋ ماقساتىندا جۇزەگە اسىرىلىپ جاتقان باسقا دا يگى شارالار جونىندە ايتتى.
اسىرەسە, وبلىس حالقىنىڭ ءومىر ساپاسىن جان-جاقتى جاقسارتۋ, تۇرعىنداردى تازا اۋىز سۋ, باسپانا جانە ساپالى جولمەن قامتاماسىز ەتۋ, الەۋمەتتىك ينفراقۇرىلىمدى جاڭارتۋ ماسەلەلەرى وزەكتى بولىپ قالا بەرەدى.
"جاھاندىق كوروناۆيرۋستىق پاندەميا وبلىسىمىزدىڭ ەكونوميكالىق جاعدايىنا كەرى اسەر ەتىپ جاتقانى جاسىرىن ەمەس. الايدا مەملەكەت تاراپىنان ازاماتتاردى قولداۋعا ارنالعان داعدارىسقا قارسى شارالار ازىرلەنىپ, كۇن سايىن جول-كولىك ينفراقۇرىلىمىن, تۇرعىن ءۇي-كوممۋنالدىق شارۋاشىلىعىن جاڭعىرتۋعا, سونداي-اق سالاۋاتتى ەكولوگيالىق جاعدايدى ساقتاۋعا باعىتتالعان مەملەكەتتىك باعدارلامالار ءساتتى جۇزەگە اسىرىلىپ جاتىر", - دەدى ەلدار كۇزەنباەۆ.
وبلىستىق فيليال توراعاسى ورىنباسارىنىڭ ايتۋىنشا, بۇگىندە كولىك ينفراقۇرىلىمىن ودان ءارى دامىتۋ ماقساتىندا اۆتوموبيل جولدارىنىڭ ساپاسىن ارتتىرۋ جانە 2025 جىلعا قاراي ساپالى جولداردىڭ ۇلەسىن 95 پايىزعا جەتكىزۋ كوزدەلىپ وتىر. ونىمەن قوسا, 300-دەن ارتىق ادام تۇراتىن اۋىلداردا ورتالىقتاندىرىلعان سۋ قۇبىرى تارتىلادى. 200-دەن 300-گە دەيىن, نەمەسە ودان دا كوپ تۇرعىنى بار ەلدى مەكەندەرگە كەلىسىمىمەن سۋ تازارتۋ جانە سۋ تاراتۋ پۋنكتتەرى سالىنادى. سونداي-اق, حالىق سانى 200 ادامعا دەيىنگى سۋى ساپالى قۇدىعى جوق شاعىن اۋىلدارعا ورتالىقتاندىرىلعان سۋ قۇبىرى تارتىلعانشا اۋىز سۋ سىرتتان تاسىمالدانادى.
بۇگىندە جەرگىلىكتى اتقارۋشى بيلىكتىڭ كۇشىمەن وبلىستىڭ 11 ەلدى مەكەنىندە سۋمەن جابدىقتاۋ جەلىلەرىن قايتا قۇرۋ, 93 اۋىلدا سۋمەن جابدىقتاۋ نىساندارىن سالۋ جوسپارلانۋدا. ناتيجەسىندە, اۋىلدا تۇراتىن 98,3 مىڭ تۇرعىننىڭ ساپالى اۋىز سۋعا قول جەتكىزۋىنە مۇمكىندىك تۋادى.
تىكەلەي ەفيردە فيليال توراعاسىنىڭ ورىنباسارى مەملەكەتتىك تۇرعىن ءۇي باعدارلامالارىن ىسكە اسىرۋ بارىسىنا دا توقتالىپ ءوتتى. ايتۋىنشا, بىلتىر «نۇرلى جەر», «7-20-25» باعدارلامالارى شەڭبەرىندە 1580 وتباسى باسپانالى بولعان.
- ازاماتتاردىڭ الەۋمەتتىك ءال-اۋقاتى - ايماقتىڭ تۇراقتى الەۋمەتتىك-ەكونوميكالىق دامۋىنىڭ كورسەتكىشى بولىپ تابىلادى. ءبىز ءبىلىم بەرۋ, دەنساۋلىق ساقتاۋ, سپورت جانە الەۋمەتتىك قىزمەتتەر سالاسىنداعى ساپالى قىزمەتتەرگە قول جەتىمدىلىكتى قامتاماسىز ەتۋ ارقىلى ايماق تۇرعىندارىنىڭ تۇرمىستىق جاعدايىن جاقسارتامىز. جەرگىلىكتى بيلىك قوستاناي وبلىسى تۇرعىندارىنىڭ تالاپ-تىلەكتەرىن قاناعاتتاندىرۋ ماقساتىندا, قولدان كەلگەنىنشە, مۇمكىن شارالاردىڭ بارلىعىن ءتيىمدى جۇزەگە اسىرىپ كەلەدى» - دەدى ەلدار كۇزەنباەۆ
«Nur Otan» پارتياسىنىڭ ايماقتىق فيليالى جەرگىلىكتى تەلەارنا مەن الەۋمەتتىك جەلىدەگى تىكەلەي ەفيرلەر ارقىلى وبلىس تۇرعىندارىمەن تۇراقتى تىلدەسىپ, پىكىر الماسىپ, وي ءبولىسىپ وتىراتىنىن ايتا كەتكەن ءجون. مۇنداي شارالاردا تۇرعىندار وزدەرىن تولعاندىرعان ماسەلەلەر بويىنشا ساۋال قويىپ, بىردەن جاۋاپ الۋعا مۇمكىندىك الادى. بۇل جولعى تىكەلەي ەفير پارتيانىڭ الەۋمەتتىك جەلىلەردەگى رەسمي پاراقشالارىندا الدىن الا حابارلاندىرىلدى.
قوستاناي وبلىسى
