قاشىقتان وقىتۋ كەزىندە ءبىلىم ساپاسىن قامتاماسىز ەتۋ ماقساتىندا وبلىستىڭ ءبىلىم باسقارماسى جەرگىلىكتى بيۋدجەتتەن جانە ۇكىمەت رەزەرۆىنەن بولىنگەن 3,8 ملرد تەڭگەگە 21 مىڭ كومپيۋتەر ساتىپ الىپ, تەحنيكالىق قۇرالعا ءزارۋ بولىپ وتىرعان وقۋشىلاردىڭ قولىنا ۋاقىتشا ۇستاتتى. باسقارما باسشىسى زاۋرە بايمەنوۆانىڭ ايتۋىنشا, بيىلعى وقۋ ۇدەرىسى بارىسىندا وقۋشىلار جالپى سانى 50 مىڭنان اسا كومپيۋتەر پايدالانىپ وتىر. مۇنىڭ سىرتىندا تاياۋدا عانا وبلىس اكىمدىگىنىڭ اقپاراتتاندىرۋ جانە ءبىلىم ساپاسىن باعالاۋ ورتالىعىنىڭ ماماندارى 870 نوۋتبۋك قابىلداپ الىپ, تەكسەرىستەن وتكىزدى. بۇل تەحنيكالىق قۇرالدار وسى اپتا ىشىندە الدىن الا جاسالعان مۇقتاج بالالاردىڭ تىزىمىنە ەنگەن وقۋشىلاردىڭ قولىنا تابىستالادى.
ءبىرىنشى توقساندا كەزەكشى توپتارداعى نەگىزگى پاندەردى ءبىر مۇعالىم جۇرگىزىپ وتىردى, ال قازاق ءتىلى, ورىس ءتىلى, ادەبيەت, اعىلشىن ءتىلى, دەنە شىنىقتىرۋ, كوركەم ەڭبەك, مۋزىكا ساباقتارى قاشىقتان ۇيىمداستىرىلدى. جالپى, كەزەكشى سىنىپتارداعى وقۋشىلار ەكى توپقا ءبولىنىپ وقىدى. بۇل جاعدايدا مۇعالىمدەر جۇكتەمەسى دە ەكى ەسە ارتاتىنى بەلگىلى. باسقارما مالىمەتىنشە, قوسىمشا جۇمىس ىستەگەن ءار مۇعالىمگە ناقتى نەشە ساعات جۇكتەمە ورىنداعانىنا بايلانىستى جەرگىلىكتى جانە رەسپۋبليكالىق بيۋدجەتتەن بولىنگەن قارجى ەسەبىنەن قوسىمشا ەڭبەكاقى تولەنگەن.
ايماقتا شتاتتىق رەجىمدە جۇمىس ىستەپ جاتقان مەكتەپتەردەگى سانيتارلىق تالاپتاردىڭ ساقتالۋى – قاتاڭ قاداعالاۋدا. سانيتارلىق تازالىقتى قامتاماسىز ەتۋ ءۇشىن وبلىستىق بيۋدجەتتەن ءبىلىم بەرۋ مەكەمەلەرىنە جەكە قورعانىس قۇرالدارى مەن دەزينفەكتسيالاۋ قۇرالدارىن ساتىپ الۋ ءۇشىن 30,5 ملن تەڭگە بولىنگەن.
– بالالاردىڭ ءومىرى مەن دەنساۋلىعىن ساقتاۋ ماقساتىندا مەكتەپتەردە سانيتارلىق قاۋىپسىزدىك شارالارى جۇرگىزىلدى. مەكتەپكە كىرىپ-شىعۋ, سىنىپ پارتالارىندا وتىرىپ ءبىلىم الۋ تالاپتارى كۇشەيتىلىپ, ونى بۇلجىماي ورىنداۋ بارىسى كۇندەلىكتى قاداعالاۋعا الىندى. ءبىرىنشى توقساندا كۇن سايىن ءار مەكتەپتىڭ كىرەبەرىسىندە مەديتسينا قىزمەتكەرلەرى كەزەكشىلىك ەتتى. ولار قىزمەتكەرلەر مەن وقۋشىلاردى تەرمومەترمەن تەكسەرىپ, قولدارىن, اياق كيىمدەرىنىڭ تابانىن دەزينفەكتسيالاپ, فيلتردەن وتكىزىپ بارىپ قانا مەكتەپكە كىرگىزىپ وتىردى. وبلىستا قوسىمشا دەزينفەكتسيالاۋ قۇرالدارىن, ياعني سانيتايزەرلەر, اياقكيىمگە ارنالعان دەزينفەكتسيالاۋ كىلەمشەلەرى, تەرمومەترلەر, اۋا رەتسيركۋلياتورلارى, كۆارتس شامدارى, انتيسەپتيكتەر مەن دەوحلور ساتىپ الۋ ءۇشىن تاعى 206,5 ملن تەڭگە قاراجات ءبولىنىپ وتىر, – دەدى ءبىلىم باسقارماسىنىڭ باسشىسى.
وقۋ جىلى باستالعالى, اسىرەسە, اقپاراتتىق پلاتفورمالاردىڭ قىزمەتى كۇشەيىپ, ونى پايدالانۋشىلاردىڭ سانى ەسەلەپ ارتقان. ماسەلەن, بۇگىنگە دەيىن «Onlinemektep», «ەdupage», «Zoom» سياقتى ءبىلىم بەرۋ پلاتفورمالارىنا 361 مىڭنان اسا مۇعالىم, 2,5 ملن-نىڭ ۇستىندە وقۋشى كىرىپ, پايدالانۋشىلاردىڭ جالپى سانى 2,9 ملن-عا دەيىن جەتكەن.
– 30 مىڭنان اسا ساباق وسى ءبىلىم بەرۋ پلاتفورمالارى ارقىلى ۇيىمداستىرىلىپ, 12 مىڭنان اسا ساباق سينحروندى, 18 مىڭعا جۋىق ساباق اسينحروندى تۇردە ءوتتى. ءبىلىم بەرۋ پلاتفورمالارىنىڭ ءبىر ەرەكشەلىگى, مۇندا مۇعالىمدەرگە ساباقتى ۆيدەوكونفەرەنتسيا تۇرىندە ونلاين رەجىمدە وتكىزۋگە, ونلاين-چات ارقىلى سىنىپپەن بىرگە ءبىر ۋاقىت ىشىندە جۇمىس ىستەۋگە, ءۇي تاپسىرمالارىن ونلاين تۇرىندە تەكسەرۋگە مۇمكىندىك قاراستىرىلعان. ال اسينحروندى رەجىمدە مۇعالىمدەر ءوز ساباقتارىن بەرەدى. ونى شاكىرتتەر قالاعان ۋاقىتتا قاراپ, مەڭگەرە الادى. سونداي-اق ۇستازدار بالالاردىڭ وقۋ الگوريتمىن سيپاتتايتىن مارشرۋت پاراقشالارىن جاسايدى. اتالعان پلاتفورمالاردا وقۋشىلاردىڭ ءبىلىمىن باعالاۋ, سىنىپتىڭ ساباق ۇلگەرىمىنە مونيتوريگ جاساۋ, وتىلگەن تاراۋدان العان ءبىلىم مەن توقساندىق ءبىلىمدى قورىتىندىلاۋ مۇمكىندىگى قاراستىرىلعان. سونىمەن قاتار وقۋشى اتالمىش پلاتفورمالار ارقىلى ونلاين-جاتتىعۋلاردىڭ ورىندالۋ جولدارىمەن تانىسىپ, كۇندەلىكتى ساباق بارىسىندا ۇيدە ورىنداعان تاپسىرماسى ءۇشىن قانداي باعا العانىن قاداعالاي الادى. ارينە, باستاۋىش سىنىپ وقۋشىلارى قاشىقتان وقۋ بارىسىندا اتا-انالارىنىڭ كومەگىن قاجەت ەتەدى, – دەدى ز.انۋاربەكقىزى.
ءبىرىنشى توقساندا وبلىس مەكتەپتەرىندەگى وقۋ ۇدەرىسى ۇيىمداسقان تۇردە, جوسپارلى رەجىمدە جۇزەگە اسىرىلعان. الايدا كوپشىلىك اتا-انالاردى وقۋ جىلىنىڭ ەكىنشى توقسانىندا وقىتۋ قالاي ۇيىمداستىرىلادى دەگەن وي تولعاندىرادى. باسقارما باسشىسى بۇل ساۋالعا «بارلىعى ايماقتاعى سانيتارلىق-ەپيدەميولوگيالىق جاعدايعا بايلانىستى. وڭىردە احۋال ۋشىعىپ بارا جاتسا, ءبىلىم بەرۋ مەكەمەلەرى قاشىقتان وقىتۋ فورماتىنا كوشۋى مۇمكىن. وقۋ تۇرىنە قاتىستى ماسەلە – دەنساۋلىق ساقتاۋ مينيسترلىگىنىڭ قۇزىرەتىندە», دەپ جاۋاپ بەردى.
قوستاناي وبلىسى
