كەشە «نۇر وتان» پارتياسى جانىنداعى سىبايلاس جەمقورلىققا قارسى كۇرەس جونىندەگى رەسپۋبليكالىق قوعامدىق كەڭەستىڭ وتىرىسى بولىپ, وندا پارتيانىڭ «قازاقستان-2050» ستراتەگياسىن جۇزەگە اسىرۋعا باعىتتالعان دوكتريناسىنداعى مىندەتتەرگە سايكەس اتالعان ىندەتكە قارسى كەشەندى شارالار بەلگىلەۋ ماسەلەلەرى تالقىلاندى.
كەشە «نۇر وتان» پارتياسى جانىنداعى سىبايلاس جەمقورلىققا قارسى كۇرەس جونىندەگى رەسپۋبليكالىق قوعامدىق كەڭەستىڭ وتىرىسى بولىپ, وندا پارتيانىڭ «قازاقستان-2050» ستراتەگياسىن جۇزەگە اسىرۋعا باعىتتالعان دوكتريناسىنداعى مىندەتتەرگە سايكەس اتالعان ىندەتكە قارسى كەشەندى شارالار بەلگىلەۋ ماسەلەلەرى تالقىلاندى.
وتىرىستى «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك اشىپ, جۇرگىزىپ وتىردى. ول ءوزىنىڭ سوزىندە ەلباسى نۇرسۇلتان نازارباەۆتىڭ وسى باعىتتاعى تاپسىرمالارىن ەسكە الىپ جانە پارتيانىڭ دوكتريناسىندا ايتىلعان: «سىبايلاس جەمقورلىقپەن كۇرەسۋ بارشانىڭ جانە ءار ادامنىڭ مىندەتى. سىبايلاس جەمقورلىق ءبىزدىڭ مەملەكەتتىلىگىمىز بەن دەموكراتيامىزدى جەگىدەي جەۋدە. سوندىقتان ءبىز سىبايلاس جەمقورلىقتىڭ جولىن كەسۋدىڭ جانە قوعامدا ونىڭ كەز كەلگەن كورىنىسىنە ىمىراسىزدىق احۋالىن قالىپتاستىرۋدىڭ جۇيەلى جاعدايىن جاسايمىز», دەگەن سوزدەرىن جينالعاندارعا ايتىپ بەرىپ, رەسپۋبليكالىق كەڭەس ەلىمىزدەگى جەمقورلىققا قارسى جۇمىس جۇرگىزەتىن بازالىق قوعامعا اينالىپ, وسى ىستەگى پارتيانىڭ تۇتاس قىزمەتىن ۇيلەستىرۋى ءتيىس ەكەندىگىن جەتكىزدى. مەملەكەت باسشىسى جەمقور بولعانى ءۇشىن لاۋازىمىنا, اتقارعان قىزمەتىنە قاراماستان, كەز كەلگەن شەنەۋنىكتىڭ جازا تارتۋى قاجەتتىگىن تالاپ ەتىپ وتىر. پارتيا دوكتريناسىندا زاڭ الدىندا بارلىق ازاماتتىڭ تەڭ ەكەندىگى اتاپ كورسەتىلگەن. كونستيتۋتسيا مەن زاڭنامالاردى بۇلجىتپاي ساقتاۋ – ادىلەتتى قوعامنىڭ بارشاعا تەڭ مۇمكىندىك جاساۋىنىڭ نەگىزى. قوعامدىق كەڭەستىڭ باسشىلىققا الىپ جۇمىس ىستەيتىنى وسى باعدارلار, دەدى ب.بايبەك.
وتىرىستا سىبايلاس جەمقورلىققا قارسى كۇرەس جونىندەگى رەسپۋبليكالىق قوعامدىق كەڭەستىڭ قۇرىلعانىنا بەس جىل تولعانى جانە وسى جىلدار ارالىعىندا ونىڭ توراعاسى بولىپ ورالباي ابدىكارىموۆتىڭ جەمىستى جۇمىس اتقارعانى اتالىپ ءوتتى. پارتيانىڭ سوڭعى بيۋرو وتىرىسىندا پارتيا توراعاسى دا قوعامدىق كەڭەستىڭ جۇمىسىنا جوعارى باعا بەردى. مىنە, وسى تابىسقا جەتۋدە ورالباي ابدىكارىم ۇلىنىڭ جەكە باسىنىڭ ەڭبەگى زور. ءسىزدىڭ تىكەلەي باسشىلىعىڭىزبەن ءبىزدىڭ پارتيانىڭ پارلامەنتتەگى فراكتسياسى «سىبايلاس جەمقورلىققا قارسى كۇرەس تۋرالى» زاڭ جوباسىن ازىرلەدى. ال قوعامدىق كەڭەستىڭ ءوزى سىبايلاس جەمقورلىققا قارسى ىمىراسىز جۇمىس جۇرگىزگەنى ءۇشىن حالىقتىڭ ريزاشىلىعىنا بولەندى, دەدى ب.بايبەك.
ودان ءارى بيۋرونىڭ سوڭعى وتىرىسىندا ورالباي ابدىكارىم ۇلى توراعالىق مىندەتتى باسقا ادامعا جۇكتەۋ تۋرالى ءوتىنىش جاساعانى ايتىلدى. بۇل ءوتىنىش قابىلدانىپ, پارتيا توراعاسى ن.نازارباەۆ كوميسسيا توراعاسى قىزمەتىنە و.ابدىكارىموۆتىڭ ۇسىنىسىمەن ءماجىلىس دەپۋتاتى قايىربەك سۇلەيمەنوۆتى بەكىتتى, دەي كەلىپ, ب.بايبەك: «ال ورالباي ابدىكارىموۆتىڭ ءوزى كەڭەس توراعاسىنىڭ ءبىرىنشى ورىنباسارى بولىپ قالا بەرەتىنىن جەتكىزدى», دەدى. سونىمەن بىرگە, ب.بايبەك جەمىستى جۇمىستارى ءۇشىن پارتيانىڭ اتىنان و.ابدىكارىموۆكە ءوز ريزاشىلىعىن ايتىپ, العىس حات پەن ەستەلىك كادەسىي تاپسىردى. ءوزى تاراپىنان و.ابدىكارىموۆ ەڭبەگىن باعالاعانى ءۇشىن نۇروتاندىقتارعا ريزاشىلىعىن ءبىلدىردى. سونىمەن بىرگە, ارىپتەستەرى اراسىنان ا.پلاتونوۆ, ق.ايتاحانوۆ, ا.سولوۆەۆا, و.وكسىكباەۆ سويلەپ, و.ابدىكارىموۆتىڭ جۇمىسىنا جوعارى باعا بەردى.
ءوزىنىڭ قورىتىندى سوزىندە پارتيا توراعاسىنىڭ ءبىرىنشى ورىنباسارى «كەڭەس جەمقورلىق ماسەلەسىمەن كۇرەسۋدىڭ جاڭا جولدارىن قاراستىرۋى قاجەت. جۇمىس ىستەۋدىڭ يننوۆاتسيالىق ۇلگىلەرىن كەڭىنەن قولدانىپ, نەگىزگى كۇشتى جەمقورلىقپەن جۇيەلى كۇرەسكە باعىتتاعانى ءجون», دەپ اتاپ كورسەتتى. سونىمەن بىرگە, وتىرىستا «قازاقستان-2050» ستراتەگياسىندا ايتىلعان باسىمدىقتاردى ەسكەرە وتىرىپ, «نۇر وتان» پارتياسىنىڭ سىبايلاس جەمقورلىقپەن كۇرەسۋدىڭ ۇزاق مەرزىمدى جاڭا ستراتەگياسى مەن باعدارلاماسىن ازىرلەۋ تۋرالى شەشىم قابىلداندى.
كەڭەس وتىرىسىنا «ەلەكتروندىق پارتيا» جوباسى اياسىندا بەينەكونفەرەنتسيا ارقىلى بارلىق وبلىستارداعى پارتيا توراعالارىنىڭ ءبىرىنشى ورىنباسارلارى جانە سىبايلاس جەمقورلىققا قارسى كۇرەستىڭ وڭىرلىك كەڭەسىنىڭ ءمۇشەلەرى دە قاتىستى.
جاقسىباي سامرات,
«ەگەمەن قازاقستان».
