مەملەكەت باسشىسى نۇرسۇلتان نازارباەۆ قازاقستان رەسپۋبليكاسى ۇلتتىق بانكى توراعاسى قايرات كەلىمبەتوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى نۇرسۇلتان نازارباەۆ قازاقستان رەسپۋبليكاسى ۇلتتىق بانكى توراعاسى قايرات كەلىمبەتوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
ق.كەلىمبەتوۆ ۇلتتىق بانك قىزمەتى, سونداي-اق, ەلدىڭ بانك سەكتورىنىڭ قازىرگى احۋالى مەن ودان ءارى دامۋ پەرسپەكتيۆالارى تۋرالى باياندادى.
مەملەكەت باسشىسى الەمدىك قارجى نارىعىنداعى جاعدايعا بايلانىستى تۋىنداپ وتىراتىن قاتەرلەرگە تالداۋ جاساۋ, نەگىزگى ماكروەكونوميكالىق كورسەتكىشتەر مەن ۆاليۋتا نارىعىنداعى جاعدايدىڭ تۇراقتىلىعىن قامتاماسىز ەتۋ قاجەتتىگىن اتاپ ءوتتى.
ۇلتتىق بانك توراعاسى اقشا-نەسيە ساياساتىنىڭ نەگىزگى ولشەمدەرى بولجامدى شەگىندە ساقتالىپ وتىرعاندىعىنان حاباردار ەتتى. ول قارجى نارىعىندا نەمەسە ونىڭ جەكەلەگەن سەگمەنتتەرىندە قاتەرلەر تۋىنداعان جاعدايدا ۇلتتىق بانك قولدانىلىپ وتىرعان ادىستەرگە يكەمدى تۇزەتۋلەر جاساۋعا نيەتتى ەكەنىن جەتكىزدى.
سونداي-اق, كەزدەسۋ بارىسىندا ق.كەلىمبەتوۆ 2013 جىلعى قازان ايىنىڭ قورىتىندىسى بويىنشا جىلدىق ينفلياتسيا 4,9% دەڭگەيىندە قالىپتاسقانىن مالىمدەدى. جىل باسىنان بەرى ەلدىڭ حالىقارالىق رەزەرۆتەرى ۇلتتىق قور اكتيۆتەرىن قوسقاندا 7,3%-عا جەتىپ, 92,4 ملرد. اقش دوللارىنا دەيىن ۇلعايدى.
بۇعان قوسا, ۇلتتىق بانك توراعاسى مەملەكەت باسشىسىنىڭ زەينەتاقى اكتيۆتەرىن بىرىڭعاي زەينەتاقى جيناقتاۋشى قورىنا بەرۋ جونىندەگى تاپسىرماسىنىڭ ىسكە اسىرىلۋى تۋرالى ايتتى. بۇل جۇمىستىڭ 2014 جىلعى 1 ساۋىرگە دەيىن اياقتالاتىنى اتاپ كورسەتىلدى.
كەزدەسۋ قورىتىندىسىندا مەملەكەت باسشىسى قارجى جۇيەسىن تۇراقتاندىرۋ جانە ەكونوميكانىڭ دامۋ قارقىنىن ساقتاۋدى قامتاماسىز ەتۋ جونىندە بىرقاتار تاپسىرما بەردى.
