وسىلايشا, 15-20 جىلعا يپوتەكالىق نەسيە رەسىمدەپ, مويىندارىنا ۇزاقمەرزىمدىك بانك قامىتىن كيگەن 72 وتباسى 10 ايدان بەرى قۇزىرلى ورىنداردىڭ تابالدىرىعىن توزدىرىپ, ەڭ بولماسا ءليفتىنى ىسكە قوسىپ بەرۋدى وتىنگەنىمەن, شەندىلەر قۇرعاق ۋادەدەن باسقا ەشبىر كومەك كورسەتە قويماعان.
بۇل ءۇيدىڭ جوعارى قاباتىندا تۇراتىن قارت ادامدار ءليفتىنىڭ جوعىنان 10 اي بويى ۇيىنەن شىعا الماي, ءتورت قابىرعادا قامالىپ وتىر. توعىزىنشى قاباتتاعى 72-پاتەردە تۇراتىن زەينەتكەر مارفۋعا تولەگەنوۆا 8-9-قاباتتا تۇراتىن 4-5 كەيۋانا اعاش باسىنا ورمەلەپ شىعىپ, قايتىپ تۇسە الماي قالعان مىسىقتىڭ كەبىن كيىپ وتىرعانىن ايتادى.
– جەلتوقسان ايىندا وسى ۇيگە قونىستانعانىمىزعا ءبىر جىل تولادى. ليفت جوق. اي سايىن ۋادە بەرەدى, بىراق ورىندالمايدى. ءوزىم ناۋقاس اداممىن. جاسىم 62-دەن اسىپ بارادى. 9-قاباتتا تۇرامىن. ءتۇسىپ, قايتا كوتەرىلۋ مۇڭعا اينالدى. قان قىسىمىم جوعارىلاپ, قايتا-قايتا جەدەل جاردەم شاقىرامىن. ولاردىڭ دا كەلگىسى كەلمەيدى. ويتكەنى 9-قاباتقا باسپالداقپەن كوتەرىلۋ قيىن. بۇل قاشانعا جالعاسادى, نەگە بۇلاي سوزبالاپ وتىر؟ مۇندا سەكسەننەن اسقان كورشىم بار. جەلتوقسان ايىندا كىردى, سودان دالاعا شىققان جوق. تاياققا سۇيەنىپ ارەڭ جۇرەدى. ءبىز دە ادامبىز, اۋلاعا شىعىپ از-كەم بوي جازىپ, ءبىر ۋاق تازا اۋا جۇتىپ, دەمالعىمىز كەلەدى. بالكونعا شىقساق, تەرەزە اشۋدان قورقامىز, باسىمىز اينالادى. 8-قاباتتا ەگىز بالاسى بار ءبىر كەلىنشەك بار, ەكى بالاسىن قۇشاقتاپ الىپ, ول دا قينالىپ كىرىپ, قينالىپ شىعادى, – دەدى زەينەتكەر.
اتالعان ءۇيدىڭ تۇرعىنى ساۋلە بايعابىلوۆا دا 2 جاسار كىشكەنتايىن كوتەرىپ سەگىزىنشى قاباتقا كۇنىنە ەكى-ءۇش رەت ءتۇسىپ-شىعادى.
– بالامدى دالاعا شىعارىپ, تازا اۋادا سەرۋەندەپ قايتۋ مەن ءۇشىن ناعىز ازاپقا اينالدى. الدىمەن ويىنشىعىن, ودان كەيىن بالامدى كوتەرىپ تۇسىرۋگە تۋرا كەلەدى. بالام سىرقاتتانىپ قالسا, جەدەل جاردەم شاقىرتۋ قيىن. سەگىزىنشى قاباتقا كوتەرىلگىسى كەلمەيدى. كوتەرىلە قالعان جاعدايدا دا ء«ليفتى جوق ەكەنىن الدىن الا نەگە ەسكەرتپەدىڭ» دەپ ۇرسىپ, رەنىش بىلدىرەدى. زەينەت جاسىنداعى انام ەكەۋمىز بىرگە تۇرامىز. ول كىسىنىڭ اياعى اۋىرادى, تومەن تۇسسە, كوتەرىلە الماي, كوتەرىلسە, تومەن تۇسە الماي قينالىپ ءجۇر. مەنىڭ تۇسىنبەيتىنىم, ءبىز يپوتەكالىق نەسيەمىزدى مەرزىمدى ۋاقىتىنان كەشىكتىرمەي 100% تولەيمىز. ال مەملەكەتتىك باعدارلاما اياسىندا جاسالعان كەلىسىمشارت بويىنشا العان ءۇيدى 100% پايدالانا الماي وتىرمىز. مىنە, 10 اي بولدى, ءليفتى جوق. قابىرعادان جاڭبىر ءوتىپ, جەرتولەگە سۋ اعىپ جاتىر. كوممۋنالدىق تولەمدەردى تولىق تولەپ وتىرمىز. گاز, ىستىق سۋ, ەلەكتر اقىسىن ءسال كەشىكتىرسەك, اجىراتامىز, كەسىپ تاستايمىز دەپ قورقىتۋعا شەبەر. ال جۇمىس ىستەمەي تۇرعان جەدەلساتىعا تۇرعىنداردان باسقا باس اۋىرتىپ جاتقان ەشكىم جوق, – دەدى س.بايعابىلوۆا.
2019 جىلدىڭ جەلتوقسان ايىندا پايدالانۋعا بەرىلگەن كوپقاباتتى ۇيگە تۇرعىندار بيىل قاڭتار ايىنان بەرى كىرە باستاعان. جاڭا قونىستارىندا ءليفتى جۇمىس ىستەمەي تۇرعانىن ايتقان تۇرعىندارعا قالا اكىمدىگى «الدىمەن پاتەر يەلەرىنىڭ 50%-ى قۇتتى ورنىنا قونىپ السىن, ءليفتىنى سودان كەيىن قوسامىز», دەپ جاۋاپ بەرەدى. اقپاندا تۇرعىنداردىڭ 80%-ى كوشىپ كەلىپ, پاتەرلەرىنە ءبىرجولا ورنالاسادى. ءليفتى سوندا دا جۇمىس ىستەي قويماعان سوڭ, تۇرعىنداردىڭ قايتا شاعىمدانۋىنا تۋرا كەلەدى. اكىمدىك بۇل جولى جەدەلساتىعا قوسالقى بولشەك بولماي تۇرعانىن, تاياۋدا رەسەيدەن اكەلىنەتىنىن ايتىپ, تۇرعىنداردىڭ سابىر ساقتاپ كۇتە تۇرۋىن سۇرايدى. وسىلايشا, پاتەرىنە اق تەر-كوك تەر بولىپ كوتەرىلىپ ءجۇرىپ اقپاندى وتكىزگەن تۇرعىندار 25 ساۋىردە قالا اكىمى قايرات احمەتوۆتىڭ اتىنا جازباشا تۇردە تاعى ءبىر شاعىم حات جولدايدى. 11 مامىردا اكىمنىڭ سول كەزدەگى ورىنباسارى اندرەي فينكتەن «رەسەيدەن اكەلىنەتىن قوسالقى بولشەكتى كۇتىپ وتىرمىز. 25 مامىرعا دەيىن جەتۋى ءتيىس» دەگەن جاۋاپ حات كەلەدى. ۋادەلى ۋاقىت ءوتىپ كەتسە دە, جەدەلساتىنى جوندەگەن جان كورىنبەگەن سوڭ, تاعاتسىزدانعان تۇرعىندار ماۋسىمنىڭ 8-ىندە قالا اكىمىنە پيك وكىلى ت.وتاروۆ ارقىلى حات جولداپ, 10 ماۋسىمدا №9 ءۇيدىڭ تۇرعىندارى ءليفتىنى ىسكە قوسۋ ماسەلەسىنە قاتىستى 30-دان اسپايتىن ادامنىڭ قاتىسۋىمەن پاتەر يەلەرىنىڭ جيىنى وتەتىنىن حابارلاپ, اتالعان جيىنعا قالا اكىمىنىڭ دە قاتىسۋىن تالاپ ەتەدى.
بۇل تۇرعىندار جيىنىنا اكىم كەلمەيدى, بىراق ءۇيدى تۇرعىزعان «ساۋلەت» قۇرىلىس كومپانياسىنىڭ باسشىسى د.ميحايلوۆ قاتىسىپ, رەسەيدەن كەلە جاتقان قوسالقى بولشەك 15 ماۋسىمعا قاراي قوستانايدا بولاتىنىن, ءليفتى 30 ماۋسىمدا ىسكە قوسىلاتىنىن ايتىپ, جينالعانداردى تاعى دا ۋادەگە تويدىرىپ كەتەدى. الايدا 30-ى كۇنى ميحايلوۆ قاراسىن دا كورسەتپەيدى. ۋادەگە تويعىزعان قالا اكىمدىگى مەن مەردىگەر «ساۋلەت» سەرىكتەستىگىنەن ابدەن كۇدەر ۇزگەن تۇرعىندار ەندى ايماق باسشىسىنا شىقپاق بولىپ, وبلىس اكىمدىگىنىڭ اپپاراتىنا قوڭىراۋ شالىپ, ارحيمەد مۇحامبەتوۆتىڭ قابىلداۋىنا كەزەككە تىركەۋدى وتىنەدى. اكىمدىك مامانى ا.ءشارىپوۆا شاعىمدانۋشىلاردىڭ اكىمنىڭ قابىلداۋىنا جازىلۋعا اسىقپاي قويا تۇرۋىن سۇراپ, «ساۋلەت» سەرىكتەستىگى 30 شىلدەگە دەيىن ءليفتىنى قوساتىنىن ايتىپ, ۋادە ەتكەنىن حابارلايدى. وكىنىشكە قاراي ماماننىڭ ءسوزى دە وتىرىك بولىپ شىقتى.
اشىنعان تۇرعىندار 6 تامىزدا ا.مۇحامبەتوۆكە شاعىم حات جولداعان. وبلىس اكىمى تۇرعىنداردىڭ شاعىمىن قالا اكىمىنە جىبەرەدى. قالا اكىمى ونى قۇرىلىس بولىمىنە ىسىرادى. 28 تامىز كۇنى قۇرىلىس ءبولىمىنىڭ باسشىسى نۇرجان قۇرمانعاليەۆ تۇرعىندارعا كەزەكتى جاۋاپ حات جولدايدى. مازمۇنى «23 تامىزعا دەيىن «ساۋلەت» سەرىكتەستىگىنە سىزدەر تۇرىپ جاتقان ءۇيدىڭ جەدەلساتىسىنا قاجەت قوسالقى بولشەكتى تاۋىپ, ءليفتىنىڭ اقاۋىن جونگە كەلتىرۋدى مىندەتتەپ, ەسكەرتپە حات جولدادىق. سونداي-اق سىزدەرگە قۇرىلىس ءبولىمى «ساۋلەت» سەرىكتەستىگىن وزىنە ءتيىستى مىندەتتى 5 قىركۇيەككە دەيىن زاڭ كۇشىمەن ءماجبۇرلى تۇردە ورىنداتۋ تۋرالى تالاپ-ارىز دايىنداپ, قالالىق سوتقا جىبەرگەلى جاتقانىن حابارلايمىز», دەگەن.
بىراق «ساۋلەت» سەرىكتەستىگىنە سوتتىڭ دا شاماسى جەتپەدى مە, ايتەۋىر قىركۇيەك كەلگەنىمەن, ءليفتى قوزعالمادى. ەرىكسىز «ماقتا قىز» ەرتەگىسى كەيىپكەرىنىڭ كەبىن كيىپ, تاۋى شاعىلعان تۇرعىندار ەندى پرەزيدەنتكە شاعىم حات جولداپ, №9 ۇيدە تەك جاس وتباسىلار عانا ەمەس, مۇمكىندىگى شەكتەۋلى جاندار, زەينەتكەرلەر, كوپبالالى جانە جالعىز باستى انالار تۇراتىنىن, وسىنى ەسكەرىپ, 9 اي بويى اۋرە-سارساڭعا ءتۇسىرىپ, تاپجىلماي تۇرعان ءليفتىنىڭ ىسكە قوسىلۋىنا سەپتىگىن تيگىزۋىن وتىنەدى.
كوپ كەشىكپەي توعىزىنشى ءۇيدىڭ تۇرعىندارى قوستاناي قالاسى اكىمىنىڭ ورىنباسارى رۇستەم قاركەنوۆتىڭ ۋادە حاتىن الادى. ول ءليفتىنىڭ قوستاناي وبلىسىنىڭ مەملەكەتتىك ساۋلەت-قۇرىلىس باقىلاۋ باسقارماسىندا تىركەۋدەن ءوتىپ جاتقانىن, ودان كەيىن جەدەلساتىنىڭ دۇرىس جۇمىس ىستەيتىنىن تەكسەرۋ ءۇشىن قالالىق توتەنشە جاعداي باسقارماسىنا حات جىبەرىلەتىنىن, ليفت 1 قاراشا كۇنى ورناتىلاتىنىن حابارلاعان ەكەن, بىراق ۋادەلى كۇنى ليفت ىسكە قوسىلماي قالدى.
قوستاناي وبلىسى
