مەملەكەت باسشىسى نۇرسۇلتان نازارباەۆتىڭ توراعالىعىمەن وتكەن, بيىلعى جىلدىڭ توعىز ايىنىڭ قورىتىندىسى سارالانعان ۇكىمەت وتىرىسى حالىقتىڭ اراسىندا كەڭ تالقىعا تۇسۋدە. ويتكەنى, ماسەلەگە تۋرا كوزبەن قاراعان ەلباسى ورلەۋ, وركەندەۋىمىزدى تەجەپ وتىرعان نەگىزگى كەمشىلىكتەردى وتكىر سىنعا الدى. بيىك لاۋازىمىنا قاراماستان ۇكىمەت مۇشەلەرىن ورنىنان كوتەرىپ, جاۋاپكەرشىلىك سۇرادى.
مەملەكەت باسشىسى نۇرسۇلتان نازارباەۆتىڭ توراعالىعىمەن وتكەن, بيىلعى جىلدىڭ توعىز ايىنىڭ قورىتىندىسى سارالانعان ۇكىمەت وتىرىسى حالىقتىڭ اراسىندا كەڭ تالقىعا تۇسۋدە. ويتكەنى, ماسەلەگە تۋرا كوزبەن قاراعان ەلباسى ورلەۋ, وركەندەۋىمىزدى تەجەپ وتىرعان نەگىزگى كەمشىلىكتەردى وتكىر سىنعا الدى. بيىك لاۋازىمىنا قاراماستان ۇكىمەت مۇشەلەرىن ورنىنان كوتەرىپ, جاۋاپكەرشىلىك سۇرادى.
پرەزيدەنتىمىزدىڭ بۇل ارەكەتى حالىقتىڭ كوكەيىندەگىسىن ءدوپ باستى دەپ ايتۋعا تولىق نەگىز بار. مىسالى, «باعدارلامالاردىڭ باعدارى قانداي؟» دەگەنگە كوز جۇگىرتسەك, مىناعان كەزىگەمىز.
ەلباسى قۇرىلىستى جۇرگىزەتىن مەردىگەردى تابۋ ىسىندەگى جىمقىرۋ جولدارىن دا ءبىلىپ وتىرعانىن جەتكىزدى. الدىمەن كونكۋرسقا تۇسكەن 2 مەردىگەردىڭ جەڭىلگەنى سوتقا بەرەدى, ول پروتسەسس اياقتالعانشا ەشقانداي جۇمىس جۇرمەيدى, ودان ءارى كەلەسى كونكۋرس بولىپ, بۇل جولى دا العاشقى وقيعا قايتالانىپ, اقىر سوڭىندا «وزدەرىنىڭ» اقشا بولىسەتىن «ءبىر كوز» اتتى مەردىگەرى عانا قالادى. «مۇنداي ىستەردى قارايتىن سۋديالاردى دا سىبايلاس جەمقورلاردىڭ اراسىندا ءجۇر دەپ ساناۋعا بولادى, – دەدى ەلباسى. – سوندىقتان دا ۇلكەن مەردىگەرلەردى تابۋ ىسىنە وبلىستىڭ ءبىرىنشى باسشىلارى جاۋاپتى بولسىن, ال ءبىز ولاردى ءتۇرلى, ورىنسىز شاعىمداردان قورعاۋىمىز كەرەك».
بولىنگەن قارجىنىڭ يگەرىلمەۋى, ساپاسىز قۇرىلىستار وسى «تەندەر» دەگەن پالەنىڭ اينالاسىندا ءورشىپ تۇرعانى انىق. «تەندەر» «ءبولىسىپ جەڭدەر» دەپ تۇرعانداي. و زاماندا بۇ زامان بىرنەشە قاباتتى ۇيلەردىڭ سالىنعانىنا ارادا 2-3 جىل وتپەي جاتىپ ىرگەتاسى وتىرىپ, قابىرعاسى ىرسيىپ جارىلىپ كەتەتىنىن كىم كورگەن؟ بۇل قازىر قاي جەردە جوق؟ مۇنىڭ سەبەبى دە جۇرتشىلىققا كەڭىنەن ءمالىم بولۋدا. ايتالىق, ءبىر مەكتەپتى اۋىلدىق جەردە تۇرعىزۋدى استانادان جەڭىپ الدى دەلىك. ول جەڭىمپاز «شاپكاسىن» الادى ەكەن دە, الماتى, ءيا باسقا قالاداعى بىرەۋلەرگە بەرەتىن كورىنەدى. ولار «جەيدەسىن» شەشىپ العان سوڭ وبلىس ورتالىعىنداعى بىرەۋلەرگە ۇسىنادى. ءسويتىپ, قولدان-قولعا ءوتىپ, اۋىلعا كەلەدى ءبىر كۇنى. قۋ قاڭقاسى جەتكەن قارجىعا قۇرىلىس سالىنادى. مۇندا دا قۇرىلىستى جۇرگىزۋشىلەر مەن ونىڭ قوجايىندارى, ياعني قابىلداۋشىلار اراسىندا استىرتىن كەلىسسوز باستالادى. ناتيجەسىندە قۇرىلىستى جۇرگىزۋشىلەرگە «مىناۋ نەگە بۇلاي» دەپ قارسى كەلۋگە بولمايتىن جاعداي تۋىندايدى. ويتكەنى, بىرىنە ءوتىپ كەتتى, ەكىنشىسىنىڭ وتكىزىپ قويعانى بار. انە, اقىر سوڭىندا سىرتى جىلتىر, ەرتەڭى كۇماندى قۇرىلىستار «يگىلىگىمىزگە» بەرىلەدى.
ءبىزدىڭ قۇرمانعازى اتالاتىن اۋداندا دا «عاسىر عاجايىبى» دەيتىندەي ەمحانا تۇرعىزىلدى. جەرگىلىكتى جەردەن قارا جۇمىسىنا ادامدار الىنىپ, ءىس باستالدى. پرورابى ەتىپ وسى اۋداندا بىرنەشە مەكتەپتەر, بالاباقشالار, تۇرعىن ۇيلەر سالعان, ۇزاق جىلدار «پمك-5» اتالاتىن ايگىلى مەكەمەنى باسقارعان اعامىزدى بەكىتىپتى. قۋاندىق.
ارادا از كۇن وتكەندە الگى اعامىز سالپاقتاپ بوس ءجۇر.
– وۋ, اعا, جۇمىسقا كىرمەپ پە ەدىڭ؟
– وي, قۇرىسىن, «بوسسىڭ» دەپ ەسەپ ايىرىستى.
– نە بولدى؟
– نە بولعانى سول, ىرگەتاستىڭ استىنا سىزبا (چەرتەج) بويىنشا 30 سم. قيىرشىق تاس سالىنۋى كەرەك. بۇلار سەبەلەپ قانا ءوت دەيدى. كەلىسپەدىك. ەرتەڭ قۇرىلىس وتىرىپ, قابىرعاسى جارىلىپ كەتسە كىنالى مەن بولامىن عوي. سوسىن جۇرتتىڭ بەتىنە قالاي قارايمىن, – بولدى اعامىزدىڭ ايتقانى.
بۇل – كوپشىلىك قۇرىلىس جۇرگىزۋشى جەڭىمپازدارعا ورتاق جاعداي. ساپاسىز قۇرىلىستار وسىندايدان شىعىپ جاتىر. اقشانىڭ يگەرىلمەۋى دە ەلباسى ءدوپ باسىپ ايتقان ونىڭ اينالاسىنداعىلاردىڭ الدىمەن ءوز قۇلقىنىن ويلاۋلارىنان بولىپ وتىرعان جاعداي.
قىسقاسى, وسى «تەندەر» «ءبولىسىپ جەڭدەرگە» اينالىپ كەتكەننەن باسقا قارجى يگەرۋدىڭ جولى جوق پا؟ مىسالى, «كوميسسيا مىنا نىساندى تۇرعىزۋعا مىناداي مولشەردە قارجىنى ەسەپتەپ قويدى, كەلىسسەڭ ال دا تۇرعىز» دەپ ءوزىن دالەلدەگەن فيرما, يا كومپانيالاردىڭ بىرىنە الدىن الا قۇرىلعان كوميسسيانىڭ ۇسىنعانى تيىمدىرەك-اۋ دەگەن وي كەلەدى.
تاڭاتار دارەل ۇلى.
اتىراۋ وبلىسى,
قۇرمانعازى اۋدانى.
___________________________________
سۋرەتتى سالعان ايداربەك عازيزوۆ.
