بۇل رەتتە اۋدانداعى باق كولەمى 4200 گا, ونىڭ 464 گەكتارى بيىل ەگىلگەن. ال جالپى وتكەن جىلدىڭ قورىتىندىسى بويىنشا الماتى وبلىسىندا باقتاردىڭ جالپى كولەمى 23,5 مىڭ گەكتاردى قۇرادى, سونىڭ ىشىندە 2 مىڭ گا ينتەنسيۆتى باقتاردى قوسقاندا الما باقتارى – 14,1 مىڭ گا. بيىلعى جىلى 139 مىڭ توننا جەمىس-جيدەك, سونىڭ ىشىندە 92 مىڭ توننادان استام الما جيناۋ جوسپارلانعان.
ۇيعىر اۋدانى اكىمدىگىنىڭ ايتۋىنشا, باق وسىرۋمەن اينالىساتىن شارۋاشىلىقتىڭ باسىم بولىگى ىلعال ساقتاۋ تەحنولوگياسىنا بەلسەندى تۇردە كوشۋدە. بۇگىنگى كۇنى اۋداندا 372 گا باقتا تامشىلاتىپ سۋارۋ جەلىسى جۇرگىزىلگەن. سول قاتاردا الما مەن ءداندى جەمىستەر وسىرەتىن «Alma Prodex» جشس دا بار. سەرىكتەستىكتىڭ الما باعىنىڭ كولەمى - 25 گا. المانىڭ «گولدەن دەليشەس», «فۋدزي», «برەبۋرەن», «فلورينا», «گالا», «گرەني سميتت», «رەد چيف» سياقتى جوعارى ءونىم بەرەتىن تانىمال سورتتارى وسىرىلۋدە. بۇل سورتتار, سونداي-اق, دارۋمەنگە باي, تاسىمالداۋعا جانە ساقتاۋعا شىدامدى. الما باقتارى تامشىلاتىپ سۋرارۋ جۇيەسى ارقىلى سۋعارىلادى. اعاشتاردى زاقىمدانۋدان جانە اۋا رايىنىڭ ءتۇرلى فاكتورلارىنان قورعاۋ ءۇشىن كوشەتتى بەكىتە تۇسۋگە ارنالعان ارنايى تورلى جۇيە ورناتىلعان. ول كوشەتتى كۇن ساۋلەسىنىڭ جوعارعى قارقىنمەن تۇسىنەن دە قورعايدى. 
«Alma Prodex» جشس ديرەكتورى قالياحاتۇكسۇمباەۆتىڭ ايتۋىنشا, شارۋاشىلىق جىلىنا 350 تونناعا دەيىن ءونىم الادى. ءونىمنىڭ كوپ بولىگى وتاندىق نارىققا شىعارىلادى. مۇندا تۇراقتى جۇمىسپەن 11 ادام قامتىلعان, ال ماۋسىم كەزىندە تاعى 30 ادام جۇمىسقا تارتىلادى. سول سياقتى بيىلعى جىلى 24 گا جەرگە ابريكوس وتىرعىزىلدى.
اتاپ وتسەك, جالپى اۋىل شارۋاشىلىعى داقىلدارىنىڭ ەگىستىگى وبلىستا 7 مىڭ گەكتارعا ۇلعايتىلىپ, 969 مىڭ گەكتارعا جەتكىزىلدى. قانت قىزىلشاسىنىڭ القابى - 16 مىڭ گا, جۇگەرى – 87 مىڭ گا, جاڭا باقتار 1,2 مىڭ گا جەرگە وتىرعىزىلدى.
