قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ چەح رەسپۋبليكاسى سەناتى توراعاسىنىڭ ورىنباسارى, پالاتانىڭ بۇرىنعى توراعاسى پرشەمىسل سوبوتكا باستاعان چەحيالىق پارلامەنتشىلەر دەلەگاتسياسىمەن كەزدەستى, دەپ حابارلادى قازاقستان پارلامەنتى سەناتىنىڭ ءباسپاسوز قىزمەتى.
قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ چەح رەسپۋبليكاسى سەناتى توراعاسىنىڭ ورىنباسارى, پالاتانىڭ بۇرىنعى توراعاسى پرشەمىسل سوبوتكا باستاعان چەحيالىق پارلامەنتشىلەر دەلەگاتسياسىمەن كەزدەستى, دەپ حابارلادى قازاقستان پارلامەنتى سەناتىنىڭ ءباسپاسوز قىزمەتى.
چەح دەلەگاتسياسى پارلامەنتارالىق بايلانىستاردى ءىلگەرىلەتۋ, زاڭ شىعارۋ قىزمەتى بويىنشا تاجىريبە الماسۋ, سونداي-اق ونەركاسىپ, اۋىل شارۋاشىلىعى جانە كولىك سالالارىندا ەكىجاقتى ىنتىماقتاستىقتى كەڭەيتۋ ماقساتىندا قازاقستانعا ساپارمەن كەلگەن بولاتىن.
كەزدەسۋ بارىسىندا قازاقستان مەن چەحيانىڭ ءوزارا ءتيىمدى ءىس-قيمىلىنىڭ اۋقىمدى ماسەلەلەرى بويىنشا پىكىر الماسىلدى. ق.توقاەۆ ەكىجاقتى تۇردە دە, ەۋروپالىق وداقپەن ستراتەگيالىق ارىپتەستىك اياسىندا دا چەحيامەن ىنتىماقتاستىقتى دامىتۋ قازاقستان ءۇشىن ماڭىزدى ەكەنىن اتاپ ءوتتى.
ونىڭ پىكىرىنشە, ەكى ەلدىڭ زاڭ شىعارۋ ورگاندارى, ءاسىرەسە, قازاقستان پرەزيدەنتى نۇرسۇلتان نازارباەۆتىڭ 2012 جىلعى قازان ايىندا پراگاعا بارعان رەسمي ساپارى بارىسىندا قول جەتكەن كەلىسىمدەر مەن ۋاعدالاستىقتار تۇرعىسىندا ءوزارا ءتيىمدى ىنتىماقتاستىقتى تەرەڭدەتۋگە بەلسەندى تۇردە اتسالىسىپ كەلەدى. ق.توقاەۆ ەقىۇ پارلامەنتتىك اسسامبلەياسىنداعى ءوزارا ءىس-قيمىلعا ەرەكشە ماڭىز بەرىپ, 2017-2018 جىلدارى بۇۇ قاۋىپسىزدىك كەڭەسىنە تۇراقتى ەمەس مۇشە رەتىندە سايلانۋعا قازاقستاننىڭ كانديداتۋراسىن قولداۋعا ءوتىنىش ءبىلدىردى.
پ.سوبوتكا قازاقستان چەح رەسپۋبليكاسىنىڭ باسىمدىققا يە ارىپتەستەرىنىڭ ءبىرى ەكەنىن اتاپ ءوتتى. پارلامەنتشى استاناداعى حالىقارالىق ەكسپو-2017 كورمەسىنە چەحيانىڭ بەلسەندى تۇردە قاتىسۋعا نيەتتەنىپ وتىرعانىن جەتكىزدى.
سەناتتىڭ ەكونوميكالىق دامۋ جانە كاسىپكەرلىك, تابيعاتتى پايدالانۋ جانە اۋىلدىق اۋماقتاردى دامىتۋ, سونداي-اق, حالىقارالىق قاتىناستار, قورعانىس جانە قاۋىپسىزدىك جونىندەگى تۇراقتى كوميتەتتەر مۇشەلەرى مەن چەح دەپۋتاتتارىنىڭ كەزدەسۋلەرىندە پارلامەنتارالىق بايلانىستاردىڭ كەلەشەگى تۋرالى جان-جاقتى اڭگىمە بولدى.
ساپار بارىسىندا چەحيا سەناتىنىڭ دەلەگاتسياسى يندۋستريا جانە جاڭا تەحنولوگيالار, اۋىل شارۋاشىلىعى, كولىك جانە كوممۋنيكاتسيا مينيسترلىكتەرىنىڭ, «قازاقستان تەمىر جولى» اكتسيونەرلىك قوعامىنىڭ باسشىلىعىمەن كەزدەسەدى. سونداي-اق, دەلەگاتسيا چەحيانىڭ پلزەن ايماعىمەن بەلسەندى ىنتىماقتاستىق ورناتقان شىعىس قازاقستان وبلىسىنا بارادى.
