جيىنعا ۇلى اعارتۋشىنىڭ ۇرپاقتارى مەن اتالاس تۋىستارى, جەرگىلىكتى ولكەتانۋشىلار مەن تاريحشى عالىمدار, سونداي-اق وبلىستىق ىبىراي التىنسارين مەموريالدىق مۋزەيىنىڭ قىزمەتكەرلەرى قاتىستى.
"20 قازان كۇنى كيەلى توبىل وڭىرىندە دۇنيەگە كەلگەن قازاقتىڭ ۇلى اعارتۋشىسى ىبىراي التىنسارين اتامىزدىڭ تۋعانىنا 179 جىل تولىپ وتىر. الداعى جىل - ءبۇتىن الاش جۇرتى ءۇشىن مەرەيلى جىل. ويتكەنى ىبىراي اتامىزدىڭ 180 جىلدىعى ەل كولەمىندە اتاپ وتىلمەك. دالا ۇستازىنىڭ ارتىندا قالدىرعان ۇلى مۇراسىن وسكەلەڭ ۇرپاققا ناسيحاتتاۋ بارىسىندا وبلىستىق ىبىراي التىنسارين مەموريالدىق مۋزەيى بۇعان دەيىن دە بىرقاتار اۋقىمدى ءىس-شارالاردى اتقاردى. ال بۇگىنگى ونلاين-جيىنعا تاراز, شۋ, الماتى, اقتوبە, رۋدنىي, قوستاناي قالالارىندا تۇراتىن ابدوللا ىبىراي ۇلىنىڭ, بالعوجا ءبيدىڭ نەمەرەسى وسپان مەن نۇحمان قوشان ۇلىنىڭ, بالعوجا ءبيدىڭ اعا باۋىرى قانقوجانىڭ, بالعوجا ءبيدىڭ ءىنىسى كوتىبار اۋلەتىنىڭ ۇرپاقتارى قاتىسىپ وتىر. كەزدەسۋ ونلاين رەجىمدە بولىپ جاتقانىنا قاراماستان, ىبىرايدىڭ اتالارى, كەيىنگى ۇرپاقتارى جايلى تىڭ دەرەكتەرگە قانىقتىق", دەدى وبلىستىق ىبىراي التىنسارين مەموريالدىق مۋزەيى باسشىسىنىڭ عىلىمي جۇمىستار جونىندەگى ورىنباسارى سالتانات وتەلباەۆا.
باسقوسۋدا ى. ءالتىنساريننىڭ تۋىستارى اۋلەت شەجىرەسىنەن سىر شەرتىسىپ, ءوز ەستەلىكتەرىمەن ءبولىستى. سونداي-اق, قوستانايلىق ولكەتانۋشىلار قويعان ساۋالدارعا جاۋاپ بەرىپ, قازىرگى تۇرمىس-تىرشىلىكتەرى جايىندا اڭگىمە ءوربىتتى.
ونلاين-كەزدەسۋ بارىسىندا مۋزەي قورىنداعى فوتو-قۇجاتتار مەن شەجىرەلەر جيىنتىعىنان جاسالعان كورمەنىڭ اشىلۋ ءراسىمى ءوتتى.
