– سونىڭ ىشىندە اتىراۋ قالاسىنداعى №2 وبلىستىق جۇقپالى اۋرۋلار اۋرۋحاناسىنىڭ ينفەكتسيالىق ستاتسيونارىندا قاۋىپتى ىندەت جۇقتىرعان 26 ناۋقاس ەم الۋدا. ونىڭ ۇشەۋى اۋرۋحانانىڭ جانساقتاۋ بولىمىندە جاتىر. ولاردىڭ جاس ەرەكشەلىكتەرى – 40-65 جاس, – دەگەن اقپارات تاراتتى باسقارمانىڭ ءباسپاسوز قىزمەتى. – سونداي-اق, جىلىوي اۋدانىنداعى تەڭىز كەنىشىندە اشىلعان ينفەكتسيالىق ستاتسيوناردا 33 ناۋقاس ەم قابىلداۋدا. ال اۋداندارداعى ينفەكتسيالىق ستاتسيوناردا ەمدەلىپ جاتقان ناۋقاستار جوق.
دەگەنمەن باسقارما باسشىسىنىڭ ۋاقىتشا مىندەتىن اتقارۋشى اسحان بايدۋاليەۆتىڭ مالىمەتىنە قاراعاندا, وڭىردە مەديتسينالىق كومەككە جۇگىنگەندەرگە 7 995 دارىگەر قىزمەت كورسەتەدى. ونىڭ ىشىندە 7 091 مەديتسينا قىزمەتكەرى مەملەكەتتىك ەمدەۋ ۇيىمدارىندا جۇمىس ىستەيدى. ال جەكەمەنشىك كلينيكالاردا 904 مەديتسينا قىزمەتكەرى بار. بۇدان بولەك وبلىستىڭ مەديتسينالىق ۇيىمدارى حالىققا كومەك كورسەتۋ ءۇشىن 224 جاساندى تىنىس الۋ, 27 رەنتگەن, 10 كومپيۋتەرلىك توموگرافيا اپپاراتىمەن قامتىلدى. سونداي-اق ءوڭىر 977 وتتەگى كونتسەنتراتورى مەن 1 مىڭ پۋلسوكيسمەترمەن قامتاماسىز ەتىلىپ وتىر.
– قازىر 400 ورىندىق ەكى مودۋلدىك اۋرۋحانانىڭ قۇرىلىسى جۇرگىزىلىپ جاتىر. ماسەلەن, اتىراۋ قالاسىنداعى 200 ورىنعا ارنالعان مودۋلدىك اۋرۋحانانى قازان ايىنىڭ سوڭىنا تامان, ال قۇلسارى قالاسىنداعى 200 ورىندىق وسىنداي اۋرۋحانانى قاراشادا پايدالانۋعا بەرۋ جوسپارلانىپ وتىر. بۇعان دەيىن دەمەۋشىلىك كومەك ارقىلى ەمحانالاردىڭ 4-ساناتتى شاقىرتۋلارىن قامتاماسىز ەتۋ ءۇشىن 8 «شەۆرولەت داماس» ماركالى اۆتوكولىك بولىنگەن ەدى. وسى ايدىڭ باسىندا وبلىستىق جەدەل جاردەم ستانساسى 22 جاڭا كولىكپەن تولىقتى. جەدەل جاردەم قىزمەتىندە 69 ارنايى كولىك بار. ەندى جاقىندا تاعى دا 18 مەديتسينالىق جەدەل جاردەم كولىگى كەلەدى, – دەيدى ا.بايدۋاليەۆ.
ونىڭ ايتۋىنشا, وڭىردەگى كوروناۆيرۋس ينفەكتسياسى بويىنشا جاعدايدى تۇراقتى دەڭگەيدە دەۋگە بولادى. سوعان قاراماستان باسقارما تاراپىنان جاھان جۇرتىن جان القىمىنان العان قاۋىپتى ىندەتتىڭ ىقتيمال ەكىنشى تولقىنىنا تاس-ءتۇيىن دايىندىقتىڭ ناقتى جوسپارى ازىرلەنىپ وتىر.
– قاۋىپتى ىندەتتى جۇقتىرعان ناۋقاستاردى ەمدەۋ ءۇشىن 520 ينفەكتسيالىق كەرەۋەت دايىندالدى. ارنايى جوسپارعا سايكەس, قاجەتتىلىك تۋىنداعان تۇستا 2 080 ينفەكتسيالىق كەرەۋەت, ونىڭ ىشىندە 120 رەانيماتسيالىق كەرەۋەت اشۋ مۇمكىندىگى بار. ياعني ينفەكتسيالىق ستاتسيونارلار جاڭا مودۋلدىك اۋرۋحانالاردا, وبلىستاعى ءىرى اۋرۋحانالاردا, سونداي-اق بارلىق اۋداندىق اۋرۋحانا مەن تەڭىز كەن ورنىندا اشىلاتىن بولادى, – دەيدى ا.بايدۋاليەۆ. – قازىر وبلىستا 8 پتر-تەست زەرتحاناسى جۇمىس ىستەپ تۇر. ونداعى تەستىلەۋدىڭ تاۋلىكتىك قۋاتتىلىعى – 3 636. ال وبلىستىڭ 224 جاساندى تىنىس الۋ اپپاراتىمەن قامتىلعان مەديتسينالىق مەكەمەلەرگە قوسىمشا تاعى 14 اپپارات جەتكىزىلەدى.
سونىمەن بىرگە قاجەتتى ءدارى-دارمەكتەردىڭ, ونىڭ ىشىندە كوروناۆيرۋس ينفەكتسياسىنا قارسى پرەپاراتتاردىڭ ءۇش ايلىق قورى جاساقتالدى. ءدارىحانالار جەلىسىندەگى دارىلىك زاتتاردىڭ تومەندەمەيتىن قورىن قامتاماسىز ەتۋ ءۇشىن «اتىراۋ» الەۋمەتتىك-كاسىپكەرلىك كورپوراتسياسى» اق ارقىلى تۇراقتاندىرۋ قورىنا 684,5 ملن تەڭگەنىڭ اسا قاجەتتى 40 ءتۇرلى ءدارى-دارمەكتەرى ساتىپ الىندى. بۇعان قوسا 620,1 ملن تەڭگەنىڭ دارىلىك زاتتارى تۇراقتاندىرۋ قورىنىڭ قويماسىندا ساقتاۋلى تۇر. ال 64,4 ملن تەڭگەنىڭ دارىلىك زاتتارى وبلىستىڭ 164 ءدارىحاناسىنا تاراتىلىپتى. بۇعان قوسا وڭىرگە دەمەۋشىلىك كومەكپەن 251,2 ملن تەڭگەنىڭ 9 ءتۇرلى ءدارى-دارمەك جەتكىزىلدى.
اتىراۋ وبلىسى
