سۋرەتتى تۇسىرگەن ۆلاديمير ۆوروبەۆ
پارك قىزمەتكەرى ۆلاديمير ۆوروبەۆ التايدىڭ اڭ-قۇستارىن سۋرەتكە تۇسىرۋمەن, زەرتتەۋمەن بۇرىننان اينالىسىپ كەلەدى. ونىڭ جەكە فوتوارحيۆىندە ۇلتتىق پارك اۋماعىندا كەزدەسەتىن ايۋ, قاسقىر, قۇنۋ, تۇلكى, قويان, ەلىك سىندى جانۋارلاردىڭ بارلىعى دەرلىك ساقتالعان. كوپتەگەن سۋرەتى تانىمدىق فوتوالبومدارعا دا ەنگەن.
ۆ.ۆوروبەۆتىڭ وبەكتيۆىنە ىلىنگەن بيىلعى ۇلكەن ولجاسى – ارشا ەمەنتۇمسىعى مەن الاكوز سۇڭگۋىر قۇستارى ەدى. ول ارشا ەمەنتۇمسىعىن فوتوسۋرەتكە تاۋتەكەلى وزەنىنىڭ اڭعارىندا تۇسىرگەن. تابيعاتتا سيرەك كەزدەسەتىن ەرەكشە قۇستى ەڭ سوڭعى رەت ورنيتولوگ س.ستاريكوۆ بۇقتىرمانىڭ بويىنان 2006 جىلى كورىپتى.
ارشا ەمەنتۇمسىعىنىڭ سالماعى – 45-70 گرامم عانا. دەنە تۇرقى شاعىن بولعانىمەن تۇمسىقتارى مىقتى. سۇيەكتى جەمىستەردى وپ-وڭاي شاعىپ جەي بەرەدى. بالاپاندارىن العاشقىدا ۇساق جاندىكتەرمەن, كەيىن دانمەن قورەكتەندىرەدى ەكەن. قورازىنىڭ باسى قوڭىر, موينى قىزعىلت, باۋىرى سۇر بولادى. مەكيەنىنىڭ ءتۇسى سولعىنداۋ.
ال الاكوز سۇڭگۋىر قۇستى ۆ.ۆوروبەۆ بيىل بۇقتىرما جاعالاۋىندا تاسپاعا تارتىپتى. ۇيرەككە ۇقساس بۇل قۇس نەگىزىنەن سىرداريا, شۋ, ىلە وزەندەرىنىڭ تومەنگى ساعاسىن جانە الاكول, زايسان كولدەرىن مەكەندەيدى ەكەن. ورنيتولوگتاردىڭ ايتۋىنشا, 1980 جىلدارى الاكوز سۇڭگۋىر كۇرت ازايىپ كەتكەندىكتەن قازاقستاننىڭ «قىزىل كىتابىنا» ەنگىزىلىپتى.
كاتونقاراعاي ۇلتتىق پاركىنىڭ اۋماعى ەرەكشە قورعالاتىندىقتان, سيرەپ كەتكەن جانۋارلاردىڭ ءوسىمى بايقالادى. ەندەشە, التايعا ورالعان ەكى قۇستىڭ دا سانى ارتارى انىق.
شىعىس قازاقستان وبلىسى,
كاتونقاراعاي اۋدانى
