سۋرەتتى تۇسىرگەن اۆتور
الشاڭداي باسىپ كەلە جاتىپ التايدىڭ اق باس اسقارىنا, قۇزار شىڭدارىنا مىندەتتى تۇردە كوز جىبەرەسىز. قاراپ تۇرىپ تاكاپپارلىعىنا, سۇلۋلىعىنا تاڭعالاسىز. بايقايسىز با, كوتەرىلىپ كەلە جاتقان كۇن جەرگە شۋاعىن شاشپاس بۇرىن, الدىمەن التايدىڭ ماڭدايىن جارقىراتادى. مۇنشالىقتى سۇلۋ ەتىپ جاراتقان قۇدايدىڭ شەكسىز قۇدىرەتىنە قايتىپ قانا باس يمەيمىز؟!
قاراڭىز, سامىرسىندى بەلدەۋى عانا رەڭىن ساقتاپ قالعان. ەتەگىندەگى قالىڭ جىنىس مىڭ ءتۇرلى تۇسكە بويالىپ ۇلگەرگەن. ال اياعىڭىزدىڭ استىنداعى جايقالىپ تۇرعان جاسىل ءشوپتى بوزقىراۋ شالىپتى.
التايدىڭ تابيعاتىنا قاراي اۋا رايى دا ەرەكشە. توبەڭنەن كۇن قازىر شاقىرايىپ تۇرسا, قازىر-اق قارا بۇلت تورلاپ, سەلدەتە سالادى. قىزىق, تاۋلى جەردىڭ جاڭبىرى دا اۋىلدى الالاپ جاۋادى. كوشەنىڭ ءبىر باسى لاي تەڭىز بولسا, اياق جاعىنىڭ شاڭى شىعىپ جاتاتىن.
ادەتتە كۇزدىڭ جاڭبىرى اپتالاپ سىبىرلەيدى. كوبىنەسە ارتى قارعا ۇلاسىپ, جەر بەتىن توبىقتان اق ۇلپا باسادى. ءتۇس قايتا ەتەكتەگى قار ەرىگەنىمەن, تاۋدىڭ باسى ءمىز باقپايتىن. وسىمەن اۋىلعا قىس ءتۇسىپ قالماسىن بىلەسىز. ءولارا ۋاقىت. كەيبىر جىلدارى قازاننىڭ ورتاسىنا قاراي كۇن قايتا جىلىنىپ, ميزامشۋاقتانادى. كۇن كوزى شىعىپ تۇرعانمەن, وزەن-كولدەردىڭ جيەكتەرىنە قابىرشىقتانا مۇز قاتار ەدى. كۇزدىڭ شۋاقتى كۇنى ءارى كەتسە ەكى اپتاعا سوزىلادى. ءبىر كۇنى داۋىل تۇرىپ, التىنعا مالشىنعان اعاشتاردى جالاڭاشتايدى. سۇرەڭ تارتقان قارا كۇز دەگەنىڭىز سول ەدى. ارعى جاعىنان قىلىشىن سۇيرەتىپ قىس كەلە جاتادى.
شىعىس قازاقستان وبلىسى
