قازاقتىڭ تۇڭعىش پرەزيدەنتىنىڭ اباي اماناتى مەن وسيەتى تۋرالى وي-پىكىرى ارعى تاريح پەن جاڭا تاريحتىڭ اراسىن تابيعي جالعاپ, بۇگىنگى بۋىنعا ايرىقشا وي سالادى. وسىلاردى كوپتى كورگەن كارى ادەبيەتشى, زەرتتەۋشى رەتىندە جوعارى باعالايمىن.
مەن – ەلباسىممەن تالاي مارتە جولىققان, سۇحباتتاسقان عالىممىن. سول كەزدەسۋلەردىڭ ءبارى دە ەسىمدە. نۇرسۇلتان ءابىش ۇلى – ۇلت تاريحىن, تۇلعالار تاعدىرىن, مادەني مۇرانى حالىقتىڭ, ۇلتتىڭ مۇددەسىمەن ورايلاستىرا تۇسىنەتىن قايراتكەر. وسى ەلدىك تۇسىنىكتى قايراتكەرلىك ۇلانعايىر ىسىندە پايدالانا الاتىن ساياساتكەر. بۇعان وسكەن ورتاسى مەن العان ءتالىم-تاربيەسى, بيلىك ساتىلارىنداعى باي تاجىريبەسى ىقپال ەتكەنى ءسوزسىز.
دانا اباي – نۇرسۇلتان ءابىش ۇلىنىڭ ءاردايىم وقيتىن, ءجيى دايەك الاتىن تۇلعاسى. مەنىڭ ەسىمە دە ۇلى اقىننىڭ يۋنەسكو شەڭبەرىندە وتكەن 150 جىلدىق مەرەيتويى تۇسەدى. راسىندا, نۇرسۇلتان ءابىش ۇلى بولماسا, ول كىسىنىڭ حالىقارىلىق بەدەلى بولماسا, مەرەيتوي بيىك دەڭگەيدە وتپەس ەدى. ول كەزدە مەن اقىننىڭ اكادەميالىق ەكى تومدىعىن ازىرلەگەن م.و.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى ەدىم. «تويدىڭ بولعانىنان بولادىسى قىزىق» دەگەن, ەلباسىنىڭ ارقاسىندا ۇكىمەتتىك دەڭگەيدە اتقارىلعان جۇمىستار قانشاما وڭ ناتيجە بەردى. ەسكەرتكىشتەر دە تۇرعىزىلدى, عيماراتتار دا سالىندى, كىتاپتار دا شىعارىلدى, ءتۇرلى جانردا فيلمدەر دە ءتۇسىرىلدى. بۇلار – ابايتانۋدىڭ زور بيىگى بولىپ قالدى.
كوپتى كورگەن, دانا دا دارا قايراتكەر دەڭگەيىنە ەڭبەگىمەن كوتەرىلگەن نۇرسۇلتان ءابىش ۇلى وسى ماقالاسىن: «ابايدىڭ ءسوزى مەن ويى ءبىزدىڭ كۇنبە-كۇنگى تىرلىگىمىزگە, وركەندى ومىرىمىزگە كىرپىش بولىپ قالانىپ, بۇگىنگى وركەنيەت پەن الداعى بولاشاق تالابىنا لايىق ۇمتىلىستارىمىزدان جانە يگى ىستەرىمىزدەن ناقتى كورىنىس تاباتىنىنا كامىل سەنەمىن» دەپ تۇيىندەپتى. ەلباسى تۇجىرىمىن تۇتاس ۇلتتىڭ تالابىنا بەرىلگەن باتا, اق نيەت دەپ قابىلداساق تا بولادى. بۇل – ۇلت دانالىعىنا ادالدىق.
اباي اماناتى جاڭارعان, جاڭعىرعان قازاقستاندى شىڭداپ, جاڭا بيىكتەرگە باستاي بەرگەي.
سەرىك قيراباەۆ,
اكادەميك
