قوستاناي وبلىسىنىڭ اۋليەكول اۋدانىنا قاراستى قۇسمۇرىن اۋىلىنىڭ تۇرعىنى ءاليانىڭ ايتۋىنشا, تاياۋدا عانا ماشينا ساتىپ العان قىز اياعى اۋىر اپاسىن كولىگىنە مىنگەستىرىپ توبىلداعى تۋىستارىنىڭ ۇيىنە قوناققا بارادى. تۇستەن كەيىن تولعاق قىسا باستاعان سوڭ, اپاسىن اپىل-عۇپىل كولىككە مىنگىزىپ الىپ, وبلىستىق اۋرۋحاناعا اپارماق بولادى. قالانىڭ ىشىندە اداسىپ كەتىپ, ەداۋىر ۋاقىت ۇتتىرىپ العان جەڭىل كولىك جۇرگىزۋشىسىنە, ابىروي بولعاندا, جول پوليتسياسىنىڭ قىزمەتكەرلەرى كەزدەسىپ, اياعى اۋىر كەلىنشەكتى دەر كەزىندە اۋرۋحاناعا جەتكىزەدى.
– كولىك جۇرگىزە باستاعانىما كوپ بولا قويعان جوق. ماشينانى اۋىلدا جۇرگىزۋ جەڭىل, ال قالادا قيىن ەكەن. ونىڭ ۇستىنە, پەريناتالدىق ورتالىقتىڭ مەكەنجايىن دا بىلمەيمىن. ءبىراز اداسىپ كەتىپ, ۋاقىت جوعالتىپ الدىق. ءساتىن سالعاندا, قوستانايدا پوليتسيانىڭ پاترۋلدىك كولىگى كەزدەسىپ قالىپ, بىردەن كومەك كورسەتتى, – دەيدى جۇرگىزۋشى قىز.
پوليتسيا لەيتەنانتتارى مەيرام كارىمباەۆ پەن اماندىق ابىلعازين كوپ ويلانباستان ەكى كەلىنشەك مىنگەسكەن كولىككە مەديتسينالىق مەكەمەگە دەيىن جول كورسەتىپ اكەلەدى. پەرزەنتحانانىڭ قابىلداۋ بولىمىنە دەيىن كىرگىزىپ, اياعى اۋىر كەلىنشەكتى اۋرۋحانا دارىگەرلەرىنىڭ قولىنا تابىستايدى.
كوپ كەشىكپەي ءتارتىپ ساقشىلارىنا جاس بوسانعان انانىڭ ءوزى قوڭىراۋ شالىپ, ۇلدى بولعانىن حابارلايدى. اپالى-سىڭلىلەر ەندى پوليتسيا دەپارتامەنتىنىڭ باسشىلىعىنا حات جازىپ, وزدەرى قىسىلعان ساتتە كومەككە كەلىپ, قول ۇشىن سوزعان ەكى لەيتەنانتتى ماراپاتتاپ, وزدەرىنىڭ العىستارىن جەتكىزۋدى ءوتىنىپ وتىر.
قوستاناي وبلىسى
