پرەزيدەنت جانىنداعى ورتالىق كوممۋنيكاتسيالار قىزمەتىندە دەنساۋلىق سالاسى بويىنشا جوعارى وقۋ ورىندارى باسشىلارىنىڭ ءباسپاسوز ءماسليحاتى ۇيىمداستىرىلدى. جيىندى دەنساۋلىق ساقتاۋ ۆيتسە-ءمينيسترى ەرىك ءبايجۇنىسوۆ جۇرگىزدى.
پرەزيدەنت جانىنداعى ورتالىق كوممۋنيكاتسيالار قىزمەتىندە دەنساۋلىق سالاسى بويىنشا جوعارى وقۋ ورىندارى باسشىلارىنىڭ ءباسپاسوز ءماسليحاتى ۇيىمداستىرىلدى. جيىندى دەنساۋلىق ساقتاۋ ۆيتسە-ءمينيسترى ەرىك ءبايجۇنىسوۆ جۇرگىزدى.
11 قازاندا وتكەن ۇكىمەتتىڭ كەڭەيتىلگەن وتىرىسىندا ەلباسى دەنساۋلىق ساقتاۋ سالاسىن سىنعا العان بولاتىن. سوندا سالاداعى وزەكتى ماسەلەلەردىڭ ءبىرى رەتىندە مامانداردىڭ جەتىسپەۋشىلىگى اتالعان-دى. كەشەگى جيىندا نەگىزىنەن مەديتسينا ماماندارىن دايارلاۋ ماسەلەسى تاقىرىپقا ارقاۋ بولدى. «دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنە سەنسەك, مامان جەتىسپەۋشىلىگى دۇنيەجۇزى بويىنشا وزەكتى ماسەلەلەردىڭ قاتارىندا. الەمدە 4,5 ميلليونداي مەديتسينالىق قىزمەتكەر جەتىسپەيدى. ءبىزدىڭ ەلىمىز دارىگەرلەرمەن قامتىلۋ بويىنشا الەمدە 10-ورىندا تۇر. ياعني, 10 مىڭ تۇرعىنعا شاققاندا 39 دارىگەردەن كەلەدى», – دەدى ۆيتسە-مينيستر.
ۆيتسە-ءمينيستردىڭ ايتۋىنشا, ماماندار جەتىسپەۋشىلىگى ماسەلەسىن شەشۋ ءۇشىن مەديتسينالىق جوعارى وقۋ ورىندارىنا ستۋدەنتتەر قابىلداۋ كولەمى ارتتىرىلۋدا. ايتالىق, 2007 جىلى مەديتسينالىق جوعارى وقۋ ورىندارىنا 4 مىڭ ستۋدەنت, 2008 جىلى 4500 ستۋدەنت, 2009 جىلى 5 مىڭ ستۋدەنت قابىلدانعان. 2007 جىلدان باستاپ مەملەكەتتىك ءبىلىم بەرۋ گرانتى شەڭبەرىندە اۋىل جاستارى ءۇشىن 30 پايىز كۆوتا قاراستىرىلعان. ولار وقۋلارىن تامامداعان سوڭ (2014 جىلدان باستاپ) مىندەتتى تۇردە اۋىلدا 3 جىل جۇمىس ىستەۋلەرى كەرەك. 2011 جىلى «ءبىلىم تۋرالى» زاڭعا مەملەكەتتىك تاپسىرىسپەن وقىعان تۇلەكتەر 2019 جىلدان باستاپ جوو-دان كەيىن 3 جىل مىندەتتى تۇردە دەنساۋلىق ساقتاۋ ۇيىمدارىندا جۇمىس ىستەۋ كەرەكتىگى تۋرالى وزگەرىس ەنگىزىلگەن.
ە.ءبايجۇنىسوۆ وعان قوسا سالاداعى مامان تاپشىلىعى ماسەلەسىن مەديتسينالىق قىزمەتكەرلەردىڭ ايلىق جالاقىلارىن ارتتىرۋ ارقىلى شەشۋگە بولاتىنىن, بۇل ءۇشىن مۇددەلى ورگاندارمەن بىرلەسىپ جۇمىس ىستەيتىندىكتەرىن مالىمدەدى.
جيىندا ءسوز العان قازاق ۇلتتىق مەديتسينا ۋنيۆەرسيتەتىنىڭ رەكتورى ايقان اقانوۆ ءوزى باسقاراتىن ءبىلىم ورداسىندا سوڭعى 5-7 جىلدان بەرى وزگەرىستەر بولىپ جاتقانىن, ناتيجەسىندە 2014 جىلى وقۋ بىتىرەتىن تۇلەكتەر حالىقارالىق ستاندارتقا سايكەس ماماندار بولىپ شىعاتىنىن باياندادى. ول مەديتسينالىق ءبىلىم بەرۋدىڭ ساپاسىن قامتاماسىز ەتەتىن نەگىزگى فاكتورلار رەتىندە ءبىلىم بەرۋ باعدارلامالارىن, وقىتۋشى-پروفەسسورلار الەۋەتىن, ماتەريالدىق-تەحنيكالىق بازانى, ۇزدىك ستۋدەنتتەردى تاڭداي ءبىلۋ مەن ءبىلىم-داعدىنى تاۋەلسىز باعالاۋدى اتادى. جاڭا جۇيە بويىنشا ستۋدەنتتەر بولاشاقتا كىم بولاتىنىن (حيرۋرگ, گينەكولوگ, ەندوكرينولوگ, ت.ب) 1-كۋرستا انىقتايدى. سونداي-اق, ستۋدەنتتەردىڭ شەت مەملەكەتتەردە تاجىريبە الۋى جولعا قويىلعان. «سوڭعى 4 جىلدىڭ ىشىندە الەمنىڭ 40 شاقتى مەملەكەتىنەن 400-گە جۋىق پروفەسسورلار شاقىردىق. ولار ءبىزدىڭ ستۋدەنتتەرگە ءدارىس وقىدى. سايكەسىنشە, ءوز وقىتۋشىلارىمىزعا دا الەمنىڭ بىرقاتار ەلدەرىنەن سۇرانىس ءتۇستى. ءبىزدىڭ ماماندار دا وزگە ەلدەردە ءدارىس وقۋ ءمۇمكىندىكتەرىن يەلەندى. ءبىز مۇمكىندىگىنشە زامانا تالابىنا جاۋاپ بەرە الاتىنداي دارىگەرلەردى دايارلاۋعا تىرىسىپ جاتىرمىز», – دەدى رەكتور.
سەمەيدەگى مەملەكەتتىك مەديتسينا ۋنيۆەرسيتەتىنىڭ رەكتورى تولەباي راقىپبەكوۆ كەلەشەكتە دارىگەر بولاتىن ستۋدەنتتەردىڭ ۋنيۆەرسيتەت قابىرعاسىندا ءجۇرىپ قازاق, ورىس, اعىلشىن تىلدەرىن جاقسى مەڭگەرۋلەرى كەرەكتىگىن العا تارتتى. «ويتكەنى, قازاقستان كوپەتنوستى مەملەكەت. حالىقتىڭ باسىم بولىگى قازاق جانە ورىس تىلدەرىندە سويلەيدى. كوپتەگەن مەديتسينالىق ادەبيەتتەر مەن زاماناۋي تەحنيكالار ەۋروپا ەلدەرىندە شىعارىلاتىندىقتان, اعىلشىن ءتىلىن ءبىلۋ دە وتە ماڭىزدى. مەديتسينادا كۇن سايىن جاڭالىق اشىلادى. ولاردىڭ باسىم كوپشىلىگى اعىلشىن تىلىندە جاريالانادى. دارىگەر بولامىن دەيتىن جاس سول جاڭالىقتاردان حاباردار بولىپ وتىرۋى ءتيىس. وزدەرىڭىز بىلەسىزدەر, ناۋقاستى ەمدەۋ ءۇشىن دارىگەردىڭ جانى دا, ارى دا تازا بولۋى كەرەك. ناۋقاستارمەن ءتىل تابىسا بىلۋلەرى قاجەت. سوندىقتان دارىگەر دايارلاۋ وتە جاۋاپتى مىندەت», – دەدى تولەباي راقىپبەكوۆ.
ناۋقاستاردىڭ 80 پايىزى العاشقى مەديتسينالىق سانيتارلىق كومەككە جۇگىنەدى. 20 پايىزى عانا اۋرۋحاناعا جاتقىزىلادى. سوندىقتان دا العاشقى مەديتسينالىق-سانيتاريالىق كومەك سالاسىن دامىتۋعا ايرىقشا ماڭىز بەرىلۋى كەرەك, وسى سالاداعى مامانداردى كوبەيتۋ كەرەك. رەكتوردىڭ ايتۋىنشا, امسك-نى قارجىلاندىرۋ ۇلەسى وسى كەزدە 14 پايىز. ال, 2020 جىلعا قاراي بۇل سالانى قارجىلاندىرۋ 40 پايىزعا دەيىن جەتەدى.
ايتا كەتەيىك, مەديتسينالىق جوعارى وقۋ ورىندارىنا تۇسەتىن ابيتۋريەنتتەرگە قويىلاتىن تالاپ جىلدان-جىلعا كۇشەيىپ كەلەدى. قازىر مەديتسينالىق جوعارى وقۋ ورنىنا ءتۇسۋدىڭ شەكتى بالى – 55. الداعى ۋاقىتتا ونى 60 بالعا دەيىن كوتەرۋ جوسپارلانۋدا.
ايگۇل سەيىلوۆا,
«ەگەمەن قازاقستان».
