ۆەتنام استاناسى حانوي قالاسىندا قازاقستان-ۆەتنام ساۋدا ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسياسىنىڭ التىنشى ءماجىلىسى بولىپ ءوتتى, دەپ حابارلادى قر ءسىم-ءىنىڭ ءباسپاسوز قىزمەتى.
ۆەتنام استاناسى حانوي قالاسىندا قازاقستان-ۆەتنام ساۋدا ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسياسىنىڭ التىنشى ءماجىلىسى بولىپ ءوتتى, دەپ حابارلادى قر ءسىم-ءىنىڭ ءباسپاسوز قىزمەتى.
قازاقستان دەلەگاتسياسىنا ەلىمىز سىرتقى ىستەر ءمينيسترىنىڭ ورىنباسارى قايرات سارىباي, ۆەتنام دەلەگاتسياسىنا وسى ەل ونەركاسىپ جانە ساۋدا ءمينيسترىنىڭ ورىنباسارى لە زىونگ كۋانگ باسشىلىق جاسادى.
شارا بارىسىندا تاراپتار قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ 2011 جىلى حانويعا, ۆەتنام پرەزيدەنتى چىنوگ تان شانگانىڭ 2012 جىلى استاناعا ساپارلارى بارىسىندا قول جەتكىزىلگەن ۋاعدالاستىقتاردىڭ ورىندالۋ جاعدايى, سونداي-اق, قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىنداعى 2011-2013 جىلدارعا ارنالعان بىرلەسكەن ءىس-قيمىل جوسپارى تالقىلاندى.
ۇكىمەتارالىق كوميسسيانىڭ وتىرىسىنا قاتىسۋشىلار ساياسي جانە ساۋدا-ەكونوميكالىق سالالارداعى ىنتىماقتاستىق ماسەلەلەرى بويىنشا پىكىر الماسىپ, كەدەن ءىسى, اۋىل شارۋاشىلىعى, ءبىلىم بەرۋ, دەنساۋلىق ساقتاۋ, مادەنيەت, تۋريزم جانە سپورت سالالارىنداعى ىنتىماقتاستىقتى دامىتۋدىڭ مۇمكىندىكتەرىن قاراستىردى جانە ءوزارا ساۋدا-ساتتىق كولەمىنىڭ جوعارى ءوسۋ قارقىنىن قاناعات سەزىمىمەن اتاپ ءوتتى. ەكى ەل اراسىنداعى تاۋار اينالىمى بيىلعى جىلدىڭ توعىز ايىندا وتكەن جىلدىڭ سايكەس كەزەڭىمەن سالىستىرعاندا 2,4 ەسەگە وسكەن.
كەلىسسوزدەر قورىتىندىلارى بويىنشا تاراپتار ۇكىمەتارالىق كوميسسيانىڭ التىنشى ءماجىلىسىنىڭ حاتتاماسىنا قول قويدى. قۇجاتتا ىنتىماقتاستىقتىڭ بۇعان دەيىنگى كەلىسىمدىك-قۇقىقتىق بازالارىن ودان ءارى دامىتۋ تۋرالى ۋاعدالاستىقتاردى قوسا العاندا, باسقا دا باسىم باعىتتار ناقتىلانعان. ونىڭ ىشىندە بانكارالىق ءوزارا ءىس-قيمىل جونىندەگى بىرلەسكەن جۇمىس توبىن قۇرۋ تۋرالى دا كەلىسىم بار.
قازاقستان دەلەگاتسياسىنىڭ باسشىسى, سونداي-اق, ۆەتنام سىرتقى ىستەر ءمينيسترىنىڭ ورىنباسارى نگۋەن فىن نامەن كەزدەسۋ وتكىزدى. كەزدەسۋ كەزىندە بۇۇ, اوسشك, اسەان جانە باسقا دا حالىقارالىق ۇيىمدار شەڭبەرىندەگى ەكىجاقتى ساياسي ۇنقاتىسۋلار مەن ءوزارا ءىس-قيمىلداردى ىلگەرىلەتۋدىڭ ماڭىزى ۇلكەن ەكەنى اتاپ كورسەتىلدى. تاراپتار ەكى ەلدىڭ ورتالىق جانە وڭتۇستىك-شىعىس ازيا وڭىرلەرىندەگى ماڭىزدى ارىپتەستەر رەتىندەگى ءرولى جوعارى ەكەنىن قۋاتتادى.
