قاتەلىكتەر قاتەرلى دەرتتى اسقىندىرادى
دەنساۋلىق ساقتاۋ مينيسترلىگىنىڭ مالىمەتىنشە, ەلىمىزدە Covid-19 جۇقتىرعان 108 901 ادام تىركەلگەن. سوڭعى تاۋلىكتە 70 ازاماتتان پتر ارقىلى ىندەت انىقتالدى. سونداي-اق 162 ادام كوروناۆيرۋستان ەمدەلىپ شىقتى. جالپى جازىلعاندار سانى – 104 203. وتكەن تاۋلىكتە كوروناۆيرۋس بەلگىلەرى بار پنەۆمونيانىڭ 4 جاعدايى جانە 2 ءولىم جاعدايى تىركەلدى. وعان قوسا 10 ادام ەمدەلىپ شىقتى. 1 تامىزدان باستاپ اۋىرعاندار 34 913 بولسا, ونىڭ ىشىندە 370 ءولىم جاعدايى تىركەلدى, ال جازىلىپ شىققانداردىڭ سانى 27 709-عا جەتتى.
جاعدايدىڭ تۇراقتانعانىنا قاراماستان كارانتين شارالارىنان ءبىز كۇتكەن ناتيجە بولماي وتىر. ناۋقاستار سانى قايتادان وسۋدە. ازاماتتار سانيتارلىق دارىگەردىڭ ايتقان تالاپتارىن ورىنداماسا, تاعى دا قاتاڭ كارانتين رەجىمىنە ورالۋىمىز ابدەن مۇمكىن.
نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇرات ۇلى اۋرۋ قايتالانعان جاعدايدا ەلوردانىڭ مەديتسينالىق دايىندىعى جوعارى ەكەنىن ايتا كەلىپ, العاشقىداعى قاتەلىكتەر قايتالانباۋى ءۇشىن جۇيەلى جۇمىستار اتقارىلىپ جاتقانىن العا تارتتى.
«ەڭ ءبىرىنشى ماقسات – العاشقى مەديتسينالىق سانيتارلىق كومەك كورسەتۋ ۇيىمدارىنىڭ جۇمىس ساپاسىن ارتتىرۋ. بۇل باعىتتا جۇمىس ىسكە اسىرىلىپ جاتىر. ەگەر ادامنىڭ دەنە تەمپەراتۋراسى كوتەرىلسە, قىزۋ, جوتەل بايقالسا, ءبىرىنشى ەمحاناداعى مەديتسينالىق كومەككە نەمەسە جەدەل جاردەم قىزمەتىنە جۇگىنەدى. وسىلايشا وسى ەكەۋىنىڭ اراسىنداعى ءوزارا ارەكەتتەسۋدى قامتاماسىز ەتۋ ءۇشىن ارنايى الگوريتم بەكىتىلدى. ناۋقاس وسى ەكى كەزەڭدە مەديتسينالىق كومەككە جۇگىنگەن كەزدە ونىڭ دەنساۋلىق جاعدايىنا باعا بەرۋ باستى نازارعا الىنادى. كەرەك بولسا, ونى اۋرۋحاناعا جاتقىزۋ نەمەسە العاشقى مەديتسينالىق سانيتارلىق كومەك ۇيىمدارىندا مەديتسينالىق كومەك كورسەتۋ, ءدارى-دارمەكپەن قامتاماسىز ەتىپ, ءۇي جاعدايىندا ەمدەپ شىعۋ ماڭىزدى. وسىنداي شارالاردى قولدانۋدىڭ سەبەبى نەدە؟ باستاپقىدا ناۋقاسقا ءتيىستى مەديتسينالىق كومەك كورسەتىلمەي, اۋرۋدىڭ اسقىنۋىنا جول بەرسەك, ءبىزدىڭ تاراپىمىزدان ۇسىنىلعان توسەكتىك ورىندار, مەديتسينالىق ۇيىمداردى قامتاماسىز ەتكەن مەديتسينالىق جابدىقتاردىڭ ءمانى بولمايدى. ءبىز ولاي مەديتسينا جۇيەسىنىڭ ساپاسىن ارتتىرا المايمىز. بۇگىندە قالادا كوروناۆيرۋس ينفەكتسياسىنا ارنالعان بيوماتەريالداردى زەرتتەۋگە ارنالعان 13 زەرتحانا بار. زەرتحانالاردىڭ جالپى قۋاتتىلىعى تاۋلىگىنە 7 مىڭ سىناققا دەيىن جەتەدى. قازىرگى ۋاقىتتا 423 مىڭ زەرتتەۋ جۇرگىزىلدى, وعان قوسا 162 مىڭعا جۋىق سىناق بار. جالپى قۋاتتىلىعى تاۋلىگىنە 1 440 سىناقتان تۇراتىن 9 يزوتەرميالىق زەرتحانالىق كەشەن ساتىپ الۋ جوسپارلانۋدا», دەيدى باسقارما باسشىسى.
جۇيەلى جۇمىستار جۇرگىزىلىپ جاتىر
كوروناۆيرۋس ينفەكتسياسى قايتالانعان جاعدايدا نۇر-سۇلتان قالاسىنىڭ اكىمدىگى كۇزگى-قىسقى كەزەڭگە دايىندىق جۇمىستارىن تولىقتاي جۇرگىزگەن.
«ىندەتتىڭ كۇزگى-قىسقى كەزەڭىندە الدىن الۋ جانە ەمدەۋ بويىنشا ءىس-شارالار جوسپارى بەكىتىلدى. سيمپتومسىز جانە COVID-19 جەڭىل تۇردە وتەتىن جانە ولارمەن بايلانىستا بولعان ادامداردىڭ دەنساۋلىعىن قاشىقتان باسقارۋ جۇمىستارى ەمحانالاردا جالعاسادى. سونداي-اق ءبىز ءموبيلدى بريگادالاردىڭ سانىن 207-گە دەيىن جەتكىزدىك. جەدەل رەسپيراتورلىق اۋرۋلارمەن اۋىراتىن ناۋقاستاردى قابىلداۋعا ارنالعان فيلتر بولمەلەر, العاشقى مەديتسينالىق-سانيتارلىق كومەك دەڭگەيىندە ناۋقاستارعا مەديتسينالىق كومەك كورسەتۋ الگوريتمى ازىرلەندى جانە ول جرۆي, كۆي ناۋقاستاردى كەزەڭ-كەزەڭىمەن باعىتتاۋدى قامتيدى. جاسالعان الگوريتم سالالىق رەسۋرستاردى ۇتىمدى پايدالانۋ جانە ءبىرىنشى تولقىن كەزىندە تۋىنداعان كەلەڭسىز جاعدايلاردى بولدىرماۋعا مۇمكىندىك بەرەرى ءسوزسىز», دەدى ت.مۇرات ۇلى.
اۋىرلىق دارەجەسى بويىنشا ازاماتتاردىڭ اعىنىن جىكتەۋ ماقساتىندا قالالىق جەدەل جاردەم ستانساسى بازاسىندا احۋالدىق ورتالىق ۇيىمداستىرىلعان. 103 پۋلتىنە تۇسكەن قوڭىراۋلاردى ءبولۋ مەحانيزمى 103-ءتىڭ Chatbot جۇيەسى (Telegram) ارقىلى قوڭىراۋلاردى قابىلداۋ جۇمىسى جالعاسىپ كەلەدى. بارلىعى 2,5 مىڭنان اسا قوڭىراۋ تۇسكەن, پاندەميانىڭ شارىقتاۋ ۋاقىتىندا تاۋلىگىنە 200 قوڭىراۋ بولعان.
قاجەت بولعان جاعدايدا قىزمەت كورسەتەتىن جەدەل جاردەم بريگادالارىنىڭ سانىن بمسك ۇيىمدارىندا 70 بريگاداعا دەيىن, ستانسا دەڭگەيىندە 100 بريگاداعا دەيىن (بارلىعى 170 بريگادا) ارتتىرۋ ويلاستىرىلعان. نۇر-سۇلتان قالاسىنىڭ اكىمدىگى مەن قوعامدىق دەنساۋلىق ساقتاۋ باسقارماسى كوروناۆيرۋستىڭ مۇمكىن دەگەن ەكىنشى تولقىنىنىڭ كۇزگى-قىسقى كەزەڭىنە دايىندىق جۇمىستارىن تولىقتاي جۇرگىزىپ جاتىر. وسىلايشا كوروناۆيرۋس ينفەكتسياسىمەن كۇرەسۋدىڭ 3 كەزەڭدى جوسپارى قۇرىلدى. ءبىرىنشى كەزەڭدە مەديتسينالىق ۇيىمدار بازاسىندا 1 645 توسەكتىك ورىن ورنالاستىرۋ جوسپارلانۋدا. سونىمەن قاتار كوپسالالى مەديتسينالىق ۇيىمدار شۇعىل جانە جوسپارلى تۇردە ەمدەۋگە جاتقىزىلاتىن ناۋقاستاردى قابىلداۋدى جالعاستىرادى. ەكىنشى كەزەڭ بىرقاتار رەسپۋبليكالىق كلينيكادا قوسىمشا 1 919 كەرەۋەت ورنالاستىرۋدى قاراستىرادى. ءۇشىنشى كەزەڭدە 2 500 توسەكتىك ورنىمەن ينفەكتسيالىق اۋرۋحانالاردىڭ جۇكتەمەسىن قاراستىرۋ (70%): 2 090 توسەكتىك ورىنعا ارنالعان قوسىمشا نىسان تارتىلادى. مۇنىڭ بارلىعى 5 600-گە دەيىن جۇقپالى توسەكتىك ورىن ورنالاستىرۋعا مۇمكىندىك بەرەدى, ونىڭ 441-ءى رەانيماتسيالىق بولىپ قولدانىلادى. بۇگىنگى تاڭدا اۋرۋحانالار وكپەنى جاساندى جەلدەتۋ اپپاراتى قۇرىلعىلارىمەن (434 جەلدەتۋ قۇرىلعىسى) تولىقتاي قامتىلعان, سونداي-اق 19 كومپيۋتەرلىك توموگراف, 27 رەنتگەن اپپاراتى, 583 وتتەگى كونتسەنتراتورى جانە شامامەن 1 584 وتتەگى نۇكتەسى بار.
قازىر ەلوردادا ساقتىق شارالارىنا بارىنشا كوڭىل ءبولىنىپ, جەر-جەردە ءتيىستى تالاپتاردىڭ ورىندالۋى قاتاڭ قاداعالانۋدا. وسى رەتتە بالالاردىڭ اماندىعى ءۇشىن مەكتەپتەردەگى جاعداي دا ءجىتى نازاردا تۇر. جاقىندا نۇر-سۇلتان قالاسىنىڭ باس سانيتارلىق دارىگەرى جاننا پراليەۆا ەلوردا مەكتەپتەرىنە جۇرگىزىلگەن مونيتورينگتىڭ ناتيجەسىن جاريا ەتتى.
ونىڭ ايتۋىنشا, قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى ءبىلىم بەرۋ نىساندارىندا كارانتين شارالارىنىڭ ساقتالۋىنا مونيتورينگ جۇرگىزدى. قالادا بارلىعى 91 جالپى ءبىلىم بەرەتىن مەكتەپ, ونىڭ ىشىندە 78 مەملەكەتتىك, 12 جەكەمەنشىك جانە
1 مامانداندىرىلعان مەكتەپ بار. ونىڭ بارىنە تۇگەل مونيتورينگ جۇرگىزىلدى. مونيتورينگ بارىسىندا 31 مەكتەپتە (34,0%) ەرەجە بۇزۋشىلىقتار انىقتالدى. مەكتەپ ديرەكتورىنىڭ ءوزى جانە وقىتۋشىلار قۇرامى, سونداي-اق وقۋشىلاردىڭ اتا-انالارى ماسكا تاعۋ تالاپتارىن ساقتاماعان. مەكتەپتەردىڭ بىرىندە ديرەكتور اكىمشىلىك جاۋاپكەرشىلىككە تارتىلدى.
سونىمەن قاتار باس سانيتار كوروناۆيرۋسقا قاتىستى تالاپتار ساقتالماسا, وندا قاتاڭ كارانتيندىك شارالاردىڭ قايتا قابىلدانۋى مۇمكىن ەكەنىن ەسكە سالدى.
«ەسەپتى كەزەڭدە فارماتسەۆتيكالىق كومپانيالار قىزمەتىنىڭ مونيتورينگى ناتيجەلەرى بويىنشا 102 سۋبەكت تىركەلمەگەن دارىلىك پرەپاراتتى ساتۋ جانە ءدارى-دارمەكتەرگە بەلگىلەنگەن شەكتى رۇقسات ەتىلگەن باعادان اسىپ كەتۋ فاكتىلەرى بويىنشا اكىمشىلىك جاۋاپكەرشىلىككە تارتىلدى. بۇعان دەيىن دارىگەرلەر مەن ماماندار بىرنەشە رەت تۇرعىنداردى ماسكا تاعۋ, الەۋمەتتىك قاشىقتىقتى ساقتاۋ, ادامدار كوپ جينالاتىن جەرلەرگە بارۋدى شەكتەۋ تۋرالى قاراپايىم تالاپتاردى ورىنداۋعا ۇندەۋ جاسادى. بىراق ءبارىمىز كورىپ وتىرعانىمىزداي, بۇل تالاپتار ەلەنبەيدى جانە ساقتالمايدى. ەگەر وسىلاي جالعاسا بەرسە, جالپى قالا بويىنشا كۆي اۋرۋىنىڭ وسۋىنە اكەلۋى مۇمكىن. ءبىز بەلگىلى ءبىر قىزمەت تۇرلەرىن توقتاتا وتىرىپ, قاتاڭ شەكتەۋ جانە كارانتين شارالارىن قايتا ەنگىزۋگە ءماجبۇر بولامىز. وسىعان بايلانىستى تاعى دا قالا تۇرعىندارى مەن قوناقتارىن شىدامدىلىققا, سانيتارلىق ەرەجەلەردى ساقتاۋعا شاقىرامىن. سەبەبى ۆيرۋستىڭ تارالۋى جالعاسۋدا», دەدى ەلوردانىڭ باس سانيتارى.
ساقتىققا سەلقوس قاراعاندارعا ايىپپۇل سالىنۋدا
ەلوردادا كارانتين رەجىمىن بۇزعانداردى انىقتاۋ ءۇشىن پوليتسيا جانە تاۋارلار مەن كورسەتىلگەن قىزمەتتەردىڭ قاۋىپسىزدىگىن باقىلاۋ باسقارماسى قىزمەتكەرلەرىنىڭ قاتىسۋىمەن ءموبيلدى توپتار رەيد وتكىزەدى. سونىڭ ناتيجەلەرى بويىنشا باس سانيتارلىق دارىگەردىڭ قاۋلىسىن ساقتاماعان فاكتىلەر تىركەلدى.
ماسەلەن, نۇر-سۇلتان قالاسىنىڭ سارىارقا اۋدانىندا «داۋلەت» ساۋدا ۇيىندە مونيتورينگتىك تەكسەرۋ كەزىندە تەرمومەتر مەن دەزينفەكتسيالىق كىلەمشە بولماعان, ال جالعا الۋشىلار ماسكا تاعۋ رەجىمىن ساقتاماعان. «زاباۆا» دۇكەنىندە دە تەرمومەتر بولماعان. وسى ساۋدا نىساندارىنا ءتۇسىندىرۋ جۇمىستارى جۇرگىزىلدى.
بايقوڭىر اۋدانىنىڭ بىرنەشە كومپيۋتەرلىك كلۋبتارىندا, جوندەۋ پۋنكتتەرىندە, دۇكەندەرىندە, مونشالارى مەن كافەلەرىندە وسىنداي بۇزۋشىلىقتار انىقتالدى. ولاردىڭ يەلەرىنە تۇسىنىكتەمەلەر بەرىلىپ, ايىپپۇل سالىندى.
«بايقوڭىر اۋدانى باسقارماسىندا كۇندەلىكتى رەيدتەر جۇرگىزەمىز. كەيبىر سۋبەكتىلەر ەكى-ءۇش رەت جاۋاپقا تارتىلدى. ناتيجەسىندە ولاردىڭ جۇمىسى توقتاتىلدى. كۇن سايىن ءبىز 10-نان اسا قۇقىقبۇزۋشىلىقتى انىقتايمىز, قۇجاتتار جينايمىز, تۇسىندىرمە الامىز جانە سەس-كە جىبەرەمىز. ەكى-ءۇش كۇن ىشىندە ولار ءتارتىپ بۇزۋشىلاردى شاقىرادى, حاتتامالاردى تولتىرادى جانە ايىپپۇل سالادى. مۇنداي رەيدتەر تاڭعى 4-5-كە دەيىن جالعاسادى. جۇرگىزىلگەن جۇمىستار ارقىلى بۇگىندە قۇقىقبۇزۋشىلىقتار سانى ازايدى», دەدى بايقوڭىر اۋداندىق پوليتسيا باسقارماسى باستىعىنىڭ ءبىرىنشى ورىنباسارى قۇربان تاڭعىشباەۆ.
پوليتسەيلەر كارانتين ءتارتىبىن بۇزۋشىلاردى انىقتاپ, ولاردى جاۋاپكەرشىلىككە تارتا وتىرىپ, كاسىپكەرلىك سۋبەكتىلەرى بويىنشا كۇندەلىكتى تۇنگى جانە كۇندىزگى رەيدتەر جۇرگىزەدى. سونىمەن قاتار دەمالىس كۇندەرى پوليتسەيلەر ازاماتتارمەن كوروناۆيرۋس ينفەكتسياسىنىڭ تارالۋىنا جول بەرمەۋ بويىنشا ءتۇسىندىرۋ جۇمىستارىن جۇرگىزۋدى جالعاستىرۋدا.
ءبىر تاۋلىك ىشىندە نۇر-سۇلتان قالاسىنىڭ پوليتسيا قىزمەتكەرلەرى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ وكىلدەرىمەن بىرلەسىپ, 141 كاسىپكەرلىك وبەكتىسىن تەكسەرىپ, 70 كارانتين بۇزۋشىلىقتى انىقتادى. بارلىق ءتارتىپ بۇزۋشى قر اقبتك-ءنىڭ 425-بابى بويىنشا اكىمشىلىك جاۋاپكەرشىلىككە تارتىلدى.
سونداي-اق ەلوردادا كوروناۆيرۋس ينفەكتسياسىنىڭ تارالۋىن بولدىرماس ءۇشىن حالىقپەن جۇمىس جۇرگىزىلۋدە. بارلىق ازامات ماسكا تاعۋ, سانيتايزەرلەردى پايدالانۋ جانە الەۋمەتتىك قاشىقتىقتى ساقتاۋى قاجەت.
ءيا, باس شاھاردا كارانتين شارالارىنىڭ ساقتالۋىن قاداعالاۋ كۇشەيتىلىپ جاتىر. تالاپتارعا سايكەس كەلمەگەن شاعىن جانە ورتا كاسىپكەرلىك سۋبەكتىلەرى جابىلۋى مۇمكىن. «مەيرامحانالار, كافەلەر, ساۋدا ورتالىقتارى جانە باسقا كاسىپكەرلىك سۋبەكتىلەرى مەن شوب سانيتارلىق نورمالاردى ساقتاماعان جاعدايدا, ءبىز كارانتيندى قايتا ەنگىزۋگە ءماجبۇر بولامىز», دەپ حابارلادى اكىمدىك.
ءموبيلدى توپتار ساۋدا جانە ويىن-ساۋىق ورىندارىنا كۇندەلىكتى رەيدتى كۇشەيتتى. ەلوردا تۇرعىندارى مەن قوناقتارى ماسكا تاعۋ ءتارتىبىن قاتاڭ ساقتاۋى كەرەك. 5 شىلدەدەن باستاپ كارانتين ءتارتىبىن بۇزعان ەلوردا تۇرعىندارى مەن كاسىپكەرلەرگە جالپى سوماسى 128 665 848 تەڭگەگە 587 ايىپپۇل سالىندى. ونىڭ ىشىندە جەكە تۇلعالارعا – 12 809 358 تەڭگە مولشەرىندە 267 ايىپپۇل, كاسىپكەرلىك سۋبەكتىلەرىنە – 115 856 490 تەڭگە مولشەرىندە 320 ايىپپۇل. كارانتيندى ورەسكەل بۇزۋشىلار – نەگىزىنەن تىيىم سالىنعانىنا قاراماستان ءوز قىزمەتىن جۇزەگە اسىرعان تاماقتانۋ ورىندارى, ازىق-ت ۇلىك دۇكەندەرى, تۇنگى كلۋبتار يەلەرى. ەڭ ورەسكەل بۇزۋشىلار – «الۋا» كافەسى (مۇستافينا ك-ءسى, 38), Dorffman سىرا كلۋبى, «تەكيلا» لاۋندج-بارى (جەكە باتىر ك-ءسى, 49), سونداي-اق سۇلۋلىق سالوندارى مەن ازىق-ت ۇلىك دۇكەندەرى.
سونىمەن قاتار 102 فارماتسەۆتيكالىق كومپانيانىڭ قىزمەتىنە جۇرگىزىلگەن مونيتورينگ ناتيجەلەرى بويىنشا تىركەۋدەن وتپەگەن ءدارى-دارمەكتەردى ساتقانى جانە ءدارى-دارمەك باعاسىنىڭ شەكتەۋلەرىن بۇزعانى ءۇشىن 29 فارماتسەۆتيكالىق كومپانيا جاۋاپكەرشىلىككە تارتىلىپ, سوتتا ايىپپۇل سالىندى. ايىپپۇلدىڭ جالپى سوماسى 13 864 998 تەڭگەنى قۇرادى.
سونداي-اق قالادا شاعىن جانە ورتا بيزنەس سۋبەكتىلەرىنە كۇندەلىكتى رەيد جالعاسۋدا. وتكەن دەمالىس كۇندەرى پوليتسەيلەر, سەس جانە اكىمدىك وكىلدەرى بازارلار مەن باسقا دا نىسانداردى ارالادى. بەلگىلى بولعانداي, كەيبىر شوب وكىلدەرى كارانتين رەجىمى كۇشەيگەنىنە قاراماستان ءتارتىپ بۇزۋىن تىيار ەمەس. مىسالى, بازارلاردىڭ ءبىرىنىڭ يەلەرى دەمالىس كۇندەرى جۇمىس ۋاقىتىن ساقتاماعانى ءۇشىن ۇلكەن ايىپپۇل تولەدى. تاعى ءبىر ورىندا تەكسەرۋشىلەر كىرەبەرىستە سانيتايزەرلەر ورناتىلماعانىن انىقتادى.
«ساۋدا ۇيلەرى دەمالىس كۇندەرى جۇمىس ىستەمەۋى كەرەك, تەك ءدارىحانالار, قوعامدىق تاماقتانۋ ورىندارى بولسا عانا جۇمىس ىستەۋگە قۇقىلى», دەپ ءتۇسىندىردى بايقوڭىر اۋدانى بويىنشا تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسى باسشىسىنىڭ ورىنباسارى سالتانات ىقىلاسوۆا.
مامانداردىڭ ايتۋىنشا, قازىرگى كەزدەگى نەگىزگى بۇزۋشىلىقتار – جۇمىس رەجىمىن ساقتاماۋ, قوعامدىق تاماقتانۋ ورىندارىندا كەلۋشىلەر سانىنىڭ كوپ بولۋى, ساتىپ الۋشىلار مەن ساتۋشىلار ءۇشىن ماسكانىڭ بولماۋى, الەۋمەتتىك قاشىقتىق ساقتاماۋ, نىساننىڭ كىرەبەرىسىندە انتيسەپتيكتەردىڭ بولماۋى, كەي جەرلەردە كەلۋشىلەر مەن قىزمەتكەرلەردىڭ تەرمومەترياسى جۇرگىزىلمەيدى. سونداي-اق ءجيى كەزدەسەتىن بۇزۋشىلىقتار قاتارىنا بۇقارالىق وتباسىلىق ءىس-شارالاردى, كەزدەسۋلەردى, جيىنداردى وتكىزۋ جاتادى.
9 قازانداعى جاعداي بويىنشا بارلىعى 1 240 راپورت كەلىپ ءتۇستى. ونىڭ 627-ءسى قارالىپ, 133 766 808 تەڭگە كولەمىندە اكىمشىلىك ايىپپۇل سالىندى. ونىڭ ىشىندە 509-ى بويىنشا 110 196 325 تەڭگە ءوندىرىلدى. ءتورت ماتەريال سوتتىڭ قاراۋىنا جىبەرىلدى.
ەگەر قۇقىق بۇزۋشىلىق انىقتالعان جاعدايدا, جەكە تۇلعالارعا 30 اەك (83 340 تەڭگە), زاڭدى تۇلعالارعا – 230-دان 1600 اەك-كە دەيىن (4 ملن 445 مىڭ تەڭگەگە دەيىن) ايىپپۇل سالىنادى. كىناسىن مويىنداعان جاعدايدا, ايىپپۇل 7 كۇن ىشىندە 50% جەڭىلدىكپەن تولەنەدى. 7 كۇن ىشىندە تولەنبەگەن نەمەسە كىناسىن مويىنداماعان جاعدايدا, اكىمشىلىك ايىپپۇل تۋرالى قاۋلى تولىعىمەن شىعارىلىپ, 30 كۇن ىشىندە تولەنەدى.
