ەكونوميكانىڭ, بانك سالاسىنىڭ جاي-كۇيى, رەسپۋبليكالىق بيۋدجەتتىڭ اتقارىلۋى, مەملەكەتتىك ساتىپ الۋداعى جەرگىلىكتى قامتۋ تۋرالى ۇلتتىق ەكونوميكا ءمينيسترى ر. دالەنوۆ, ۇلتتىق بانك توراعاسى ە. دوساەۆ, قارجى ءمينيسترى ە. جاماۋباەۆ, ونەركاسىپ پەن ەنەرگەتيكا سەكتورىنداعى احۋال تۋرالى يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ جانە ەنەرگەتيكا ءمينيسترى ن. نوعاەۆ, اگروونەركاسىپتىك كەشەندەگى جاعداي تۋرالى اۋىل شارۋاشىلىعى ءمينيسترى س. وماروۆ باياندادى.
ەكونوميكانىڭ بازالىق سالالارىندا قابىلدانىپ جاتقان شارالاردىڭ ارقاسىندا توعىز ايدىڭ قورىتىندىسى بويىنشا ءوسۋدىڭ وڭ سەرپىنى ساقتالۋدا. وڭدەۋ ونەركاسىبىندە 3,3%-عا, ونىڭ ىشىندە فارماتسەۆتيكادا 39,8%-عا, دايىن مەتالل بۇيىمدارىن وندىرۋدە 18,9%-عا, ماشينا جاساۋدا 16,6%-عا, ونىڭ ىشىندە اۆتوموبيل جاساۋدا 51,6%-عا, سونداي-اق قاعاز ونىمدەرى وندىرىسىندە 15,1%-عا جانە جەڭىل ونەركاسىپتە 14,1%-عا ءوسىم قامتاماسىز ەتىلدى.
قۇرىلىس كولەمى 10,5%-عا, تۇرعىن ءۇيدى پايدالانۋعا بەرۋ 9%-عا نەمەسە شامامەن 9,6 ملن شارشى مەترگە ۇلعايدى. اۋىل شارۋاشىلىعىندا 5%-عا تۇراقتى ءوسىم قامتاماسىز ەتىلدى, جاقسى ءونىم جينالدى. قر التىن-ۆاليۋتا رەزەرۆتەرى مەن ۇلتتىق قوردىڭ اكتيۆتەرى بيىلعى 1 قىركۇيەكتە $94,1 ملرد-قا دەيىن ۇلعايدى. مەتالل كەنىن (+1,2%) جانە وزگە دە پايدالى قازبالاردى (+0,4%) ءوندىرۋ سەكىلدى تاۋ-كەن سەكتورىنىڭ ماڭىزدى باعىتتارى بويىنشا وڭ ديناميكا ساقتالۋدا. بۇل رەتتە وپەك+ قول جەتكىزىلگەن ۋاعدالاستىقتاردى ورىنداۋ قاجەتتىلىگى جاعدايىندا مۇناي ءوندىرۋدىڭ تومەندەۋى (-3,5%) بايقالادى. قىركۇيەكتە قىزمەت كورسەتۋ سەكتورى بەلسەندى تۇردە جاندانا باستادى – تامىز ايىمەن سالىستىرعاندا, ساۋدا-ساتتىق 2,7%-عا, بايلانىس 1,3%-عا, كولىك جانە قويمالاۋ 1,2%-عا ءوستى. قىزمەت كورسەتۋ سەكتورىنىڭ ءوسۋى شاعىن جانە ورتا بيزنەستىڭ بەلسەندىلىگىن كورسەتەدى, بۇل جاڭا جۇمىس ورىندارىن قۇرۋعا جانە ازاماتتاردىڭ ءال-اۋقاتىن جاقسارتۋعا ىقپال ەتەدى.
«كورسەتكىشتەردىڭ تۇراقتى ءوسۋ ءۇردىسى جالپى ەكونوميكانىڭ قالپىنا كەلۋىن كورسەتەدى», — دەدى ا. مامين.
اقمولا, الماتى, جامبىل, قوستاناي, پاۆلودار, سولتۇستىك قازاقستان وبلىستارى جانە شىمكەنت قالاسى نەگىزگى 7 كورسەتكىشتىڭ 5-ءى بويىنشا الەۋمەتتىك-ەكونوميكالىق دامۋدىڭ ءوسۋىن قامتاماسىز ەتتى. اقتوبە, قاراعاندى, ماڭعىستاۋ, تۇركىستان, شىعىس قازاقستان وبلىستارىندا, نۇر-سۇلتان جانە الماتى قالالارىندا 4 كورسەتكىش بويىنشا وڭ ديناميكاعا قول جەتكىزىلدى. مۇناي-گاز سەكتورىنداعى ءوندىرىستىڭ تومەندەۋىنە بايلانىستى ارتتا قالعان وڭىرلەر اراسىندا قىزىلوردا, اتىراۋ جانە باتىس قازاقستان وبلىستارى بار.
«جالپى, قازاقستان ەكونوميكاسى پاندەميا مەن جاھاندىق ەكونوميكالىق داعدارىستىڭ ەلەۋلى اسەرىنە قاراماستان, ناقتى سەكتوردا دا, قىزمەت كورسەتۋ سالاسىندا دا كورسەتكىشتەردىڭ ءوسۋىن كورسەتۋدە», — دەدى ا. مامين.
ۇكىمەت باسشىسى وڭىرلەردىڭ اكىمدەرىنە مەملەكەت باسشىسى العا قويعان بارلىق مىندەتتەردى ءتيىمدى ىسكە اسىرۋدى قامتاماسىز ەتۋ ءۇشىن جۇمىستى جانداندىرۋدى تاپسىردى.
«بيۋدجەتتىڭ كىرىس بولىگىنە قاتىستى جىل سوڭىنا دەيىن بەكىتىلگەن جوسپاردىڭ 100% ورىندالۋىنا قول جەتكىزۋ قاجەت. قازىرگى جاعدايلاردا بيۋدجەتتىڭ اتقارىلۋى تۇرعىسىنان ورتالىق جانە جەرگىلىكتى ورگانداردىڭ باسشىلارى جىل سوڭىنا دەيىن ءتيىمدى جانە ۋاقىتىلى يگەرۋدى قامتاماسىز ەتۋى ءتيىس. جىل سوڭىنا دەيىن 3 اي قالدى جانە بارلىق جوبالاردى اياقتاپ, جوسپارلاردى ىسكە اسىرۋ ءۇشىن بارلىق كۇش-جىگەردى جۇمساۋ قاجەت», — دەپ اتاپ ءوتتى پرەمەر-مينيستر.
