سوڭعى تاۋلىكتە قازاقستان بويىنشا 94 ادامنان دەرت انىقتالسا, ونىڭ 17-ءسى شىعىس قازاقستان وبلىسىنان شىققان. قازىر اۋرۋحانادا ەم الىپ جاتقان ناۋقاستار ءۇشىن قاجەتتى جاعدايدىڭ ءبارى جاسالعان. ىقتيمال ەكىنشى تولقىنعا دا دايىندىق تىڭعىلىقتى ءجۇرىپ جاتىر. وبلىس ورتالىعىندا اشىلعالى وتىرعان پۋلمانولوگيالىق ورتالىقتىڭ ءوزى تۇرعىندار ءۇشىن ۇلكەن قۋانىش.
اتى جامان ىندەتپەن كۇرەستە حالىق تا ايانىپ قالىپ جاتقان جوق. جۋىقتا عانا ريددەر قالاسىنىڭ 27 تۇرعىنى قان پلازماسىن تاپسىردى. ال وتكەن ايدا 11 ازامات پلازما تاپسىرىپ, اۋىر جاعدايدا جاتقان ناۋقاستارعا كومەك قولىن سوزعان ەدى. قان پلازماسىن تاپسىرعانداردىڭ بارلىعىنا 19 446 تەڭگە كولەمىندەگى ءتيىستى سوما تولەنىپ وتىر. ءسويتىپ قازىرگى ۋاقىتتا ريددەر قالاسىندا 81 قان پلازماسى دايىن تۇر.
– ءبىر ادام تاپسىرعان قان پلازماسى, كەم دەگەندە, اۋىر جاعدايدا جاتقان ەكى ادامنىڭ ءومىرىن امان الىپ قالاتىنىنا ءبارىنىڭ كوزى جەتتى دەپ ويلايمىن. سوندىقتان ءبىر اۋىرىپ, ايىققان ازاماتتاردى پلازما تاپسىرۋعا شاقىرامىز. قان تاپسىرۋعا كەلگەندەردى ەڭ الدىمەن تەراپەۆت دارىگەر مۇقيات قاراپ, تەكسەرەدى. ول پاتسيەنتتىڭ قان قىسىمى مەن دەنە قىزۋىن ولشەيدى. ەگەر ءبارى دۇرىس بولسا, قان تاپسىرۋ اپپاراتىنا جىبەرىلەدى, – دەيدى ريددەر ورتالىق اۋرۋحاناسىنىڭ باس دارىگەرى گۇلنار كىتاپباەۆا.
قان تاپسىرۋعا نيەتتى ريددەرلىكتەر كەڭەس بەرۋ دياگنوستيكالىق ورتالىعىنداعى №15 كابينەتكە بارۋعا بولادى.
دونورلاردىڭ ەسىنە سالا كەتسەك, كەز كەلگەن ادام قان تاپسىرا المايدى. بۇل ءۇشىن ادامنىڭ سالماعى 50 كيلودان كەم بولماۋى كەرەك. جاس مولشەرى 18 بەن 55 جاس ارالىعىنداعى ازاماتتار عانا قان تاپسىرا الادى. دارىگەرلەردىڭ ايتۋىنشا, جاسى ۇلعايعان ادامداردا قانت ديابەتى, ارتەريالىق گيپەرتەنزيا, جۇرەك اۋرۋى سىندى سوزىلمالى اۋرۋلار بولادى. تاعى ءبىر ەسكەرەرلىگى, قان اپپاراتتىق پلازمافەرەز ارقىلى دايىندالاتىندىقتان دونوردىڭ بىلەگىندەگى كۇرە تامىرى انىق بولعانى ابزال. قان الدىمەن كۇرە تامىردان ينە ارقىلى الىنىپ, ارنايى اپپاراتقا تۇسەدى. مەديتسينا ماماندارى اپپاراتپەن قانداعى پلازمانى ءبولىپ الادى دا, قاننىڭ كلەتكاسىن قىسىممەن دونورعا قايتا قۇيادى. دەنساۋلىعىڭىز, جاس مولشەرىڭىز جوعارىدا اتالعان تالاپتارعا ساي كەلسە, قان تاپسىرىپ, بەيتانىس ادامنىڭ ومىرىنە اراشا تۇسۋىڭىزگە مۇمكىندىك بار.
شىعىس قازاقستان وبلىسى
