ءباسپاسوز تۋرىنا قاتىسقان باق وكىلدەرى قالاداعى ساياباقتار مەن گۇلزارلاردى ارالاپ, «جۇمىسپەن قامتۋدىڭ جول كارتاسى – 2020» باعدارلاماسى مەن «بيۋدجەتكە قاتىسۋ» جوباسى اياسىندا جاسالىپ جاتقان جۇمىستارمەن تانىستى. بۇگىندە قالاداعى ساياباقتار مەن گۇلزارلار ەرەسەكتەر مەن بالالاردىڭ پايدالى ۋاقىت وتكىزۋ ورنىنا اينالۋى ءۇشىن قالا تۇرعىندارىنىڭ پىكىرلەرى ەسكەرىلىپ, جۇمىستار جۇرگىزىلۋدە.
ەڭ الدىمەن قالانىڭ بوستاندىق اۋدانىنداعى تيميريازەۆ-شاشكين كوشەلەرىنىڭ قيىلىسىندا ورنالاسقان «دوستىق» ساياباعىنا باردىق. مۇندا «جۇمىسپەن قامتۋدىڭ جول كارتاسى-2020» مەملەكەتتىك باعدارلاماسى اياسىندا اباتتاندىرۋ, كوگالداندىرۋ جۇمىستارى جۇرگىزىلۋدە.
– ساياباقتى اباتتاندىرۋ جۇمىستارى اياقتالۋعا جاقىن. ەندىگى كەزەكتە «workout» سپورت الاڭى, بالالار ويىن الاڭى, يتپەن سەرۋەندەيتىن ارنايى جەر, جارىقتاندىرۋ جۇمىستارى, جولعا اسفالت, تەكشەتاس توسەۋ جۇمىستارى قالدى. بارلىق جۇمىس قاراشا ايىنىڭ سوڭىندا اياقتالادى دەپ كۇتىلۋدە. ال اباتتاندىرۋ جۇمىستارى جەرگىلىكتى تۇرعىندارمەن اقىلداسا وتىرىپ جۇرگىزىلۋدە. سونداي-اق 370 ءتۇپ اعاش وتىرعىزىلاتىن بولادى, – دەدى «دوستار» قۇرىلىس كومپانياسىنىڭ وكىلى ازات ەستاەۆ.
وسىدان سوڭ المالى اۋدانىندا ورنالاسقان «گاندي» ساياباعىنىڭ باتىسىنداعى گۇلباق پەن «ماحاببات» گۇلزارىنا جول تارتتىق. المالى اۋدانىنىڭ كورىكتەندىرۋ ءبولىمىنىڭ باسشىسى تولەگەن اكىمحان «گاندي» ساياباعىنىڭ باتىسىنداعى گۇلباقتى اباتتاندىرۋ جۇمىستارى «بيۋدجەتكە قاتىسۋ» جوباسى اياسىندا تۇرعىنداردىڭ ۇسىنىسىمەن جۇزەگە اسىپ جاتقانىن جەتكىزدى.
– قازىرگى تاڭدا رەزەڭكە مەن تەكشەتاستان توسەم توسەلىپ, اۋماقتى اسفالتتاۋ جۇمىستارى, ورىندىقتار مەن قوقىس جاشىكتەرىن ورناتۋ, قالپىنا كەلتىرۋ جۇمىستارى جۇرگىزىلگەن. سونداي-اق ساياباقتا «workout» سپورت الاڭى, ترەناجەرلەر, ەكى سپورت ايماعى, بالالار الاڭى ورناتىلدى. جارىقتاندىرىلعان ساياباققا سان ءتۇرلى ساۋلە شاشاتىن تىرەۋلەر مەن شامدار, 24 شىراق, ءساندى ساۋلە ۇلگىسىندەگى 8 شىراق ورناتىلدى. بۇدان بولەك 100 ءتۇپ اعاش وتىرعىزىلدى. «ماحاببات» گۇلزارىندا دا كوگالداندىرۋ جۇمىستارى جۇرگىزىلىپ, اعاشتار مەن كوپجىلدىق بۇتالار, كوگالدار وتىرعىزىلدى. جارىقتاندىرۋ قامتاماسىز ەتىلدى.
كەلەسى كەزەكتە مەدەۋ اۋدانىنداعى «28 پانفيلوۆشى گۆاردياشىلار» ساياباعىنا بارىپ, ساياباق اۋماعىن اباتتاندىرۋ جوباسىمەن تانىستىق. جوبا «جۇمىسپەن قامتۋدىڭ جول كارتاسى-2020» مەملەكەتتىك باعدارلاماسى اياسىندا جۇزەگە اسۋدا. ساياباق اۋماعىن اباتتاندىرۋ كەزىندە اۋدانى 17 مىڭ شارشى مەتردەن اساتىن اسفالتبەتون جابىنىن اۋىستىرۋ, 373 جارىقتاندىرۋ تىرەكتەرىن ورناتۋ, اۋدانى 3 600 شارشى مەتردەن اساتىن تروتۋار پليتكالارىن ورناتۋ, 59 مىڭ شارشى مەتردەن اساتىن اۋماقتى كوگالداندىرۋ كوزدەلگەن. 103 جاڭا ورىندىق ورناتىلىپ, 23 رەترو ورىندىق قالپىنا كەلتىرىلەدى, سونداي-اق ۇزىندىعى 2100 پ.م. درەناج جۇيەسىن قايتا قۇرۋ بويىنشا جۇمىستار ورىندالادى, بۇگىندە جۇمىس كولەمىنىڭ 75%-دان استامى اياقتالدى. شامامەن اياقتالۋ مەرزىمى قازان ايىنىڭ سوڭىنا دەيىن ەكەن.
«نەگىزىنەن ساياباق اۋماعىندا جارىقتاندىرۋدى اۋىستىرۋ جانە جالپى جاقسارتۋ جۇمىستارى جۇرگىزىلەدى. جاياۋ جۇرگىنشىلەر مەن تروتۋارلىق جولداردى اۋىستىرۋ قاراستىرىلعان. شاعىن ساۋلەت نىساندارى دا اۋىستىرىلادى», دەدى قالالىق جايلى ورتا ءبولىمىنىڭ باسشىسى رۋسلان كەمەلباەۆ. ونىڭ ايتۋىنشا, بۇگىنگى تاڭدا ساياباق اۋماعىنداعى ەسكى دۋالداردى قالپىنا كەلتىرۋ بويىنشا كومپانيامەن كەلىسىمگە قول قويىلدى. «قالپىنا كەلتىرۋ كەزىندە بۇل جەردە قورشاۋلاردا 20-دان استام بوياۋ قاباتى, ءبىرىنىڭ ۇستىنە ءبىرى جاعىلعانى انىقتالدى. مەردىگەر ۇيىم ارنايى جابدىقتارعا يە كاسىبي بازاسى بار كومپانيانى تاپتى, ول قالپىنا كەلتىرۋدى جۇرگىزەدى», دەپ ءتۇسىندىردى ر.كەمەلباەۆ.
ءباسپاسوز تۋرىنا قاتىسۋشىلار وسىدان سوڭ تۇركسىب اۋدانىندا ورنالاسقان «جاس قانات» شاعىن اۋدانىنداعى ساياباق پەن «ماياك» اۋىلىنا رەكرەاتسيالىق ايماقتار قۇرۋ بويىنشا جۇمىستار جۇرگىزىلىپ جاتقان «اۋەجاي» كولىنىڭ ايماعىنا باردى. قالالىق «جاسىل ەكونوميكا» باسقارماسىنىڭ باسشىسى ناتاليا ليۆينسكايانىڭ مالىمەتىنشە, كوگالداندىرۋ الاڭى 170 مىڭ شارشى مەتردى قۇرايدى. قايتا قۇرۋ كەزەڭىندە 70 جۇمىس ورنى قۇرىلدى. 22 976 شارشى مەتر الاڭعا اباتتاندىرۋ جانە كوگالداندىرۋ جۇرگىزىلدى. اۆتوكولىكتەرگە ارنالعان 30 ورىندىق تۇراق ايماقتارى جانە ۆەلوسيپەدتەرگە ارنالعان تۇراق بار. اۋماقتا سپورتتىق نىساندار, «workout» الاڭدارى, شاعىن فۋتبول جانە ستريتبول الاڭدارى, پاركۋر الاڭدارى, بالالار الاڭدارى سالىندى. سونداي-اق 125 ورىندىق, 130 قوقىس سالعىش, ورىندىقتارى بار 8 ۇستەل ورناتىلدى.
الماتى قالاسىنىڭ وڭىرلىك كوممۋنيكاتسيالار قىزمەتى ۇيىمداستىرعان ءباسپاسوز تۋرىنان كەيىن تىكەلەي ەفيردە وتكەن بريفينگتە الماتى قالاسىنىڭ جاسىل ەكونوميكا باسقارماسىنىڭ باسشىسى ناتاليا ليۆينسكايا قالانى كوگالداندىرۋ بويىنشا بۇگىندە ناقتى اتقارىلىپ جاتقان جۇمىستار تۋرالى بايانداپ, جۋرناليستەردىڭ قويعان سۇراقتارىنا جاۋاپ بەردى.
«بۇگىننەن باستاپ ءبىز كۇزگى كوشەت وتىرعىزۋعا كىرىستىك. جۇمىس بيىل 20 قاراشاعا دەيىن سوزىلادى. شامامەن 290 مىڭ كوشەت وتىرعىزۋ جوسپارلانۋدا. جاسىل جەلەكتەردىڭ باسىم بولىگى الاتاۋ, ناۋرىزباي, جەتىسۋ اۋداندارىنا وتىرعىزىلادى», دەدى ن. ليۆينسكايا.
ايتا كەتۋ كەرەك, جاسىل جەلەك وتىرعىزۋعا نيەتتى ءاربىر قالا تۇرعىنى بۇل شاراعا قاتىسا الادى. ال جەلەك وتىرعىزۋ كەستەسى باسقارمانىڭ رەسمي سايتىندا جاريالانعان.
قازىرگى تاڭدا «الماتى-2050» دامۋ ستراتەگياسىن اتاپ ايتقاندا, «ادامدارعا ارنالعان قالا» قاعيداتىن ىسكە اسىرۋ شەڭبەرىندە مەگاپوليستە ايتارلىقتاي جۇمىستار اتقارىلۋدا.
دۋمان ارعىنگەلدى,
جۋرناليست
