بىرنەشە تۋردان تۇراتىن سايىستىڭ نەگىزگى ماقساتى - اۋىل شارۋاشىلىعىن جاستار اراسىندا دارىپتەۋ, جاستاردىڭ ەڭبەك قابىلەتتىلىگىن ارتتىرىپ, باۋلۋ. سونداي-اق وبلىسىمىزداعى ءىرى شارۋاشىلىق ورتالىقتاردىڭ جۇمىسىن جاستار اراسىندا ناسيحاتتاۋ مەن اۋىل جاستارىنىڭ اۋىل شارۋاشىلىعى سالاسىنداعى كاسىپكەرلىك بەلسەندىلىگىن ارتتىرۋ.
بۇل جوباعا 16 اۋدان-قالادان 2 قاتىسۋشىدان قاتىسىپ, ولار جەرەبە بويىنشا ءتورت كومانداعا ءبولىنىپ, جارىستى. جارىستىڭ العاشقى كۇنى قازىعۇرت اۋدانىنداعى باقتان الما تەرۋمەن باستالىپ, ارتى جىگىتتەر قاۋىمىنىڭ قوي قىرقۋىنا ۇلاستى. العاشقى سايىستا "سىرداريا" قۇراماسى باسىم تۇسسە, قوي قىرقۋ كەزىندە "الاتاۋدىڭ" جىگىتتەرى ەپتىلىگىمەن العا شىقتى. جىگىتتەردىڭ ايتۋىنشا, قوي قىرقۋدى العاش رەت كورىپ تۇرعاندارى دا بار, سوعان قاراماستان ولار ۇيىمداستىرۋشىلاردىڭ تاپسىرماسىن جوعارى دارەجەدە ورىنداۋعا تىرىستى.
ال سايىستىڭ ەكىنشى كۇنى ساۋران اۋىلدىق وكرۋگىندە كارتوپ قازىپ, ونى جيناۋمەن باستالدى. بۇل جەردە قاتىسۋشىلاردىڭ كارتوپ جيناۋداعى جىلدامدىقتارى مەن سالماق بويىنشا باسىمدىلىقتارى ەسەپتەلىپ, ناتيجە بويىنشا "سىرداريا" توبى العا شىقتى. ارىقاراي قاتىسۋشىلار سايىستى ماقتا القابىندا جالعاستىردى. "وڭتۇستىك - اق التىننىڭ وتانى" سانالاتىندىقتان, بۇل سايىستىڭ جاستارعا تاپسىرما رەتىندە بەرىلۋى زاڭدى. ماقتا تەرۋ كەزىندە قاتىسۋشىلاردى باعالاعان قازىلار ونىڭ تازالىعىنا, سالماعىنا ءجىتى ءمان بەردى.
"ماقتا – وڭتۇستىكتىڭ ماقتانىشى. نەگىزىنەن ەلىمىزدىڭ وڭتۇستىگىندە عانا وسەدى جانە ءبىزدىڭ وبلىسىمىزدىڭ ەكونوميكاسىنا دا ايتارلىقتاي تابىس الىپ كەلەتىن شارۋاشىلىق ءتۇرى. قازىرگى جاستار ماقتا القابىنا ءجيى بارماسا دا بۇگىنگى سايىستا بارىنشا ەپتىلىكتەرىن كورسەتىپ جاتىر. ولاردى جان-جاقتى سارالاي كەلە "تۇران" مەن "سىرداريا" كوماندالارىنا بىردەي ۇپاي بەردىك, ال "قاراتاۋلىقتار" از عانا ۇپايمەن ارتقا شەگىندى", دەدى قازىلار القاسىنىڭ توراعاسى, تۇركىستان وبلىسى اۋىلشارۋاشىلىق باسقارماسىنىڭ باس مامانى ءابدىباي مۇستافاەۆ.
ەكى كۇن بويى اۋىر ءارى قىزىقتى جۇمىستارمەن سايىسقان جاس ۆولونتەرلار جارىس سوڭىندا ينتەللەكتۋالدىلىق جاعىنان دا سىنعا ءتۇستى. قازاقتىڭ سالت-ءداستۇرى مەن ىرىم-تىيىمدارىنان حابارىنىڭ دا جوق ەمەستىگىن كورسەتتى.
"بۇل - جاستاردى ەڭبەككە باۋلۋعا ارنالعان جاقسى جوبا. ءبىزدىڭ تۇركىستان وبلىسى حالقىنىڭ 80 پايىزى اۋىلدى ەلدى-مەكەندە تۇرادى. وڭىرىمىزدە اۋىل شارۋاشىلىعى الەۋەتى قارقىندى دامىپ كەلەدى, بۇل اتادان بالاعا ميراس بولىپ كەلە جاتقان كاسىپ. اتا كاسىپتىڭ جاندانۋى, اۋىل شارۋاشىلىعىنداعى يننوۆاتسيالىق دامۋ, شارۋاشىلىققا جاڭا تەحنولوگيالاردى ەندىرۋ - ەندىگى جاستاردىڭ ەنشىسىندە. قازاقستان كەلەشەكتە الەمدىك ازىق-ت ۇلىك قاۋىپسىزدىگىن قامتاماسىز ەتۋدە ءوزىنىڭ تابيعي رەسۋرستارىنا ساي, لايىق ورنىن الادى دەپ سەنەمىز. وسى ماقساتتا قىزمەت ەتەمىز», - دەدى "جاستار رەسۋرستىق ورتالىعى" باسشىسى امالبەك ءومىرتاي.
جاستار ەكى كۇن بويى ناعىز اۋىل ءومىرىن سەزىندى جانە وزدەرىنىڭ ەڭبەككە قابىلەتتىلىكتەرىن دالەلدەدى. ناتيجە بويىنشا, "قاراتاۋ" كومانداسى III ورىن, ال "الاتاۋ" II ورىندى يەلەندى, I ورىندى "سىرداريا" قۇراماسى ەنشىلەپ, باس جۇلدەنى "تۇران" توبى يەلەندى. جەڭىمپاز جاستارعا العىس حات پەن باعالى سىيلىقتار تابىستالدى.
