«وڭ قولىڭ بەرگەندى سول قولىڭ كورمەسىن» دەيدى عوي. الەۋمەتتىك كومەككە ءزارۋ وتباسىلارعا ازىق-ت ۇلىك, ءدارى-دارمەك تاراتىپ جۇرگەن جاستار جاقسىلىقتارىن ءتىس جارىپ ەشكىمگە ايتا بەرمەيدى. ۇلكەن ءىستى ۇندەمەي تىندىرىپ ءجۇر. ايتپەسە ازىن-اۋلاق ازىق-ت ۇلىك الىپ بارىپ, سۋرەتكە ءتۇسىپ, جارياعا جار سالاتىندار دا جوق ەمەس. ال ەراسىل ۋاتاەۆ باستاعان جاستاردىڭ قارت اناعا باسپانا الىپ بەرۋگە سەپ بولعاندارى ايتۋعا تۇرارلىقتاي. جاقسىلاردىڭ جاقسىلىعى عوي.
بيىل جازداي ءبىر توپ قامقور جاندار ورتا قازانعا قارجى جيناپ, ءال-اۋقاتى تومەن وتباسىلارعا كومەك قولدارىن سوزعان. بىردە ەراسىل ۋاتاەۆ, يسلام اۋەلبەك سىندى جاستار بەلگىلەنگەن تىزىممەن ازىق-ت ۇلىك تاراتىپ ءجۇرىپ, باسپانا كەيپى جوق ۇيدە تۇرىپ جاتقان اق جاۋلىقتى اناعا تاپ بولعان. پاتەر جالداۋعا جاعدايى جوق كۇلپارا ىسقاقوۆا ۇلكەن بالاسى مەن جولداسى قايتىس بولعان سوڭ قالاعا كىشى ۇلىنىڭ قولىنا كوشىپ كەلگەن. وكىنىشتىسى سول, كىشى ۇلى اياقاستى سوتتالىپ كەتكەن. قارت انا بولسا, كومەك سۇراپ ەشقايدا بارماعان. ءۇيسىز-كۇيسىز بەس جىلعا جۋىق جۇرگەن. ۇلىنا بارىپ ءجۇرۋ ءۇشىن ەدەن جۋىپ, ناپاقا تاپقان. الپىس مىڭ تەڭگەنىڭ اينالاسىنداعى زەينەتاقىمەن وسكەمەندەي قالادا ءومىر ءسۇرۋ مۇمكىن ەمەس ەدى. انانىڭ وسىنداي كۇيىن بايقاعان ەراسىل بىردەن اقشا جيناۋعا كىرىسكەن.
– الەۋمەتتىك جاعدايى تومەن وتباسىلارعا ازىق-ت ۇلىك تاراتىپ ءجۇرىپ, كۇلپارا اپامىزبەن تانىستىق. تۇرىپ جاتقان جەرى بىرەۋدىڭ قوسالقى بولمەسى ەكەن. ءۇي دەپ ايتۋعا كەلمەيدى. سودان جان-جاققا حابارلاپ, اناعا قامقورلىعىمىزدى كورسەتكىمىز كەلدى, – دەيدى ەراسىل ۋاتاەۆ.
قارت انانىڭ جاي-كۇيىنە كوزدەرى جەتكەن حالىق ەراسىلدىڭ كىشى-گىرىم قورىنا اقشا اۋدارا باستاعان. اينالدىرعان ەكى اپتانىڭ ىشىندە ەكى ميلليونعا جۋىق قارجى جينالعان. جالىندى جستار قورداعى اقشاعا ساي وسكەمەننەن باسپانا ىزدەي باستايدى. كوپ ۇزاماي پاتەر تابىلا كەتكەن. قۋانىشتارىنا وراي پاتەر يەسى دە انانىڭ جاعدايىن ءتۇسىنىپ, كوپ جەڭىلدىك جاساعان ەكەن. باسپانالى بولعان قارياعا ۆولونتەر جاستار جيھازدارىن دا ساتىپ الىپ بەرگەن. ءتىپتى پاتەرىن جۋىپ-شايىپ, انانى وزدەرى كوشىرىپ الىپ كەلگەن. جىلى ۇيدە تۇرىپ جاتقان كۇلپارا ىسقاقوۆانىڭ جاستارعا دەگەن العىسى شەكسىز. يگى ءىستىڭ باسى-قاسىندا جۇرگەن جاستار رەسۋرستىق ورتالىعىنىڭ جەتەكشىسى ارايلىم ەسىمبەكقىزى دا مەيىرىمدى, اقىلدى جاستاردىڭ ءوسىپ كەلە جاتقانىن ايتادى.
– بيىل اسابالار مەن جايدارمانشىلاردىڭ پايداسى حالىققا كوپ ءتيدى. كارانتين ەنگىزىلگەندە ءبىزدىڭ ورتالىققا العاشقى بولىپ حابارلاسقان دا سولار. ءبىرى قارجىلاي قولداۋ بىلدىرسە, ەكىنشىسى مۇقتاج وتباسىلارعا ازىق-ت ۇلىكتى كولىكتەرىمەن تاسىمالداپ بەردى. ورتامىزدا وسىنداي جاستاردىڭ بارى مارقايتادى, قۋانتادى, – دەيدى جاستار رەسۋرستىق ورتالىعىنىڭ جەتەكشىسى ارايلىم ەسىمبەكقىزى.
قولدارىنان كەلگەنشە جان-جاعىنا جىلۋ سىيلاپ جۇرگەندەردى ءبىز بالكىم بايقاي بەرمەيمىز. بىراق قامقور جاندار از ەمەس.
وسكەمەن
