جەدەل-ىزدەستىرۋ شارالارى كەزىندە بۇرىن-سوڭدى سوتتى بولعان 51 جاستاعى جارما اۋدانىنىڭ تۇرعىنى قولعا ءتۇستى. كۇدىكتى ۇرلانعان مالدىڭ ەتىن اۆتوكولىككە تيەپ, سەمەي قالاسىنا قاراي كەتىپ بارا جاتقان جولدا پوليتسيا قىزمەتكەرلەرى ءىزىن سۋىتپاي ۇستاپ ۇلگىرگەن.
"تەرگەۋ كەزىندە انىقتالعانداي, كۇدىكتى شارۋا قوجالىعىندا باقتاشى بولىپ جۇمىس ىستەپ جۇرگەن. قوجالىق يەسى سەنىپ تاپسىرعان سوڭ شىعار, ەشكىمنىڭ بايقاماي قالاتىنىن بىلگەن. ءسويتىپ, جايىلىمدا جۇرگەن ەكى باس جىلقىنى ورمانعا ايداپ اپارادى. بىرەۋىن سول جەردە سويىپ, بولىنگەن تۋشانى سەمەيدىڭ بازارىنا اپارىپ ساتپاق بولعان كورىنەدى. الايدا جوسپارى جۇزەگە اسىپ ۇلگىرمەگەن", - دەدى وبلىستىق پوليتسيا دەپارتامەنتىنىڭ باستىعى ساعات ماديەۆ.
سوتقا دەيىنگى تەرگەۋ امالدارىن جۇرگىزۋ كەزىندە ۇستالعان ازاماتتىڭ تاعى ءبىر مال ۇرلىعىنا قاتىسى بارى انىقتالعان. سويتسە, قىركۇيەكتىڭ باسىندا كورشى شارۋا قوجالىقتان جالپى قۇنى جارتى ميلليون تەڭگەگە باعالانعان ەكى باس ءىرى قارانى قولدى ەتكەن. «بۇزاۋدى ۇرلاعان وگىزدى دە ۇرلايدى» دەمەكشى ەكىنشى رەتىندە جىلقى ۇرلاۋعا كوشكەن كۇدىكتى كوپ ۇزامادى. «ۇرلىق ءتۇبى قورلىق». اتالعان فاكتىلەر بويىنشا قىلمىستىق كودەكستىڭ 188-1 بابى (مال ۇرلىعى) بويىنشا سوتقا دەيىنگى تەرگەپ-تەكسەرۋ امالدارى ءجۇرىپ جاتىر.
تاعى دا ەستەرىڭىزگە سالا كەتەيىك, ەلىمىزدە مال ۇرلىعىنا قاتىستى قىلمىستىق كودەكسكە 188-1 بابى ەنگىزىلگەن. ناقتىلاپ ايتساق, مال ۇرلىعىمەن اينالىسقاندار 12 جىلعا دەيىن باس بوستاندىعىنان ايىرىلۋى مۇمكىن. قاراپايىم مال ۇرلىعىنا قاتىسى بار ادامداردى بەس جىلعا دەيىن باس بوستاندىعىنان ايىرىپ, مۇلكىن تاركىلەيدى. ۇيىمداسقان قىلمىستىق توپ 500 اەك-تەن جوعارى شىعىن كەلتىرسە, ءۇش جىلدان جەتى جىلعا دەيىن اباقتىعا قامالادى. ەگەر كەلتىرىلگەن شىعىن 2000 اەك-تەن اسىپ كەتسە, قىلمىستىق توپ مۇشەلەرىنە 7 جىلدان 12 جىلعا دەيىن جازا كەسىلەدى.
سونداي-اق جابىرلەنۋشى مەن كۇدىكتىنىڭ اراسىندا تاتۋلاسۋ بولمايتىنىن دا قاپەرلەرىڭىزدە ۇستاڭىزدار.
