قىركۇيەك ايىندا ساۋدا ورتالىقتارىندا «جاس قانات» فابريكاسىنان شىعاتىن 1-ساناتتاعى 10 تال جۇمىرتقا 286 تەڭگە تۇرسا, قازىرگى باعاسى 363 تەڭگەگە جەتكەن. قالانىڭ ورتالىق ساۋدا بازارىنداعى ساتۋشىلار دا جۇمىرتقانىڭ ىرىكتەلگەن, جوعارى سۇرىپتى تۇرلەرى سوڭعى اپتا ىشىندە بىرنەشە رەت قۇبىلىپ, 20-25 تەڭگەگە قىمباتتاعانىن ايتادى.
جۇلقىنعان جۇمىرتقا باعاسىن قالا شەنەۋنىكتەرى ازىق-ت ۇلىك جارمەڭكەلەرىن ۇيىمداستىرۋ ارقىلى جۋاسىتپاق. ايتۋلارىنشا, الداعى اپتادا وتەتىن اۋىلشارۋاشىلىق تاۋارلارى جارمەڭكەسىندە وبلىستىڭ تۇراقتاندىرۋ قورىنداعى جۇمىرتقالار ساۋداعا شىعارىلادى.
بۇعان دەيىن ارقالىق قۇس فابريكاسىمەن بىرگە ايماقتا قۇس تۇماۋى تاراعان 8 ەلدى مەكەن كارانتينگە جابىلعانى بەلگىلى. قوستاناي قالالىق اكىمدىگىنىڭ وكىلدەرى بۇل جاعداي جۇمىرتقانىڭ قىمباتتاۋىنا اسەر ەتكەن جوق دەپ وتىر.
"جۇمىرتقا باعاسى اسا قاتتى قىمباتتاعان جوق. ەگەر 2019 جىلدىڭ قازان ايىنداعى ستاتيستيكالىق كورسەتكىشكە ۇڭىلسەك, تاۋىق ەتى مەن جۇمىرتقا باعاسىنىڭ 20-25 پايىزعا وسكەنىن بايقايمىز. قازىر تۇراقتاندىرۋ قورىندا بەلگىلەنگەن جۇمىرتقا باعاسى 270-280 تەڭگەنىڭ توڭىرەگىندە. ال نارىقتاعى باعانىڭ ازداپ وسۋىنە باسقا جاعدايلار ىقپال ەتىپ وتىر. قازىر قۇستىڭ جەمى قىمباتتادى, كوممۋنالدىق قىزمەت باعاسى ءوستى – قۇس ەتى مەن جۇمىرتقاسىنىڭ قۇنى كوتەرىلۋىنىڭ باستى سەبەبى وسى. بۇعان قۇس تۇماۋىنىڭ قاتىسى بار دەپ رەسمي تۇردە ايتا المايمىز. باعانى تۇراقتاندىرۋدا اۋىلشارۋاشىلىعى جارمەڭكەسىنىڭ ماڭىزى زور. قوستانايدا 17 قازاندا جارمەڭكە وتكىزۋدى جوسپارلاپ وتىرمىز. سول كەزدە 10 تال جۇمىرتقا 270 تەڭگەدەن ساتىلاتىن بولادى", - دەدى قالالىق اكىمدىككە قاراستى كاسىپكەرلىك ءبولىمىنىڭ جەتەكشىسى يلونا تيموشەنكو.
قالا اكىمدىگىنىڭ باعانى باقىلاۋدا ۇستايتىن ءبولىم ماماندارىنىڭ ايتۋىنشا, وبلىستاعى 3 ءىرى قۇس فابريكاسىنان جىلىنا 420 ملن جۇمىرتقا شىعادى ەكەن. ونىڭ 122 ميلليونى ەلىمىزدىڭ وزگە وڭىرلەرىنە جونەلتىلىپ, 110 ملن جۇمىرتقا شەت ەلدەرگە ەكسپورتتالادى. ال 122 ملن جۇمىرتقا وبلىستا قالادى. سوندىقتان ازىقتىڭ بۇل تۇرىنە تاپشىلىق جوق.
