سەمەيدە جانە قاينار اۋىلىندا وتكەن سالتاناتتى شاراعا عالىمداردىڭ ۇرپاقتارىمەن قاتار بولاتبەك ناسەنوۆ, باۋىرجان جاقىپ, جانات اسكەربەكقىزى, داۋلەتكەرەي كاپ ۇلى, سەرىكزات دۇيسەنعازين سىندى سىيلى قوناقتار كەلدى.
عالىمداردىڭ ەڭبەكتەرى تۋرالى وتكەن كونفەرەنتسيادا سەمەي قالاسى اكىمىنىڭ ورىنباسارى ايدار سادىرباەۆ جازۋشى رىمعالي نۇرعاليەۆتىڭ اتىنا كوشە بەرۋ كەرەكتىگىن ايتتى.
– وتكەن جىلى قالالىق ونوماستيكالىق كوميسسيانىڭ وتىرىسىندا سەمەي قالاسى كوشەلەرىنىڭ بىرىنە رىمعالي نۇرعاليەۆتىڭ ەسىمىن بەرۋ تۋرالى ءسوز قوزعالعان. بىراق موراتوري جاريالانعاندىقتان كىدىرىپ تۇرعان. قازىر رۇقسات بەرىلىپ جاتىر. ەندى قولعا الامىز, – دەدى قالا اكىمىنىڭ ورىنباسارى ايدار سادىرباەۆ.
بۇل – وتە ورىندى ماسەلە. ويتكەنى سەمەي رۋحاني قالا بولعانىمەن, رىكوۆ, ششورس, تەرەشكوۆا, موروزوۆ سىندى كوشەلەر ءالى بار.
سونداي-اق جيىندا ءسوز العان فيلولوگيا عىلىمدارىنىڭ دوكتورى باۋىرجان جاقىپ مارقۇم عالىمداردىڭ ەڭبەكتەرىن ايتا كەلە, ابايدىڭ ۇستازى جاناق اقىن تۋرالى دا وي ايتتى. باۋىرجان ءومىرجان ۇلىنىڭ ايتۋىنشا, جاناق ساعىندىق ۇلى ابايدىڭ اقىن بولىپ قالىپتاسۋىنا زور ىقپال ەتكەن ادام. الايدا حاكىمنىڭ ۇستازى تۋرالى ەش جەردە ايتىلمايدى.
ەرتەسىندە ءبىر توپ دەلەگاتسيا بۇرىنعى ابىرالى اۋدانىنىڭ ورتالىعى قاينار اۋىلىنا اتتاندى. مۇنداعى ورتالىق الاڭدا «ابىرالى-دەگەلەڭ» قورىنىڭ قولداۋىمەن رىمعالي نۇرعالي ۇلى مەن ءتولتاي بالاقاەۆتىڭ ەسكەرتكىشتەرى اشىلدى.
ءتولتاي بالاقاەۆ – ابىرالى وڭىرىنەن شىققان العاشقى عالىمداردىڭ ءبىرى. ول ءومىر-باقي ش.ءۋاليحانوۆ اتىنداعى ينستيتۋتتا قىزمەت اتقارعان. ال رىمعالي نۇرعالي ۇلى – الاش قايراتكەرلەرى تۋرالى تىڭ دەرەكتەر جيناستىرىپ, قازاقتىڭ تاريحىن تۇگەندەگەن عالىم. ولاردىڭ ارتىندا قالعان ۇرپاقتارى تۋعان جەرلەرىندە تۇعىرىنا قونسىن دەگەن نيەتتە كەۋدەمۇسىن ورناتۋدى قولعا العان. ەرتىس تاتيەۆتىڭ قولىنان شىققان بۇل مۇسىندەر «ابىرالى-دەگەلەڭ» قوعامدىق قورىنىڭ قولداۋىمەن ورناتىلدى. جۇدىرىقتاي جۇمىلعان ابىرالى ءوڭىرىنىڭ تۋمالارى ءىس-شارانى ەلدەگى جاعدايعا بايلانىستى بارلىق سانيتارلىق تالاپتاردى ساقتاي وتىرىپ ۇيىمداستىردى.
سەمەي
