ماسەلەن, ءادىل احمەتوۆ قوستانايداعى ىرگەلى جوعارى وقۋ ورنىن اياقتاعان سوڭ بىردەن تۋعان جەرى التىنسارين اۋدانىنا بارىپ, شاعىن شارۋاشىلىق اشىپ, مال باسىن كوبەيتۋمەن اينالىسا باستادى. ءاۋ باستا 26 سيىرى بار ەدى, 5-6 جىلدىڭ ىشىندە مال باسى 2-3 ەسە ءوستى. جاس فەرمەر بۇگىندە 80-ءنىڭ ۇستىندە ءىرى قارا ۇستاپ وتىر. بيىل ءسۇتتى سيىرلارىن بولەكتەپ, ولارعا جەكە قورا-جاي سالدى. ماقساتى – ءسۇت باعىتىنداعى ءىرى قارا سانىن كوبەيتىپ, قالاعا تاسىمالداناتىن ءسۇت ءوندىرىسىن جولعا قويۋ. شارۋاشىلىقتىڭ 1,5 مىڭ گەكتار جەرى بار. القاپتىڭ باسىم بولىگىن بيداي, ءبىراز بولىگىن شابىندىق پەن جايىلىم الىپ جاتىر. ءادىل مالدىڭ قىسقى جەمشوبىن وسى جەردەن قامداپ الادى.
– بيدايدى ءوزىمىز ەگىپ, ءوزىمىز ورامىز. اباي اتامىز ايتپاقشى, «اقىرىن ءجۇرىپ, انىق باسىپ» بىرتە-بىرتە دامىپ كەلەمىز. باستىسى, ءبىر ورىندا تۇرىپ قالماۋ كەرەك. ءسۇتتى سيىر سانىن 200-گە جەتكىزگىم كەلەدى, – دەيدى فەرمەر.
جوعارى وقۋ ورنىن بىتىرگەن سوڭ, كوپپەن بىرگە قالادا قالۋعا ۇمتىلماي, اۋىلدى تاڭداعان تالاپتى جاستىڭ ءبىرى – نيكولاي گريباك. ول وسىدان ەكى جىل بۇرىن ەكىنىڭ ءبىرى قول جەتكىزە بەرمەيتىن پراگا ۋنيۆەرسيتەتىن ءتامامداپ, تۋعان اۋىلىنا ورالعان. شەتەلدەگى ىرگەلى وقۋ ورنىن ءبىتىرىپ كەلگەن جاس جىگىتتىڭ مۇنداي توسىن شەشىمىنە تاڭعالعان قۇرداستارى العاشقى كەزدە «اقىرى اۋىلدا قالاتىنىڭ بار, پراگادا وقىپ نەڭ بار؟» دەپ قاعىتا ازىلدەپ ءجۇردى. سودان بەرى ەكى جىل ءوتتى. نيكولاي اتاسى مەن اكەسىنىڭ قاسىندا وتباسىلىق شارۋاشىلىقپەن اينالىسىپ ءجۇر. گريباكتار اۋلەتىنىڭ 2500 گەكتار جەرى بار. بيىلعى ەگىن وراعىن وتكەن اپتادا اياقتاپ, بيدايىن قامباعا قۇيىپ, مالعا جەتكىلىكتى ازىق قورىن جيناپ الدى. ۇلكەندەردىڭ مول تاجىريبەسى مەن جاس ماماننىڭ ءبىلىم-بىلىگى بار, ونىڭ ۇستىنە جاڭا تەحنيكا مەن زاماناۋي اگروتەحنولوگيا جەتىستىگى قوسىلىپ ءوز جەمىسىن بەرۋدە. بيىلعى قۇرعاقشىلىققا قاراماستان, بۇل شارۋاشىلىق ءار گەكتاردان ورتاشا ەسەپپەن 18 تسەنتنەردەن استىق الدى. بيىل بيدايدىڭ ءباسى جوعارى. سوندىقتان گريباكتار ءونىمنىڭ ءبىراز بولىگىن ساتىپ, جاڭا قويما عيماراتىن تۇرعىزىپ, تاعى ءبىر كومباين الۋدى, سونداي-اق شارۋاشىلىقتا جۇمىس ىستەيتىن اۋىل تۇرعىندارىنىڭ جالاقىسىن كوتەرۋدى كوزدەپ وتىر.
– پراگادا وقىپ جۇرگەندە اكەممەن ءجيى حابارلاسىپ تۇردىم. كوبىنە شارۋاشىلىق ماسەلەلەرى جونىندە اڭگىمەلەسەتىنبىز. ءوزىم اگرونوم ماماندىعى بويىنشا ءبىلىم الىپ, باتىس اگروتەحنولوگياسىنىڭ قىر-سىرىن كوپ زەرتتەدىم. ول جاقتان العان ءبىلىمىمدى تاجىريبەدە جۇزەگە اسىرۋ ءۇشىن بىردەن تۋعان اۋىلىما ورالدىم. وزدەرىڭىز كورىپ تۇرسىزدار, ەڭبەك ەتىپ جاتىرمىز, ناتيجە جامان ەمەس. كەيدە شارۋاشىلىق بارىسىندا ۇلكەندەرمەن كەلىسە الماي قالىپ جاتامىز. ول كىسىلەر تاجىريبەنى, مەن عىلىمي تەحنولوگيا جەتىستىكتەرىن ايتامىن. نەگىزى «كەڭەسىپ پىشكەن تون كەلتە بولمايدى», مەن كەلگەلى ءونىم كولەمى ۇلعايعانىن اتام دا, اكەم دە مويىندادى عوي, – دەپ جىميدى نيكولاي.
ءادىل مەن نيكولايدىڭ اۋىلعا باراتىن ءجونى بار. ويتكەنى ول جاقتا اكەلەرى قامداپ قويعان جەرى مەن مالى بار. ال اۋىلعا بارىپ ەگىن ەگىپ, مال شارۋاشىلىعىمەن اينالىسقىسى كەلەتىن, بىراق وعان مۇمكىندىگى جوق تالاپتى جاستىڭ كوبى ەشكىمنەن قولداۋ تابا الماي قالادا جۇمىس ىستەپ ءجۇر. «ەگەر جاستار ءۇشىن ارنايى كەشەندى باعدارلاما جاسالىپ, قاناتقاقتى جوبالار قولعا الىنسا, وندا شارۋا باستاۋعا ۇزاق مەرزىمدى نەسيە بەرۋ, ءىرى شارۋاشىلىقتاردان قارىزعا ازىن-اۋلاق مال نەمەسە ليزينگپەن تەحنيكا الۋ مۇمكىندىگى قاراستىرىلسا, وبلىسىمىزدىڭ وڭتۇستىك اۋداندارىندا بوس جاتقان جايىلىم كوپ. نەگە بارماسقا؟» دەيدى ولار.
قوستاناي وبلىسى
