قايبىر جىلدارى ۋرۋگۆايدىڭ ماقتانىشىنا اينالعان 33 جاستاعى ەدينسون كاۆاني جەتى جىل ونەر كورسەتكەن پسج كلۋبىنان كەتىپ, ەركىن اگەنت رەتىندە اعىلشىننىڭ «مانچەستەر يۋنايتەد» كومانداسىن تولىقتىردى. 2013 جىلى «ناپوليدان» پسج-عا 64 ميلليونعا اۋىسىپ كەلگەن كاۆاني بىردەن بىرنەشە رەكوردتى جاڭارتقان ەدى. اتاپ ايتار بولساق, پسج-نىڭ ەڭ قىمباتقا ساتىپ العان, ال ء«ناپوليدىڭ» قىمباتقا ساتقان ەڭ ءبىرىنشى فۋتبولشىسى اتاندى. سونىمەن قاتار كاۆاني فرانتسيا فۋتبولىنداعى ەڭ قىمبات ويىنشىسى دەگەن اتاققا يە بولدى.
ەدينسوندى «مانچەستەر يۋنايتەدتەن» بولەك, «اتلەتيكو», «روما» جانە «چەلسي» سەكىلدى كلۋبتار دا ءوز قاتارىنان كورگىسى كەلەتىندەرىن ايتقان بولاتىن. بىراق ۋرۋگۆايلىق فۋتبولشى «ميۋ-ءدى» تاڭدادى.
2014 جىلى فۋتبولدان برازيليادا وتكەن الەم چەمپيوناتىنىڭ ەڭ ۇزدىك سۇرمەرگەنى اتانعان كولۋمبيالىق حامەس رودريگەس ءمادريدتىڭ «رەال» كلۋبىنان كەتتى. كەزىندە حامەستىڭ فرانتسيادان يسپانياعا كەلۋىنە سەبەپشى بولعان سول كەزدەگى «رەالدىڭ» باس باپكەرى, قازىرگى «ەۆەرتوننىڭ» باس جاتتىقتىرۋشىسى كارلو انچەلوتتي ەندى ونى انگلياعا شاقىردى. «رەالدا» قاڭتارىلىپ قالعان 29 جاستاعى فۋتبولشى انگلياعا كەلە سالىپ, جاقسى ويىنىمەن مامانداردىڭ كوزىنە تۇسە باستادى. اعىلشىن پرەمەر-ليگاسىندا رودريگەس 4 ويىندا جاسىل الاڭعا شىعىپ, ءۇش رەت مەرگەندىگىمەن كوزگە ءتۇستى.
سونداي-اق «رەال» كەيىنگى جىلدارى باس باپكەر زينەدين زيدانمەن «اڭگىمەسى» جاراسپاي جۇرگەن ۋەلس قۇراماسىنىڭ اڭىزىنا اينالعان گارەت بەيلدى ءوزىنىڭ بۇرىنعى كلۋبى «توتتەنحەمگە» جالعا بەردى. جانكۇيەرلەردىڭ ەسىندە بولسا, 31 جاستاعى شابۋىلشى 2013 جىلى «رەال» كلۋبىنا كەلگەن بولاتىن. جەتى جىل ىشىندە ول مادريد كلۋبىندا 251 ماتچ وتكىزىپ, 105 گول سوققان ەكەن.
«بارسەلونا» مەسسيدى كوماندادان جىبەرمەگەنىمەن, باسقا ءبىر جۇلدىزى, ياعني وسىدان التى جىل بۇرىن 80 ميلليون ەۋروعا ساتىپ العان ۋرۋگۆايلىق شابۋىلشى لۋيس سۋارەستى كلۋبتىڭ نەگىزگى قارسىلاسى سانالعان «اتلەتيكو مادريدكە» تەگىن بەرە سالدى. سونداي-اق «بارسەلونا» ءحاۆيدىڭ ءىزباسارى دەپ باعالانعان 24 جاستاعى برازيليالىق تالانتتى جارتىلاي قورعاۋشى ارتۋردى كوماندا باسشىلىعى «يۋۆەنتۋس» كلۋبىنا 72 ميلليون ەۋروعا ساتتى. ەسەسىنە, «بارسەلونا» تۋرين كومانداسىنان ميرال ءپيانيچتى 60 ميلليون ەۋروعا ساتىپ الدى. وسىلايشا كاتالونيالىقتار ترانسفەردەن 12 ميلليون ەۋرو تابىس تاپتى. الايدا جانكۇيەرلەر 24 جاستاعى ويىنشىنىڭ ورنىنا 30 جاستاعى ەگدە فۋتبولشىنى ساتىپ العان باسشىلىققا نارازى ەكەنىن بىلدىرۋدە.
«باۆاريا» گەرمانيا قۇراماسىنىڭ ويىنشىلارىن ءبىر كومانداعا توپتاستىرۋ جوسپارىنان ءالى دە باس تارتقان جوق. بۋندەستيم كلۋبى وسىدان ءبىر جىل بۇرىن «مانچەستەر سيتي» مەن گەرمانيا قۇراماسىنىڭ ويىنشىسى سانالعان لەروي سانەنى ساتىپ الا الماعان-دى. تۇراقتىلىققا جانە سوزگە بەرىك نەمىستەر بيىل سانەنى ءوز كوماندالارىنا قوسىپ الدى. انگليادان فۋتبولشى الدىرتقان «باۆاريا» ءبىر ويىنشىسىن فۋتبولدىڭ وتانىنا جىبەردى. 29 جاستاعى يسپانيا ازاماتى تياگو الكانتارانى بىلتىرعى انگليا چەمپيونى «ليۆەرپۋلگە» 22 ميلليون ەۋروعا ساتتى.
ەۋروپاداعى ترانسفەر بازارىنىڭ سوڭعى كۇنىندە فۋتبول جانكۇيەرلەرى ەرەكشە ترانسفەر ساۋداسىنا كۋا بولدى. لوندوننىڭ «ارسەنال» كلۋبى كوماندانىڭ ماسكوتى – گۋننەرزاۆرمەن قوشتاسقانىن جاريالادى. سۇيكىمدى دينوزاۆر «كانونيرلەردىڭ» جانكۇيەرلەرىن كلۋب «حايبەري» ستاديونىندا ويناپ جۇرگەن كەزدەن بەرى قۋانتىپ كەلگەن-ءدى. كلۋب وسىلايشا ماسكوتتى جۇمىستان شىعارۋ ارقىلى اقشا ۇنەمدەۋدى جوسپارلاعان ەكەن.
