ەلىمىزدىڭ باس زاڭىنداعى 10-باپتىڭ 3-تارماعىندا قازاقستان ازاماتىنىڭ باسقا ەلدىڭ ازاماتتىعىن الۋىنا تىيىم سالىناتىنى اققا قارا جاققانداي اپ-انىق جازىلعان. بۇل كىسىلەردىڭ اتى-جوندەرىن اتاماي-اق قويايىن, كوبى ەگدە تارتقان كىسىلەر. ولار زاڭدى بەلدەن باسىپ, جازالى بولعاندارىمەن قويماي, ەلباسى مەن پرەزيدەنتتىڭ اتىنا حات جولداپ, شاعىم ايتۋدا. مازمۇنى «مەن تىڭ يگەرۋ باستالعالى قازاقستاندا ەڭبەك ەتىپ كەلەمىن. اتا-بابام دا وسى جەردە ءومىر سۇرگەن. مۇندا پاتەرىم, كولىگىم بار. ال كوشى-قون قىزمەتى مەنى ازاماتتىعىمنان ايىرىپ, ەلدەن قۋىپ جىبەرمەك. ادىلدىك قايدا؟ مەن قازاقستاننىڭ ازاماتىمىن. ەشبىر كىنام جوق, سۋدان اق, سۇتتەن تازامىن. ءيا, توقسانىنشى جىلداردىڭ باسىندا كەرەك بولىپ قالار دەپ وزىمە رەسەيدىڭ پاسپورتىن رەسىمدەپ العانمىن. ول كەزدە اۋمالى-توكپەلى زامان ەدى, جاعداي تۇسىنىكسىز بولدى. جامان ايتپاي جاقسى جوق, زامان ولاي-بۇلاي بولىپ كەتە مە دەپ وسىنداي ساقتىق جاساعانىم راس. قازىر كوشى-قون قىزمەتى مەنى قازاقستان ازاماتتىعىنان ايىرىپ وتىر. زاڭدى مارتەبەمدى قايتارىپ بەرۋىڭىزدى وتىنەمىن. ال رەسەي پاسپورتىن قازىر-اق لاقتىرىپ جىبەرۋگە دايىنمىن» دەگەنگە سايادى, – دەدى قايرات دۇتپاەۆ.
ايتەۋىر بايبالام سالۋعا شەبەر قوس ازاماتتىعى بارلارعا كوشى-قون قىزمەتى «ازاماتتىعىنان ەشكىم دە ايىرىلمايتىنىن, بۇل تەك ەرەكشە جاعدايلاردا عانا سوت ارقىلى قابىلداناتىن شارا ەكەنىن» ءتۇسىندىرىپ الەك. توقسانىنشى جىلداردىڭ باسىنداعى اۋمالى-توكپەلى زاماننىڭ وتكەنىنە 30 جىل بولدى. وسى ۋاقىتقا دەيىن ەكى ەلدىڭ ازاماتتىعىن استىرتىن ەنشىلەپ, ايىنا قازاقستاننان ءبىر, رەسەيدەن ەكى زەينەتاقى الىپ كەلگەن ازاماتتاردىڭ زاڭعا قايشى ارەكەتىن قالاي باعالاۋعا بولادى؟ وسى توپىراقتا ءوسىپ-ءونىپ, ەڭبەك ەتىپ, وسى ەلدىڭ يگىلىگىن كورىپ وتىرعان مۇنداي ازاماتتاردى قارا باسىنىڭ قامى ءۇشىن ءوز وتانىن الداعان اككى الاياقتاردىڭ قاتارىنا قوسۋدان باسقا شارا جوق.
كوشى-قون قىزمەتى باسشىسىنىڭ سوزىنشە, قوسمەكەندىلەر شەكارادان ءارى-بەرى وتەمىن دەپ ءجۇرىپ اشكەرەلەنەدى ەكەن. مۇنداي ازاماتتار تۋرالى اقپاراتتار بىزگە كوبىنە شەكاراشىلاردان كەلىپ تۇسەدى. ماسەلەن, ازامات بىلتىر شەكارانىڭ ارعى بەتىنە قازاقستاندىق تولقۇجاتپەن وتسە, بيىل رەسەيلىك پاسپورتپەن وتەدى. قوس ازاماتتىق فاكتىلەرىن انىقتاۋعا نوتاريۋستار دا كوپ كومەكتەسەدى. ولار قانداي دا ءبىر كەلىسىمشارتتاردى رەسىمدەۋگە كەلگەن ازاماتتاردىڭ قوس قۇجاتى بار ەكەنىن ەلەكتروندى بازا ارقىلى انىقتايدى. كەيدە رەسەيلىك ارىپتەستەرىمەن قۇجات سالىستىرعان زەينەتاقى قورىنىڭ قىزمەتكەرلەرى دە قوس ازاماتتىقتا جۇرگەن ادامداردى انىقتاپ جاتادى. قازىرگى تسيفرلى الەمدە ءبىر نارسەنى جاسىرۋدىڭ ءمانى جوق. كەز كەلگەن قۇپيانىڭ ايتەۋىر ءبىر اشىلاتىن كەزى بولادى. مۇنداي پايداكۇنەمدەر ەكى جەپ ۇتامىن دەپ ءجۇرىپ, ءوز ازاماتتىعىنان ايىرىلىپ قالۋى مۇمكىن. ال ءبىزدىڭ مىندەتىمىز – ازاماتتىعىنان ايىرىلعانداردى تىركەپ وتىرۋ عانا. ايتپاقشى, قازاقستاندا قوس ازاماتتىعى اشكەرەلەنگەندەر اكىمشىلىك جاۋاپكەرشىلىككە تارتىلۋى مۇمكىن, ال رەسەيدە مۇنداي ازاماتتار قىلمىستىق جاۋاپكەرشىلىككە تارتىلادى, – دەدى ق.دۇتپاەۆ.
قوستاناي وبلىسى
