ايماقتار • 26 قىركۇيەك، 2020

باتىس قازاقستاندا قوس اقىننىڭ تويى ءوتىپ جاتىر

186 رەت كورسەتىلدى

باتىس قازاقستان وبلىسىندا قازاق پوەزياسىنىڭ كورنەكتى وكىلدەرى جۇبان مولداعاليەۆتىڭ 100 جىلدىعى مەن قادىر مىرزا ءالىنىڭ 85 جىلدىعىنا وراي مەرەيتويلىق شارالار شەرۋى ءوتىپ جاتىر، دەپ حابارلايدى Egemen.kz.

سۋرەتتى تۇسىرگەن نۇربەك يحسان

بەلگىلى اقىن، قازاقستان جازۋشىلار وداعىنىڭ مۇشەسى، كسرو جانە قازاق سسر مەملەكەتتىك سىيلىقتارىنىڭ يەگەرى جۇبان مولداعاليەۆتىڭ عاسىرلىق تويى ونىڭ تۋعان جەرى – اقجايىق اۋدانى سايقۇدىق اۋىلىندا، جۇبان مولداعاليەۆ اتىنداعى ورتا مەكتەپتىڭ تاريحي- ولكەتانۋ مۇراجايىندا باستالدى. شاراعا قازاقستاننىڭ ەڭبەك سىڭىرگەن مادەنيەت قايراتكەرى، ايگىلى كومپوزيتور، ونەر زەرتتەۋشىسى، اقجايىق اۋدانىنىڭ «قۇرمەتتى ازاماتى» ءىليا جاقانوۆ ارنايى قاتىستى. وسىدان بەس جىل بۇرىن، اقىننىڭ 95 جىلدىعى قارساڭىندا مۇندا جۇبان سىنىبى اشىلعان بولاتىن. بۇگىندە مەكتەپتە تاريحي-ولكەتانۋ مۇراجايى جاساقتالعان. مارتەبەلى مەيمانداردى قارسى العان اقىن ولەڭدەرىمەن قارسى العان 11 سىنىپ وقۋشىسى مۇحيتوۆ جانايدار مۋزەيدىڭ «تۋعان اۋىلىم – تۇنعان شەجىرەم» ءبولىمىن تانىستىرىپ شىقتى.

بۇل كۇنى قۋرايلىساي اۋىلىنداعى تالاپ مەكتەپ-بوبەكجاي كەشەنىندە دە جۇبان سىنىبىن اشىلدى. وسى اۋىلدا حالىقتىڭ ءوز قارجىسىنا تۇرعىزىلعان اقىن ەسكەرتكىشىنە ارنايى بارىپ، گۇل شوعىن قويعان مەيماندار اۋدان ورتالىعىنا بەتتەدى. شارانىڭ باستى قوناعى، اقىننىڭ جارى، توقساننىڭ تورىندەگى سوفيا مالىكقىزى ۇل-قىزدارىمەن، قازاقستان جازۋشىلار وداعىنىڭ توراعاسى ۇلىقبەك ەسداۋلەت وسى شاراعا ارنايى الماتىدان كەلگەن ەدى. قازاقستان رەسپۋبليكاسى مەملەكەتتىك سىيلىعىنىڭ يەگەرى، قازاقستان جازۋشىلار وداعى باتىس قازاقستان وبلىسى بولىمشەسىنىڭ توراعاسى اقۇشتاپ باقتىگەرەەۆا، باتىس قازاقستان وبلىسى اكىمىنىڭ ءبىرىنشى ورىنباسارى مۇحتار مانكەەۆ جانە باسقالارى باستاعان قوناقتار اۋدان ورتالىعىنداعى اقىننىڭ ءزاۋلىم ەسكەرتكىشىنە ءتاۋ ەتتى. وسى جەردە «رۋحاني جاڭعىرۋ» باعدارلاماسى اياسىندا مەتسەناتتار مەن ەل ازاماتتارىنىڭ قارجىلاندىرۋىمەن سالىنعان «جۇبان» ورتالىعىنىڭ اشىلۋ سالتاناتى بولدى.

1

بۇل ورتالىقتا اقىنعا ارنالعان مۇراجاي، اقىننىڭ كىتاپحاناسى جانە اۋدان ورتالىعىنداعى بارلىق مادەني-رۋحاني شارالار وتەتىن ارنايى زال ورنالاسقان. مۇندا جۇبان اقىنعا قاتىستى جادىگەرلەر، تۇتىنعان زاتتار، اقىننىڭ جەكە كىتاپحاناسىنان الىنعان كىتاپتار جانە اقىننىڭ تۋىندى كىتاپتارى دا وسى جەرگە جيناقتالعان. وسى جەردە قوناقتاردىڭ قاتىسۋىمەن «جۇبان مولداعاليەۆ» اتتى ەستەلىك كىتابىنىڭ تانىستىرىلىمى ءوتتى.

ءدال وسىنداي مەرەيتويلىق شارالار شوعىرى قادىر مىرزا ءالىنىڭ تۋعان جەرى سىرىم اۋدانىندا دا ءوتتى. اقىننىڭ جارى سالتانات مىرزاليەۆا باستاعان قوناقتار اۋدان ورتالىعىنداعى اقىن ەسكەرتكىشىنە تاعزىم ەتىپ، قادىر مىرزا ءالى اتىنداعى مەكتەپكە سوعىپ، اقىن مۇراجايىن ارالادى. وسى كۇنى جىمپيتى سەلوسىندا اقىننىڭ اناسى ماعراش تۇرعان ۇيگە ەسكەرتكىش تاقتا ورناتىلدى. تاقتادا «بۇل ۇيدە 1978-1980 جىلدارى ارالىعىندا اقىن، قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى، تاۋەلسىز «تارلان» سىيلىعىنىڭ يەگەرى قادىر مىرزا ءالى توقتاعان» دەپ جازىلعان.

2

كەشە ورال قالاسىندا قوس اقىننىڭ مەرەيتويىنا وراي رەسپۋبليكالىق اقىندار ايتىسى باستالعان بولاتىن. ەلىمىزدىڭ ءار ايماعىنان كەلگەن 16 اقىن 8 جۇپ قۇراپ، ءسوز مايدانىنا شىقتى. وعان ايتىستىڭ بايىرعى تورەشىسى، اقىن ءجۇرسىن ەرمان باستاعان قازىلار القاسى تورەلىك ەتۋدە. پاندەميا شەكتەۋىنە بايلانىستى كورەرمەنسىز ءوتىپ جاتقان ايتىستىڭ ناتيجەسى بۇگىن كەشكە بەلگىلى بولادى.

سونىمەن بىرگە بۇگىن ورال قالاسىندا جۇبان مولداعاليەۆكە ارنالعان ەسكەرتكىش اشىلماق. «جۇبان جىرلارى – عاسىر ءۇنى» اتتى رەسپۋبليكالىق عىلىمي كونفەرەنتسيا ونلاين فورماتتا وتەدى. سونداي-اق، حاديشا بوكەەۆا اتىنداعى باتىس قازاقستان وبلىستىق دراما تەاترىندا وتەتىن «جۇبان» قويىلىمىنىڭ پرەمەراسى «Aqjaiyq» تەلەارناسىندا تىكەلەي ەفيردەن كورسەتىلەتىن بولادى.

 

 

باتىس قازاقستان وبلىسى

سوڭعى جاڭالىقتار

ۇقساس جاڭالىقتار