پارلامەنت • 25 قىركۇيەك، 2020

حالىقارالىق قۇجاتتار راتيفيكاتسيالاندى

14 رەت كورسەتىلدى

كەشە سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. دەپۋتاتتار جيىن بارىسىندا ەكى زاڭ جوباسىن تالقىلاپ، قابىلدادى. سونىمەن قاتار جالپى وتىرىس­تا سەناتورلار قوعامداعى وزەكتى ماسەلەلەر تۋرالى دەپۋتاتتىق ساۋالدار جولدادى.

 

قىرعىزدار اسىعار ەمەس

ەڭ اۋەلى «2014 جىلعى 29 ما­مىر­داعى ەۋرازيالىق ەكونومي­كالىق وداق تۋرالى شارتقا قىر­عىز رەسپۋبليكاسىنىڭ قوسىلۋى­نا بايلانىستى قىرعىز رەسپۋبلي­كا­سىنىڭ 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتتى، ەۋرازيالىق ەكونوميكالىق وداقتىڭ قۇقىعىنا كىرەتىن جەكەلەگەن حالىقارالىق شارتتاردى جانە ەۋرازيالىق ەكونوميكالىق وداق ورگاندارىنىڭ اكتىلەرىن قولدانۋى جونىندەگى جاعدايلار مەن وتپەلى ەرەجەلەر تۋرالى 2015 جىلعى 8 مامىردا قول قويىلعان حاتتاماعا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى» زاڭ قابىلداندى.

«قىرعىز رەسپۋبليكاسى ەۋرا­زيالىق ەكونوميكالىق وداققا قو­سىلۋى تۋرالى وتپەلى ەرەجەلەرگە سايكەس، وداقتىڭ كەدەندىك شەكا­را­­سىنداعى قىرعىز رەسپۋب­لي­كاسى­نىڭ بارلىق وتكىزۋ پۋنكتتەرىن 24 اي ىشىندە، ناقتى ايتساق 2017 جىلدىڭ 12 تامىزىنا دەيىن ورنالاستىرىپ، ماتەريالدىق-تەحنيكالىق جاراقتاندىرۋدى قامتاماسىز ەتۋگە مىندەتتەمە الدى.

قىرعىزستان تاراپى اتالعان مەرزىمدە مىندەتىن ورىنداپ ۇل­گەر­مەدى. وسىعان بايلانىستى مەم­لە­كەت­تەر باسشىلارى 2018 جىل­عى 14 مامىردا سوچي قالا­­سىندا مەرزىمدى تاعى دا ەكى جىل­عا، ياعني 2019 جىلدىڭ 12 تامى­زىنا دەيىن ۇزارتۋ تۋرالى حاتتا­ماعا قول قويدى. دەگەنمەن، قىر­عىزستان تاراپى ءۇشىن بۇل مەر­زىم دە جەتكىلىكسىز بولدى. سول سەبەپ­تى مەملەكەتتەر باسشىلارى 2019 جىلعى 29 مامىردا نۇر-سۇلتان قالاسىندا جوعارعى ەۋرا­زيالىق ەكونوميكالىق كەڭەس وتىرى­سىنىڭ شەڭبەرىندە «48 ايدان» «72 ايعا» دەيىن، ياعني 2021 جىل­دىڭ 12 تامىزىنا دەيىن ۇزارتۋ تۋرا­لى حاتتاماعا قول قويدى»، دەدى وسى قۇجاتقا قاتىستى بايانداما جا­ساعان قارجى ءمينيسترى ەر­ۇلان جاماۋباەۆ.

زاڭعا سايكەس، 2021 جىلعى 15 تا­مىزعا دەيىن قىرعىزستان ەۋرا­زيا­لىق ەكونوميكالىق وداقتىڭ تالاپتارىنا سايكەس ەاەو كەدەندىك شەكاراسىنداعى وتكىزۋ پۋنكتتەرىن جاڭعىرتۋعا ءتيىس. ۆەتەرينارلىق، سا­نيتارلىق، فيتوسانيتارلىق، راديا­تسيالىق باقىلاۋ جۇرگىزۋگە ار­نالعان جابدىقتى جانە كەدەندىك باقىلاۋ جۇرگىزۋگە ارنالعان تاسى­مالداناتىن جابدىقتى، ونىڭ ىشىن­دە تەكسەرىپ قاراۋعا ارنالعان رەنتگەن تەحنيكاسىن ورناتۋى قاجەت.

«قىرعىزستاننىڭ كەدەن بەكەت­تەرىندە زاماناۋي جابدىقتار ورناتىلىپ جاتىر. ونىڭ كومەگىمەن لاۋازىمدى تۇلعانىڭ قاتىسۋىنسىز سكانەرلەۋ ارقىلى تاۋارلاردى باقىلاۋ جۇزەگە اسىرىلادى. بار­لىعى اۆتوماتتاندىرىلعان: اق­پارات سكانەرلەنىپ، ورتالىق كەدەن ورگانىنا بەرىلەدى. وندا قا­جەت­تى مونيتورينگ جۇرگىزىلەدى. وتكى­زۋ پۋنكتتەرىندە تاۋاردى سايكەس ەمەس اتاۋمەن دەكلاراتسيا­لاۋ جا­ع­دايلارىن انىقتاۋعا كو­مەك­تە­سەتىن تاۋەكەلدەردى باسقارۋ جۇ­يە­سىن قولدانۋ جوسپارلانىپ وتىر»، دەدى دەپۋتات سەرگەي كارپليۋك.

سونداي-اق سەنات دەپۋتاتتارى «قازاقستان رەسپۋبليكاسى مەن بى­رىككەن اراب امىرلىكتەرى ارا­سىن­داعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى» زاڭدى قابىلدادى. شارت باس بوستاندىعىنان ايىرۋ تۇرىن­دەگى جازانى ءوز وتانىندا ودان ءارى وتەۋ ءۇشىن سوتتالعان ادامداردى ەكى مەملەكەت اراسىندا اۋىستى­رۋ مۇمكىندىگىنە بايلانىستى ماسە­لەلەردى رەتتەيدى.

اتالعان زاڭ جوباسىنا قاتىس­تى بايانداما جاساعان باس پروكۋ­روردىڭ ورىنباسارى مارات اح­مەت­جانوۆتىڭ ايتۋىنشا، ءباا-داعى جەكەلەگەن قىلمىس تۇرلەرى قازاقستان زاڭدارىندا جوق.

«مىسالى، ولاردا ورازا بۇزۋ، قوعامدىق جەردە ىشىمدىك ءىشۋ، نەكە­سىز جىنىستىق قاتىناسقا ءتۇسۋ قىل­مىس سانالادى. بىراق ەكى ەلدىڭ زاڭى بويىنشا نەگىزگى قىل­مىس پەن جازا تۇرلەرى ۇقساس. جالپى، ءبىز باسقا ەل­دە قىلمىس­تىق جاۋاپكەرشىلىككە تارتىلعان ازا­ماتتارعا قول سوزۋىمىز كەرەك. سەبەبى مەملەكەت ءۇشىن شەتەل­دەگى ازاماتتاردى قورعاۋ – كونستي­تۋتسيا جۇكتەگەن مىندەت. سون­دىق­تان قىلمىس جاسادى دەپ ايىپ­تال­عان ازاماتتاردان باس تارتپايمىز»، دەدى ول.

بۇل شارتتىڭ ماقساتى – سوت­تال­­عانداردى جازاسىن ەلىندە وتەۋ­گە جاعداي جاساۋ. قۇجاتتا سوتتال­عان ادامدى بەرۋ مەن ودان باس تار­تۋ جاعدايلارى ناقتى كورسەتىل­گەن. قازىرگى ۋاقىتتا ءبىزدىڭ التى قازاق­ستاندىق بىرىككەن اراب امىر­لىك­تەرىندە جازاسىن وتەپ جاتىر. شارت كۇشىنە ەنگەن سوڭ ولاردى ەلگە قايتارۋعا مۇمكىندىك تۋادى. قازاقستاندا سوتتالعان ءباا ازاماتتارى جوق.

«قازىر بىرىككەن اراب امىر­لىك­تەرىندە، وكىنىشكە قاراي، ءبىزدىڭ 6 ازاماتىمىز، ونىڭ ىشىندە 5 ەر ادام جانە ءبىر ايەل ادام قاماۋدا وتىر. تيىسىنشە، وسى زاڭعا ەل پرە­زي­دەنتى قول قويعان كەزدە قازاقستان رەسپۋبليكاسىنىڭ باس پروكۋراتۋراسى ۋاكىلەتتى ورگان رەتىندە ولاردى وتانىنا قايتارۋ شارالارىن قابىلدايدى»، دەدى دەپۋتات ساۋلە ايتپاەۆا.

 

بالالاردىڭ قاۋىپسىزدىگىنە – باستى نازار

سونىمەن قاتار سەناتتىڭ جال­پى وتىرىسىندا دەپۋتاتتار بىر­قاتار ساۋال جولدادى. دانا نۇرجىگىتوۆا بالالاردىڭ قۇقىق­تارىن قورعاۋ بويىنشا شارالار قابىلداۋ تۋرالى ماسەلە كوتەر-
ءدى.

«حالىقارالىق تاجىريبەنى سارالاپ، قىلمىستىق زاڭناما قول­دانىسىن تالداپ، بالالارعا قارسى جىنىستىق سيپاتتا جاسالعان قىلمىستىڭ بارلىق تۇرلەرىنە قاتىستى جازانى قايتا قاراپ، قاتاڭداتۋ بويىنشا ۇسىنىستار ازىرلەۋدى سۇرايمىز»، دەدى سەناتور باس پروكۋرورعا جولدانعان ءوز ساۋالىندا.

سونداي-اق دەپۋتات مەملەكەت باسشىسىنىڭ وسى ماسەلە بويىنشا بەرگەن تاپسىرماسىنىڭ ورىندالۋ بارىسى تۋرالى اقپارات بەرۋدى سۇراپ، بۇل سالاداعى حالىقارالىق كونۆەنتسيالارعا قوسىلۋ جانە يم­پلە­مەنتاتسيالاۋ بويىنشا زاڭ­نامالىق ۇسىنىستار ەنگىزۋ قاجەت­تىگىن اتاپ ءوتتى.

دەپۋتات كەلتىرگەن ستاتيستيكاعا سۇيەنسەك، قازاقستاندا سوڭعى 4 جىل­دا وسىنداي قىلمىستار ءۇشىن 1868 ادام كىنالى دەپ تانىل­عان. ولاردىڭ 539-ى عانا 10 جىل­عا دە­يىنگى مەرزىمگە باس بوستاندى­عىنان ايىرىلعان. بيىلدىڭ وزىندە عانا كامەلەتكە تولماعان بالالارعا قارسى جاسالعان قىلمىس 8 پايىزعا وسكەن.

«مۇنى توقتاتۋ ءۇشىن قاتاڭ جازا قىلمىستى جاساعان ادامعا عانا ەمەس، سول قىلمىسقا جول بەر­گەن، فاكتىلەردى جاسىرعان، قىل­مىس­كەردىڭ جالتارۋىنا مۇمكىندىك بەرگەن ازاماتتارعا دا قولدانىلۋى كەرەك دەپ ويلايمىز»، دەدى سەنات دەپۋتاتى.

ال دەپۋتات ناريمان تورەعا­ليەۆ ءوز كەزەگىندە ۆيتسە-سپيكەر ن.ءابدىروۆ جانە وزگە دە سەناتورلار باستاعان دەپۋتاتتىق توپتىڭ اتىنان پرەمەر-مينيسترگە ساۋال جولدادى. وندا جاسوسپىرىمدەردى كيبەربۋللينگتەن قورعاۋ شارا­لارىنىڭ كەرەكتىگى ايتىلعان. بۇل تاقىرىپ سوڭعى ۋاقىتتا باق-تا قىزۋ تالقىلانىپ كەلەدى.

دەپۋتاتتىڭ ايتۋىنشا، الەم­دىك ستاتيستيكا بويىنشا ادام كۇنىنە 6-7 ساعات ينتەرنەت­تە وتىرادى. سوندىقتان كيبەربۋللينگتىڭ قۇربانى كەز كەلگەن ادام بولۋى مۇمكىن. الايدا زارداپ شەك­كەندەر مەن ولاردىڭ قۋدالاۋ­شىلارىنىڭ نەگىزگى جاسى 11-16 جاس ارالىعىنداعى جاس­وسپى­رىمدەر. سەناتور ەلىمىزدەگى جاسوس­پىرىم­دەردىڭ 12%-عا جۋىعى وسى كيبەر­بۋللينگتەن زارداپ شەگىپ وتىر­عانىن جەتكىزدى.

«الەۋمەتتىك جەلىلەر ارقىلى تارالعان ويىندار «كوك كيت»، «تىنىش ءۇي»، «قىزىل جاپالاق»، «مەنى ساعات 04:20-دا ويات»، ت.ب. دۇنيە ءجۇزىن دۇرلىكتىرىپ قانا قوي­ماي، ەندى وسىنداي ويىندار قازاق تىلىندە پايدا بولا باستاعانى قوعامدى الاڭداتىپ وتىر. ىشكى ىستەر مينيسترلىگىنىڭ مالىمەتىنە سايكەس، ارىس قالاسىنىڭ  تۇرعىنى «ۆكونتاكتە» الەۋمەتتىك جەلىسى جانە «Telegram» مەسسەندجەرى ارقىلى بالالاردى سۋيتسيدتىك سيپاتتاعى ويىندارعا تارتقانى  انىقتالدى. سوندىقتان ءدال قازىرگى قوعام ءۇشىن ادامنىڭ قۇقىقتارىن، سونىڭ ىشىندە بالالاردىڭ قۇ­قىق­تارىن قورعاۋ، ولاردى بۋللينگ پەن كيبەربۋللينگتەن ساقتاۋ ماڭىزدى»، دەدى ن.تورەعاليەۆ.

 

بوزداقتاردى قۇرمەتتەۋ – ۇرپاققا پارىز

سەنات دەپۋتاتى ءالىمجان قۇر­تاەۆ قازاقستان رەسپۋب­لي­كاسىنىڭ پرەمەر-ءمينيسترى ا.مامينگە جولداعان دەپۋتاتتىق ساۋالىندا قاپىدا تۇتقىنعا تۇسكەن، جات جەردە كوز جۇمعان بىرنەشە ءجۇز مىڭداعان قازاقستاندىق جاۋىن­گەردى ەكىنشى دۇنيەجۇزىلىك سوعىس­تىڭ 75 جىلدىعىنا وراي اقتاۋ ماسەلەسىن كوتەردى.

دەپۋتاتتىڭ ايتۋىنشا، اقتال­ماعانداردىڭ ءبىرى – سوعىس قۇربانى ءالىم المات. ول 1939 جىلى قىزىل اسكەر قاتارىنا شاقىرىلىپ، 1941 جىلى ەلگە قايتار كەزدە سوعىس باس­تالىپ كەتەدى. ماۋسىم ايىنىڭ سوڭىندا ءا.المات ديۆيزياداعى 560 اداممەن بىرگە تۇتقىنعا تۇسەدى. بىراق قازاقتىڭ ءبىرتۋار پەرزەنتى مۇستافا شوقايدىڭ جارى ماريا شوقايدىڭ كومەگىمەن تۇتقىننان بوساپ شىعىپ، مۋزىكا ۋچيليششەسىنە وقۋعا قابىلدانادى. تالانتتى مۋزىكانت اۋەلى پاريجدەگى كونسەرۆاتوريادا وقيدى، كەيىن تۇرىك ەلشىلىگى ارقىلى تۇركيا ازاماتتىعىن الادى. سول ەلدە ومىردەن وزدى.

«بۇل – ءبىر ادامنىڭ تاعدىرى. مۇن­داي ادامدار جۇزدەپ، مىڭ­داپ سانالادى. قورعانىس مينيستر­لىگىنىڭ بەرگەن مالىمەتى بويىن­شا، قازاقستاننان سوعىسقا اتتان­عان ازاماتتاردىڭ سانى – 1 196 164 ادام. سونىڭ ىشىندە 322 462 ادام مايداندا كوز جۇمعان. سو­عىس­تان ورالعانداردىڭ سانى – 595 153 ادام، ال سوعىستان ورالما­عان­داردىڭ سانى – 601 011 ادام. دەمەك، ءالىم الماتپەن تاعدىرلاس 600 مىڭنان استام ادام بار دەگەن ءسوز. حاتىمىزدى ازىرلەۋ بارىسىندا ەكىنشى دۇنيەجۇزىلىك سوعىسقا قاتىسۋشىلاردىڭ ناقتى سانىن بىلمەك بولىپ، قورعانىس جانە ىشكى ىستەر مينيسترلىگىنە، ۇلتتىق قاۋىپسىزدىك كوميتەتىنە سۇراۋ سالىپ، حات جازدىم. جاۋدىڭ تۇتقىنىنا تۇسكەن قازاق جاۋىنگەرلەرىنىڭ اقتالعان جانە اقتالماعاندارىنىڭ سانى جونىندە اقپارات الۋ ءۇشىن قۇزىرلى مەكەمەلەر سىرعىتپا جاۋاپ جازىپ، ءبىر-بىرىنە سىلتەدى. ىشكى ىستەر مينيسترلىگىنىڭ جاۋابىندا ارحيۆتىك قۇجاتتاردىڭ قۇپيا ەكەنى ايتىلعان. سوندا ءبىز تۇتقىنداردىڭ تاعدىرىن كىمنەن جاسىرىپ، قۇپيا ۇستايمىز؟ كەڭەستىڭ كەلمەسكە كەتكەنىنە 30 جىلعا جۋىقتاسا دا، قۇلدىق سانادان ارىلا الماي، جات ەلدە جوقتاۋسىز قالعان بوز­داق­تارىمىزدىڭ رۋحىنىڭ الدىندا دارمەنسىزدىك تانىتىپ وتىرمىز. الەمنىڭ بارلىق ەلدەرى جەرىنىڭ تۇتاستىعى، حالقىنىڭ ازاتتىعى ءۇشىن كۇرەسكەن جاۋىنگەرلەرىن اق­تاپ، مەملەكەتتىك اكتىلەر قابىل­دادى. ءسويتىپ اقيقات پەن ادىلدىكتى قالپىنا كەلتىردى.

قورعانىس مينيسترلىگى سوعىس­تان قايتپاعانداردىڭ سانى 601 011 ادام دەگەن دەرەكتى جاريالادى. جاپون، نەمىس، امەريكا حالقى سو­عىستا ولگەن ءار سولداتىنىڭ سۇيە­گىن، توپىراعىن ەلىنە اپارىپ، قۇر­مەتتەپ جەرلەيدى. ەگەر ءبىز ادىلەت­تىلىك سالتانات قۇرسىن دەسەك، سوعىس تۇتقىندارىنىڭ بارلىعىن اقتاۋ تۋرالى ارناۋلى قاۋلى شىعا­رىپ، مەملەكەتتىك دەڭگەيدە وبەك­تيۆتى باعا بەرۋىمىز كەرەك»، دەدى سەناتور ءا.قۇرتاەۆ. 

ءا.قۇرتاەۆ وسىعان بايلانىس­تى مىناداي ماسەلەلەردى شەشۋدى ۇسىندى. سوعىس تۇتقىندارىنا قا­تىستى رەسمي مالىمەتتەر تياناق­تالىپ، ءبىر جۇيەگە كەلتىرىلىپ، حا­لىق­قا اشىق قولجەتىمدى بولۋى ءتيىس ەكەنىن اتاپ ءوتتى. سونداي-اق تۇت­قىندا قازا تاپقان بارلىق جاۋىن­گەرىمىزدىڭ تاعدىرىن تولىق زەرتتەپ، اتى-ءجونىن ەلگە جاريالاۋ قاجەتتىگىن جەتكىزدى.

سەناتور وتانىن جاۋدان قور­عاۋ جولىندا كوز جۇمعان، جات ەل­دەردە قالعان بارلىق سوعىس تۇت­قىن­دارىن اقتايتىن ارنايى قاۋ­لى شىعارىپ، مەملەكەتتىك اكتى قا­بىلداۋدى ۇسىندى. سونداي-اق سوعىس قۇربانى، قاپىدا جاۋ قولىنا تۇسكەن ءالىم الماتتىڭ ءومىرى مەن ونەرى جولىنان سىر شەرتەتىن، جاس ۇرپاق ءۇشىن تاعىلىمى مول كوركەم فيلم ءتۇسىرۋ تۋرالى دا ۇسىنىس ايتتى.

 

جوندەلمەگەن جولدىڭ جاي-كۇيى تولعاندىرادى

سەناتور ولگا پەرەپەچينا پرە­مەر-ءمينيستردىڭ اتىنا جول­داعان دەپۋتاتتىق ساۋالىندا سۋب­ۆەن­-
تسيالار مەن جوعارى تۇرعان بيۋدجەتتەردەن بەرىلەتىن نىسانالى ترانسفەرتتەر اۋىل اكىمدىكتەرىنىڭ شىعىستارىن قارجىلاندىرۋدىڭ نەگىزگى كوزى ەكەنىن اتاپ ءوتتى.

دەپۋتاتتىڭ ايتۋىنشا، قازاق­ستانداعى اۋىل تۇرعىندارى وز­دەرىنىڭ ماڭىزدى ماسەلەلەرىن 4-ءشى دەڭگەيدەگى بيۋدجەت قارجىسى ەسەبىنەن شەشۋگە مۇمكىندىگى بار. بۇل سۋمەن جابدىقتاۋعا، جولداردى جون­دەۋگە جانە كۇتىپ ۇستاۋعا، سونداي-اق باسقا دا ماسەلەلەرگە قا­تىس­تى. دەگەنمەن، ءىس جۇزىندە بۇل سالا­لار اۋداندىق بيۋدجەتتەن قار­جى­لاندىرىلادى، كەيدە مۇلدە قار­­جىلاندىرىلمايدى جانە جەر­گى­لىكتى جۇرتشىلىقتىڭ بۇل شەشىم­دەر­دىڭ قابىلدانۋىنا ىقپالى جوق. بيۋدجەتتەگى تەپە-تەڭسىزدىك­تىڭ نە­گىزگى سەبەبى حالىق سانى 2 مىڭ­نان كەم اۋىلدىق بيۋدجەتتەردىڭ شى­عىس­تارىن ءوز كىرىستەرىمەن قامتا­ماسىز ەتۋدىڭ تومەندىگىندە. ال ەلى­مىزدە ولاردىڭ سانى 1301-گە جەت­كەن. ياعني، 56 پايىزدى قۇرايدى.

دەپۋتات ءوزىنىڭ ءسوزىن قورى­تىن­دىلاي كەلىپ، ءبىر قىزمەتكەر بىرنەشە فۋنكتسيانى قاتار ورىندايتىن اۋىلدىق وكرۋگتەردەگى اپپاراتتاردى 25%-عا وڭتايلاندىرۋ ولاردىڭ جۇمىس ساپاسىنا تەرىس اسەر ەتەتىنىن اتاپ ءوتتى.

اتىراۋ وبلىسىنداعى جولدار­دىڭ جاي-كۇيى تولعاندىرعان سەناتور عۇمار دۇيسەمباەۆ ۇكىمەت باس­شىسى اسقار ءماميننىڭ اتىنا دەپۋتاتتىق ساۋال جولدادى. بۇل وڭىردە اتىراۋ – ورال جانە مۇقىر – قۇلسارى اۆتوجولدارىن قايتا جاڭارتۋ جوسپارلانعان-دى. مەملەكەت باسشىسىنىڭ تاپسىرماسى بويىنشا «نۇرلى جول» مەملەكەتتىك باعدارلاماسى اياسىندا 2025 جىلعا دەيىن 24 مىڭ شاقىرىم رەسپۋبليكالىق جول جاڭارتىلادى.

دەپۋتاتتىڭ ايتۋىنشا، رەس­پۋبليكالىق ماڭىزى بار اۆتو­جول­داردىڭ وبلىستاعى جاقسى جانە قاناعاتتانارلىق جاعدايداعى ۇلەسى نەبارى 66%-دى قۇرايدى. كە­يىنگى جىلدارى وڭىردەگى جول-كولىك وقيعالارى دا ازايماي تۇر.

«2021-2023 جىلدارعا ارنالعان رەسپۋبليكالىق بيۋدجەت جوبا­سىندا وسى ماقساتتارعا 4،4 ملرد تەڭگە مولشەرىندە قاراجات كوزدەل­گەن. 1 شاقىرىم اۆتوجولدى قايتا جاڭار­تۋدىڭ بولجامدى قۇنى 400-600 ملن تەڭگەنى قۇرايدى، ال قۇ­رىلىستىڭ نورماتيۆتىك ۇزاق­تىعى – 3 جىل. كورسەتىلگەن قارا­جات پەن بەلگىلەنگەن مەرزىمدە ۇزىندىعى 487 شاقىرىم جولدى قايتا جاڭعىرتۋ جۇمىستارىنىڭ تابىستى بولعانىنا كۇمان تۋادى»، دەدى ع.دۇيسەمباەۆ.

دەپۋتات سونىمەن قاتار قات­تى جابىنى مۇلدە جوق مۇقىر – قۇلسارى جولىنىڭ ناشار جاع­دايىنا الاڭداۋشىلىق ءبىلدىردى. بۇل اۆتوجول – اقتاۋ تەڭىز پورتى مەن قازاقستاننىڭ قالعان بولى­گى اراسىنداعى اقتوبە وبلىسى ارقىلى وتەتىن ەڭ قىسقا كولىك قاتىناسى. اۆتوجولدى قايتا جاڭار­تۋ جولدى 150 شاقىرىمعا قىس­قارتۋعا جانە اتىراۋ – اقتاۋ جولىنداعى كولىك سانىن ازايتۋعا مۇمكىندىك بەرەدى.

«مەملەكەتتىك باعدارلامادا قارجىلاندىرۋ كوزى كورسەتىلمەگەن. ۇكىمەت جوعارىدا اتالعان جوبالاردى قارجىلاندىرۋ كوزدەرىن انىقتاۋ جانە ولاردى ۋاقتىلى اياقتاۋ جونىندە قاجەتتى شارالار قابىلداۋى قاجەت»، دەدى دەپۋتات.

سوڭعى جاڭالىقتار

ۇقساس جاڭالىقتار