نىسان قازاننىڭ سوڭىنا دەيىن تولىقتاي ىسكە قوسىلۋى ءتيىس ەكەنىن قۇرىلىسشىلار بىلەدى. سوندىقتان دا ولار جاۋاپكەرشىلىكتى سەزىنىپ, وزدەرىنە جۇكتەلگەن جۇمىستاردى ساپالى اتقارىپ كەلەدى.
وبلىس باسشىلىعىنىڭ ايتۋىنشا, پۋلمونولوگيا ورتالىعىن جابدىقتاۋ ءۇشىن ەڭ زاماناۋي جانە قاجەتتى جابدىقتار ساتىپ الىنعان. كوروناۆيرۋستىڭ جاڭا تولقىنى بولا قالعان جاعدايدا, 5 300 ينفەكتسيالىق جانە پروۆيزورلىق توسەكتىك ورىن, 5 پتر زەرتحانا دايىندالدى. زەرتحانانىڭ ارقايسىسى كۇنىنە مىڭ تالداۋ جاساۋعا قاۋقارلى. ياعني, تۇرعىندار تەست تاپسىرسا, ناتيجەسىن اپتالاپ-ايلاپ كۇتپەيدى. سونىمەن قاتار قوسىمشا 3 كومپيۋتەرلىك توموگراف ساتىپ الىندى.
ەل-جۇرتتى ابىگەرگە سالعان پاندەميا اياقتالىپ, زامان تىنىشتالعان سوڭ پۋلمونولوگيا ورتالىعى ماماندارى تەك ناۋقاستاردى ەمدەۋمەن اينالىسپايدى, تىنىس الۋ اۋرۋلارى بار جاندار ءۇشىن ەڭ وزىق مەديتسينالىق تەحنولوگيالار قولدانىلاتىن عىلىمي مەكەمە بولادى.
بولۋى ىقتيمال پاندەميانىڭ ەكىنشى تولقىنىنا اۋدانداردا دا دايىندىق قارقىنى باسەڭدەگەن ەمەس. بەسقاراعاي اۋدانىندا قۇرىلعان BIRLIK قايىرىمدىلىق قورىنىڭ كومەگىمەن وتتەگى كونتسەنتراتورى اپپاراتىن ءتيىمدى باعامەن ساتىپ الۋعا مۇمكىندىك تۋدى. اتالعان قور ارقىلى اۋداندىق اۋرۋحاناعا ءبىر وتتەگى كونتسەنتراتورىنىڭ اپپاراتىن, ەكى پۋلسوكسيمەتر, ءۇش تونومەتر ساتىپ الىندى. سونىمەن قاتار مەملەكەتتىك قىزمەتشىلەر, Nur Otan پارتياسىنىڭ اۋداندىق فيليالى جانە باسقا دا قىزمەتكەرلەر بىرىگىپ, ورتالىق اۋرۋحانانى تاعى ءبىر وتتەگى كونتسەنتراتورى اپپاراتىمەن قامتىدى. اۋدانعا جاناشىرلىق تانىتۋدان جەرگىلىكتى كاسىپكەرلەر دە شەت قالىپ جاتقان جوق. ولار دا ءدال وسىنداي اپپاراتتىڭ ەكەۋىن تابىس ەتتى. ودان بولەك مەديتسينالىق قۇرال-جابدىقتار جەتكىزىپ بەرگەن.
ال كاتونقاراعاي اۋداندىق اۋرۋحاناسىنا قۇنى 52 ملن تەڭگە تۇراتىن جاڭا تسيفرلى رەنتگەن اپپاراتى الىندى. اپپاراتقا وبلىستىق بيۋدجەتتەن قاراجات ءبولىندى.
مامانداردىڭ ايتۋىنشا, جاڭا قۇرىلعىنىڭ ارتىقشىلىعى – ساۋلە وتكىزۋ قابىلەتى جوعارى, زياندى دوزا مولشەرى تومەن. رەنتگەن سۋرەتىنىڭ ساپاسى اناعۇرلىم ارتىق.
پاندەميا حالىققا ۇيىمشىلدىق, بەرەكە-بىرلىك كەرەگىن تۇسىندىرگەندەي بولدى. دەنساۋلىققا ءمان بەرگەن ەلدىڭ مەيىرىمى ارتتى. حالىق قول قۋسىرىپ, جوعارىدان كومەك كۇتپەدى. وزدەرى امالىن تاپپاسا, تارالعان ىندەت ۋاقىتقا قارامايتىن ەدى. ءسويتىپ بىرلىگى بەكەم ەل ءبىر كىسىدەي قۇرىلعان قورلارعا اقشا اۋدارىپ, تامشىداي بولسىن ۇلەستەرىن قوستى. سول ءۇردىس شىعىستا ءالى دە جالعاسىپ كەلەدى.
شىعىس قازاقستان وبلىسى
