جۋىردا عانا الەۋمەتتىك جەلىدە قوعام بەلسەندىلەرى قاسىم قايسەنوۆتىڭ ءمۇسىنى ءوز ەسىمىمەن اتالاتىن ساياباقتىڭ ءبىر پۇشپاعىندا قالعانىن جازىپ, ماسەلە كوتەردى.
– قازاقتىڭ قاسىمىنىڭ اتىنداعى ساياباقتا كيروۆ توردە, قاسىمنىڭ ەسىكتە تۇرعانى ەلدىگىمىزگە سىن! سۇيەككە تاڭبا! قاسىم كىم, كيروۆ كىم!؟ كيروۆ لەنين مەن ستاليننەن ارتىق ەمەس قوي. ەسكەرتكىشىن ورنىنان تايدىرىپ, سول جاعالاۋداعى يدەيالىق تۇرعىدا ەسكىرگەن ەسكەرتكىشتەردىڭ قاتارىنا باياعىدا اپارىپ قويۋعا بولاتىن. ال قاسىمعا ۇلكەن ەسكەرتكىش جاسالۋى ءتيىس. ول ولە-ولگەنشە شىعىسىن ءسۇيىپ ءوتتى, – دەيدى قوعام بەلسەندىسى, «التاي اسۋ» قوعامدىق بىرلەستىگىنىڭ تەڭ توراعاسى ءتۇسىپحان تۇسىپبەكوۆ.
حالىق قاھارمانىنىڭ ءبيۋستىن كورىپ قايتايىن دەپ ساياباققا ءبىز دە بارعان ەدىك. ساياباق ءىشى جايقالىپ تۇر. جايقالعان ساياباقتىڭ قاق ورتاسىندا قولىن كوككە سوزعان باياعى كيروۆتىڭ ءمۇسىنى مەنمۇندالايدى. ورنىندا قاسقايىپ قاسىم قايسەنوۆ تۇرسا قانداي عاجاپ؟! ەگەمەندى ەلىمىزدىڭ ۇرپاعى باتىر باباسىن ءبىلىپ وسەر ەدى. ال بالاعا كيروۆتى كىم دەپ تۇسىندىرەمىز؟!
كۇزەتشىگە تاقاپ بارىپ, قايسەنوۆتىڭ ءمۇسىنى قايدا تۇرعانىن سۇرادىم. ءسال توسىرقاپ قالدى دا جول سىلتەدى. ويلانىپ قالعانىنا قاراعاندا, كۇزەتشى دە ناقتى بىلمەيتىندەي كورىندى. كوز الدىندا تۇرماعان سوڭ قايدان ءبىلسىن؟! سويتسەم, ەتنواۋىل جاقتاعى قورشاۋدىڭ ىشىندە تۇر ەكەن. ىشىندە بولعاندا دا ءبىر قۋىسىندا. ادام اياعى باسا بەرمەيتىن كولەڭكەلەۋ ءبىر بۇرىش.
قىل اياعى بەلگىلى پارتيزان جازۋشىنىڭ ليحارەۆ قۇرلى قۇنى جوق پا ەدى؟! جۋىقتا عانا قالانىڭ ورتاسىنان ليحارەۆقا ارنالعان ءمۇسىندى ەرتىستىڭ جاعالاۋىنا جارقىراتىپ تۇرىپ ورناتتى. بار ەڭبەگى – 1700 جىلدارى قازاقتىڭ جەرىنە بەكىنىس سالعان دەيدى. ال كيروۆ كىم؟ قازاق ءۇشىن باسىن بايگەگە تىگىپ پە ەدى؟ ورىس رەۆوليۋتسيونەرى, ساياسي قايراتكەر ەكەن. ءومىربايانىنان «قازاقستان ءۇشىن تەر توكتى» دەگەندەي جولداردى تاپپادىق. ءبىر بايقاعانىم, كيروۆ ولتىرىلگەننەن كەيىن قىرعىن رەپرەسسيا باستالعان.
«ەلۋ جىلدا ەل جاڭا». تاريحتى تارازىلاپ, ۇلت مۇددەسى ءۇشىن كۇرەسكەن تۇلعالاردى ۇرپاق الدىندا ناسيحاتتاي بەرۋىمىز كەرەك. مۇسىندەرىن قويايىق, ەسىمدەرىن كوشەگە بەرەيىك. پاتريوتتىق تاربيە دەگەن سول.
وسكەمەن
