ونەر • 16 قىركۇيەك، 2020

سۋرەتشى قىزدىڭ سىرلى الەمى

28 رەت كورسەتىلدى

قاي ءبىر جىلدارى شىبىندىكولدىڭ جاعاسىندا ەلىمىزدىڭ ەڭ شەبەر سۋرەتشىلەرى ەتيۋد جازعان. تابيعاتتىڭ سان ءتۇرلى رەڭىن كەنەپكە تۇسىرگەن قىلقالام شەبەرلەرى جاس سۋرەتشىلەرگە دە باعىت-باعدار بەرگەن بولاتىن. سونداعى جاستاردىڭ ىشىنەن «بىلسەم، ۇيرەنسەم» دەپ ۇمتىلىپ تۇرعانداردىڭ ءبىرى – ولگا چاۆكينا ەدى. ءبىلىمى ەش كەتپەدى. «100 جاڭا ەسىم» جوباسىنىڭ جەڭىمپازى اتاندى.

 

وسكەمەندىك قىز ونەر جولىن­دا از تەر توگىپ جۇرگەن جوق. با­لا جاسىنان الدىنا ماقسات قويدى. ارمانىنا جەتۋ جولىن­دا تاباندى ەڭبەك ەتتى، ىزدەندى، وقىدى. بەلگىلى سۋرەتشى نيكولاي اش­تە­مانىڭ ستۋدياسىندا ونەر­دىڭ قاسيەتىن، بوياۋدىڭ سىرىن سە­زىنىپ بارىپ كوللەدجگە وقۋ­عا ءتۇ­ستى. قۇماش نۇر­عاليەۆ اتىن­دا­عى ءبىلىم ورداسىندا بىلىكتى ۇس­تازداردان ءتالىم الدى.

– ەس بىلگەلى سۋرەتشى بولۋدى ارماندادىم. ءوز ستۋديام بول­­سا دەيتىنمىن. تەلەديداردان ۇل­كەن سۋرەتشىلەردى كورسەتىپ جات­قاندا كوز الماي قاراپ وتىراتىنمىن. قىش قۇمىرادا تۇرعان قىلقالامدارىنا، كەرىلگەن كە­­نەپتەرىنە قىزىعاتىنمىن. جال­پى شەبەرحانالارىنىڭ اتموسفەراسىن سەزىنگىم كەلەتىن. جا­قىن­دارىما، ۇستازدارىما ال­عى­سىم شەكسىز. سولاردىڭ قول­داۋ­لارىنىڭ ارقاسىندا ارمانىما جەتتىم، دەيدى ولگا چاۆكينا.

1

ارمانىنان اداسپاعان سۋرەتشى قىز وقۋ قابىرعاسىندا جۇرگەندە وسكەمەننىڭ ساياباقتارىندا ەتيۋد جازىپ، شەبەرلىگىن شىڭدايتىن. شىندىعىندا شەبەرلىگىن شىڭ­دايىن دەپ ەمەس، مايلى بوياۋمەن كارتينا جازۋدى جانى قالاعان سوڭ قىلقالامىن قولعا الاتىن. سۇيرىك ساۋساقتارىمەن تۋعان قا­لا­سىنىڭ كورىكتى كوشەلەرىن كەنەپكە تۇسىرەتىن. كارتينالارى قا­نىق شىققان سايىن شابىتتانا جازاتىن.

ءبىر اقيقاتى، ولگا و باس­تا ونەر ارقىلى تابىس تابۋدى كوزدەمەگەن. ونەردىڭ قادىرىن، قا­سيەتىن قاشىرعىسى كەلمەسە كەرەك، ساتۋ ءۇشىن جارقىراعان سۋرەت سالعان جوق. كەيىن عانا ءستي­­لى قالىپتاسىپ، تاجىريبەسى تو­لىسقان سوڭ تاپسىرىسپەن پورترەت، پەيزاج سالا باستاعان. تاپ­سىرىستىڭ ءوزىن تاقىرىبىنا، ماڭىزىنا قاراي قابىلدايدى. ءساتتى شىققان اۆتورلىق تاقىرىپ­تىق جۇمىستارىن الىس-جاقىننان كەلگەن شەتەلدىك كوللەكتسيونەرلەر قۇدا ءتۇسىپ، قۇن تولەپ ساتىپ تا العان.

1

جالىندى جاسقا ەلدەگى باع­دارلامالاردىڭ دا زور پايداسى ءتيدى. 2018 جىلى الەۋمەتتىك «Zhas Project» جوباسىندا مەم­لەكەتتىك گرانت ۇتىپ الىپ، شى­عار­ماشىلىعىن جاڭا بەلەسكە كوتەردى. اتالمىش جوبا اياسىندا كوپبالالى جانە الەۋمەتتىك ءال-اۋقاتى تومەن وتباسىلاردىڭ بالالارىن جيناپ، بەينەلەۋ ونەرىنەن تەگىن ۇيىرمە وتكىزە باس­تادى. ءبىر شاڭىراق استىنا قىلقالام ۇستاعان وسكەمەننىڭ ونەرلى جاستارىن ۇيىس­تىردى. وسىلايشا وبلىس ور­تالىعىندا «Perfomance» ارت-ستۋ­دياسىن قۇرىپ، ەسىگىن ايقارا اشتى.

باستارى ونەردە توعىسقان جاس ۇجىم ۆولونتەرلىك جۇمىس­تاردان دا شەت قالىپ كەلە جاتقان جوق. سۋرەتشىلىك، ديزاينەرلىك مامان­دىقتى تاڭداعان تۇلەك­تەر­گە شەبەرلىك ساباقتارىن وت­كىزەدى. ولگا ەرجانقىزى وسكەمەن قالالىق جاستار ءماسلي­حاتىنىڭ دەپۋتاتى بولعان سوڭ مۇمكىندىگىنشە شاھارداعى قو­عام­دىق جۇمىستارعا دا ارالاسىپ تۇرادى. اسىرەسە جاستار ماسە­لەسىنە كەلگەندە ءوزىنىڭ ۇستانىمى، وي-پىكىرى بار.

1

– مەنىڭ ويىمشا تالانتتار تاسادا قالماۋى ءتيىس. جۇمىستارىن كورسەتۋىمىز كەرەك. وسى ۋاقىتقا دەيىن جاس سۋرەتشىلەردىڭ تۋىن­دىلارىنان بىرنەشە كورمە ۇيىم­د­استىردىق. كوپشىلىككە ۇنادى. اسىرەسە «My Self» جوباسى ايا­سىن­داعى كورمە قالالىقتاردى قىزىقتىردى، – دەيدى «100 ەسىم» جوباسىنىڭ جەڭىمپازى.

سونىمەن قاتار ارت-ستۋديا شەبەرلەرىنىڭ كورمەسى بىلتىر سەمەيدەگى نەۆزوروۆتار وتبا­سى­نىڭ مۋزەيىندە «رۋحتى شى­عىس» ارت-فەستيۆالى اياسىندا ءوتتى. قانداي كورمە بولسىن، ول­گا چاۆكينا پورترەتتەرمەن قاتار تابيعاتتا جازعان پولوت­نولا­رىن ۇسىنادى. ويتكەنى تا­بيعاتتا جازىلعان كەنەپتەن شى­عار­ماشىلىقتىڭ ءيىسى اڭقىپ، دالا سارىنى سەزىلىپ تۇرادى دەيدى. سوندىقتان دا ولگا ارا-تۇرا شى­عىس­تىڭ كورىكتى جەر­لەرىن ارالايدى. تابيعات اياسىنا ەتيۋدنيگىن قۇرىپ قويىپ، اي­نا­لاسىنان كەنەپكە تۇسىرەتىن تۇستەردىڭ ۇيلەسىمىن ىزدەيدى. وسىن­­دايدا سۋرەتشى جانى تابي­عاتپەن ۇندەسىپ، شىنايى تۋىندى دۇنيەگە كەلەدى. ماسەلەن، وت­كەن جىلدارى مۇزتاۋدىڭ ەتە­گىنە ارنايى بارىپ، كوككولدى كەنەپكە تۇسىرگەن. باس سالىپ تۇسىرە سالعان جوق، الدىمەن كو­رۋ نۇكتەسىن ىز­دەگەن. ءار تۇستان قاعازعا نوبا­يىن سىزىپ كورگەن. ابدەن ۇيلە­سىم تاپقان سوڭ بارىپ مايلى بوياۋ­مەن جازعان. كەيىن ول شىعارماسى ونەرتانۋشىلاردىڭ، كاسىبي سۋ­رەتشىلەردىڭ جوعارى باعاسىنا يە بولدى. «التاي – قازاقستاننىڭ ءىنجۋ-مارجانى» اتتى حالىقارالىق پلەنەرگە ەڭ جاس سۋرەتشى رەتىندە قاتىسىپ، ءسات­تى-ءساتتى پولوتنولار جازعانى تاعى بار.

1

ولگا ەرجانقىزى پەيزاجدىڭ عانا ەمەس، پورترەت سالۋدىڭ دا شەبەرى. كىمنىڭ پورترەتىن سالسا دا جان-دۇنيەسىنە تەرەڭ ءۇڭى­لىپ بارىپ قولىنا قارىنداش الا­دى. شىنايىلىققا جاقىن قىز پورترەتتى دە ناتۋرادان قاراپ سا­لۋدى ءجون دەپ سانايدى. ياعني كەيىپكەرى قاراما-قارسى وتىر­عاندا عانا مىنەز-قۇلقى، بار بولمىسى پورترەتتە تولىق اشىلاتىن كورىنەدى.

سۋرەتشى قىزدىڭ ايتۋىنشا، شەبەرحانا قابىرعاسىنان شىقپاي كارتينا جازۋ مۇمكىن ەمەس. ستۋ­ديادا شەبەردىڭ پا­ليتراسى جاتتاندى، ءبىرىزدى بولىپ كەتەدى. ال ولگا شەتەلدەر­گە دە بارىپ تۇراتىن. بيىل عانا ەلدەگى جاع­دايعا بايلانىستى شەبەرحانا شاڭىراعىنان كوپ شىقپادى. ونىڭ وزىندە ونلاين تۇردە ەلىمىزدىڭ، شەتەلدىڭ تانىمال سۋرەتشىلەرىمەن تا­جىريبە الماسىپ وتىردى. وقۋ­شىلارعا ونلاين تۇردە ۇيىرمە وتكىزدى.

– قازىر كورمە ۇيىمداستىرۋعا شەكتەۋ قويىلعانىمەن، ونلاين فورماتتا شەبەرلىك ساباقتارى جۇرەدى. سۋرەتشىلىككە قىزىعىپ، نيەت ءبىلدىرىپ جاتقان وقۋشىلار كوپ. سۋرەت ونەرى – بالادان مىندەتتى تۇردە سۋرەتشى شىعارۋ ءۇشىن ەمەس، وي-ءورىسىن دامىتىپ، قيالىن ۇشتاۋعا پايداسى مول. بالكىم ەرتەڭ ول بالا ينجەنەر، ساۋلەتشى، ديزاينەر بولىپ ەلى­مىزدىڭ گۇلدەنۋىنە ۇلەس قوسار، – دەيدى سۋرەتشى قىز.

راس، بەينەلەۋ ونەرى – سوناۋ زاماننان ءوز قۇندىلىعىن، قوعامعا قاجەتتىلىگىن جوعالتپاي كەلە جاتقان ونەر. ال شىعارما­شىلىققا شىن بەرىلگەن ولگاداي جاستار باردا بەينەلەۋ ونەرى قا­ناتىن كەڭگە جايىپ، جاس تا­لانت­تاردىڭ تالابىن ۇشتاي بەرەدى.

1

 

وسكەمەن

 

سوڭعى جاڭالىقتار

اشىقتىق – قوعام دامۋىنىڭ كەپىلى

ايماقتار • بۇگىن، 13:00

دوللار قايتا قىمباتتادى

ەكونوميكا • بۇگىن، 12:18

قايران قالدىرعان قايىڭدى

فوتوگالەرەيا • بۇگىن، 11:56

ۇقساس جاڭالىقتار