اسىرەسە تارباعاتاي اۋدانىنىڭ جۇدىرىقتاي جۇمىلعان حالقى كوپكە ۇلگى بولدى. اۋدان تۇرعىندارى وزدەرى شوت اشىپ, 5 ملن تەڭگەگە جۋىق قارجى جيناعان. ورتاق قازانعا تۇسكەن قارجىنى ناۋقاستار مەن دارىگەرلەردىڭ قاجەتتىلىكتەرىنە جۇمساعان. ىندەتپەن كۇرەس ماقساتىندا اشىلعان قورعا ەڭبەكتەگەن بالادان ەڭكەيگەن قارياعا دەيىن اقشا اۋدارعان. ءتىپتى 1-سىنىپ وقۋشىسى قالتاسىنداعى 645 تەڭگەسىن اتا-اناسىنا ايتىپ, كومەك رەتىندە قورعا سالعان. ال اقش-تا وقىپ جۇرگەن تارباعاتايلىق تولعاناي سەيىتقازينا اۋىلىنا الاڭداپ, 112 مىڭ تەڭگە اۋدارىپ جىبەرگەن. قارجىنى اركىم ءال-اۋقاتىنا قاراي قوستى. جارتى الەمدى جايلاعان ىندەتپەن كۇرەسۋ ماقساتىندا حالىق دەنساۋلىعى, جاقىندارىنىڭ ءومىرى ءۇشىن ەشكىم تارتىنىپ قالعان جوق.
مەديتسينالىق قۇرال-جابدىق, ءدارى-دارمەك بولماسا, دارىگەردىڭ دارمەنسىز ەكەنىن بايقاعان جۇرت ۋاقىت وزدىرماي وسىلايشا وزدىكتەرىنەن شەشىم قابىلداعان. ونىڭ ۇستىنە كۇندەلىكتى جاريالانىپ وتىرعان تىزىمدەگى ءولىم-ءجىتىمنىڭ ارتۋى ەلدىڭ ۇرەيىن ۇشىرعان ەدى.
– اۋرۋ بارىن بىلە تۇرا ارقانى كەڭگە سالىپ جۇردىك. بۇل – شىندىق. اتى جامان دەرتكە تامىر-تانىستار شالدىعىپ, وبلىستان شىعا باستاعاندا عانا ەلەڭ ەتتىك. مەديتسينالىق قۇرالداردىڭ جەتكىلىكسىز ەكەنىن بايقاپ, توپ قۇردىق. قارجى جينادىق. بار ويىمىز – دەرتپەن كۇرەسۋگە تامشىداي بولسىن ۇلەس قوسۋ ەدى, – دەيدى قوعام بەلسەندىسى ەرمەك قۇرمانعالي.
جاناشىر ازاماتتار ىندەتپەن كۇرەسكە ۇلكەن ۇلەس قوسا ءبىلدى. قورعا قارجى جيناعان تارباعاتايلىق جومارت جاندار وكپەنى جەلدەتەتىن اپپاراتتىڭ 10 داناسىن ساتىپ الدى. دەم جەتپەي قينالىپ جاتقان ناۋقاستار ءۇشىن ەڭ كەرەگى وسى اپپارات ەدى. سونداي-اق باستارىن قاۋىپكە تىگىپ, كۇن-ءتۇن دەمەي ادام ومىرىنە اراشا ءتۇسىپ جۇرگەن دارىگەرلەردى قورعانىس كوستيۋمدەرىمەن قامتىدى. بەتپەردە, انتيسەپتيك سىندى كۇندەلىكتى قاجەتتى زاتتار دا جەتكىزىلدى.
الەمدى ابىگەرگە سالعان پاندەميا كەزىندە شىعىس قازاقستان وبلىسىندا كاسىپكەرلەر دە جۇدىرىقتاي جۇمىلىپ, جومارتتىق تانىتقانى بەلگىلى. ءىرى قازاقستاندىق «Bi Group» قۇرىلىس كومپانياسى دا مەديتسينا مەكەمەلەرىنە كومەك كورسەتكەن. كوروناۆيرۋس ينفەكتسياسىنا قارسى كۇرەسۋ جولىندا «Aitas KZ» اق كومپانياسى مەديتسينالىق قۇرىلعىلار مەن پرەپاراتتار ءۇشىن دەنساۋلىق ساقتاۋ مەكەمەلەرىنە كومەك رەتىندە 200 ملن تەڭگە بولگەنىن دە اۋىز تولتىرىپ ايتۋعا بولادى.
وزگە دە كاسىپكەرلەر «حاليفا التاي» مەشىتى ارقىلى مىڭداعان جانعا كومەك قولىن سوزدى. وبلىستىق مەشىت پەن زەكەت قورى قىزمەتكەرلەرى جازداي اۋرۋحانادا جاتقان ناۋقاستارعا قىمىز بەن ازىق-ت ۇلىك تاراتىپ وتىردى.
قازىر وبلىستاعى جاعداي وڭالىپ كەلەدى. سوڭعى دەرەك بويىنشا, شىعىس قازاقستاندا 11 ناۋقاس تىركەلگەن. ونىڭ التاۋى – سەمەيدە, ەكەۋى – ريددەردە. سونداي-اق كۋرچاتوۆتا ەكى جاعداي انىقتالعان. ال وبلىس ورتالىعى مەن گلۋبوكوە اۋدانىندا ءبىر-بىردەن. دەسە دە ءتيىستى ساقتىق شارالارى جالعاسىن تابا بەرمەك.
شىعىس قازاقستان وبلىسى
