پرەزيدەنتتىڭ دە «ۇكىمەتكە قاعازباستىلىق پەن بيۋروكراتياعا سالىنباي, سىبايلاس جەمقورلىققا قارسى ءىس-قيمىل اگەنتتىگى بەرگەن ۇسىنىستاردى ءبىر اي مەرزىمدە جان-جاقتى پىسىقتاۋدى تاپسىرامىن. سونىڭ ناتيجەسى بويىنشا ناقتى شارالار كەشەنى جاسالۋعا ءتيىس. نەگىزگى ماقسات – جەمقورلىقتىڭ تامىرىنا بالتا شابۋ, ونى تۇبەگەيلى جويۋ» دەگەنى بار ەمەس پە؟!
الەۋمەتتىك جەلىدە پىكىر قالدىرۋشىلاردىڭ اراسىندا «بارماق باستى, كوز قىستى جوق پا؟» دەگەندەي ساۋالدار كەزدەسكەن سوڭ ءبىز دە ءوز تاراپىمىزدان ماسەلەنىڭ انىق-قانىعىنا كوز جەتكىزبەك بولدىق.
– مۇنداي اجەتحانا سالعانشا اققاينار, قىزىل جۇلدىز, قايىڭدى اۋىلدارىنا جول سالىنسا, بەرەل مۋزەيىنىڭ تۇسىنان بۇقتىرماعا اسپالى كوپىر تارتىلسا, تۋريستەر ءۇشىن الدەقايدا ءتيىمدى بولار ەدى, – دەيدى قوعام بەلسەندىسى, جۋرناليست دارىن نۇرساپاروۆ.
ارينە بۇقتىرمانىڭ وڭ جاعالاۋىنداعى جولدىڭ رەسپۋبليكالىق ماڭىزى بولماعان سوڭ اسفالت توسەلمەگەنى راس, توسەلۋى دە ەكىتالاي.
داۋدىڭ باسى اجەتحانا قۇرىلىسىنا جاۋاپتى مەكەمەدە بولسا كەرەك دەپ, «جارما قۇرىلىس گاز» جشس باسشىلىعىنا حابارلاسقان ەدىك. كاتونقاراعاي اۋدانىنداعى اجەتحانالاردىڭ جۇمىسىمەن اينالىسىپ جۇرگەن اتالعان مەكەمە باسشىسى ۆيكتور يساباەۆتىڭ ايتۋىنشا, تەك دارەتحانا قۇنى 3 ملن تەڭگەنىڭ توڭىرەگىندە.
– جىلىكتەپ ايتار بولسام, كابينانىڭ ىشىندە سۋ جىلىتۋعا ارنالعان بويلەرى, ەكى ۋنيتازى, قول جۋعىشتارى بار. ەدەنى شىرىمەۋى ءۇشىن اليۋمينيدەن توسەلگەن. بارلىعى دا ساپالى. ال قالعان قارجى سمەتا قۇجاتتارىنا سايكەس ءتيىستى جەرىنە جەتكىزىلۋىنە, ورناتىلۋىنا جۇمسالادى. ونىڭ ىشىندە جۇمىسشىلاردىڭ ەڭبەگى, ەكسكاۆاتور سىندى تەحنيكالاردىڭ قىزمەتى بار, – دەپ ءتۇسىندىردى ۆ.يساباەۆ.
«Kazakh Tourism» ۇلتتىق كومپانياسى» اكتسيونەرلىك قوعامى قىزمەتكەرلەرى: «شىعىس قازاقستان وبلىسىنىڭ 8 اۋدانىنا رەسپۋبليكالىق بيۋدجەتتەن 104 ملن تەڭگە ءبولۋ ارقىلى 17 سانيتارلىق-گيگيەنالىق توراپ (سگت) ورناتۋ جوسپارلانعان. بۇگىنگە دەيىن 5 سگت ورناتىلىپ, پايدالانۋعا بەرۋ ءۇشىن ەلەكتر جەلىسىن جەتكىزۋ كۇتىلۋدە. بۇل پاۆيلونداردى بيىل 10 قىركۇيەكتە ەلەكتر جەلىسىنە قوسۋ جوسپارلانعان» دەيدى.
ازىرشە سانيتارلىق-گيگيەنالىق توراپ كاتونقاراعاي اۋدانىنىڭ پريمورسك اۋىلىنداعى جاعاجايعا, ۇلكەن نارىن اۋىلىنداعى «زنپ» جانار-جاعارماي قۇيۋ ستانساسىنىڭ جانىنا, رەسپۋبليكالىق كۇرە جولدان سوگىر اۋىلىنا بۇرىلىستا, بەرەل اۋىلىنا جانە بەرەل قورىق-مۇراجايى جاققا ورناتىلدى.
– بەرەل اۋىل بولعانمەن, بۇل جاققا بەرگىسى باتىسىمىزدان, ارعىسى شەتەلدەن تۋريستەر كوپ كەلەدى. مەيلى شەتەل, مەيلى ءوزىمىزدىڭ تۋريستەر كەلسىن, سانيتارلىق-گيگيەنالىق توراپتىڭ بولعانى دۇرىس. سالىنعان اجەتحانالار قاراۋسىز قالمايدى. ول جاعىن ويلاستىرىپ قويدىق. ال وبلىس ورتالىعىنان بەرەلگە دەيىن جول سايراپ جاتىر, – دەيدى كاتونقاراعاي اۋدانىنىڭ اكىمى رەنات قۇرمامباەۆ.
سايىپ كەلگەندە ءدال وسىنداي زاماناۋي جىلى دارەتحانالار كاتونقاراعاي اۋدانىنا عانا قويىلمايدى. وبلىستىق تۋريزم جانە سىرتقى بايلانىستار باسقارماسى ماماندارىنىڭ ايتۋىنشا, «جۇمىسپەن قامتۋدىڭ جول كارتاسى-2020» باعدارلاماسى اياسىندا الاكول دەمالىس ايماعى مەن اباي اۋدانىنداعى قوڭىراۋليە ۇڭگىرىنىڭ ماڭىنا, سىبە كولىندەگى مۋنيتسيپالدى جاعاجايعا, گلۋبوكوە اۋدانىنداعى «التاي ءالپىسى» تاۋ شاڭعىسى كۋرورتىنا جانە تارباعاتاي اۋدانىنداعى ىرعىزباي اتا ەسكەرتكىشىنىڭ جانىنا دا قويىلادى. جالپى سانى تۋريستىك رەكرەاتسيالىق اۋماقتارعا 17 دارەتحانا سالۋ قولعا الىنعان.
شىعىس قازاقستان وبلىسى
