وفيتسەر قاراعاندى گارنيزونى اسكەري پوليتسيا ءبولىمىنىڭ باقىلاۋ-وتكىزۋ پۋنكتىنەن باستادى. 200 شاقىرىمدى 48 ساعاتتىڭ ىشىندە ەڭسەرۋدى جوسپارلاعان ول, مارافوندى بەلگىلەنگەن ۋاقىتىنان بۇرىن اياقتادى.
مارافون بارىسى جۇگىرۋشىنىڭ باعىتى مەن ۋاقىتىن ونلاين رەجيمىندە قاداعالاۋعا بولاتىن ناۆيگاتسيالىق پلاتفورمانىڭ كومەگىمەن باقىلاندى. بارلىق قاشىقتىقتا اسكەري قىزمەتشىنىڭ جانىندا مەديتسينالىق ماماندار مەن اسكەري پوليتسيا ورگاندارىنىڭ وكىلدەرى ءجۇردى.
"مارافوننىڭ ءبىرىنشى كۇنى 100 شاقىرىم قاشىقتىقتى ءجۇرىپ ءوتۋدى جوسپارلادىم, بىراق ءوزىمدى جاقسى كورسەتكىشكە قول جەتكىزەتىنىمدى سەزىنىپ 130 شاقىرىم قاشىقتىقتى ءجۇرىپ ءوتتىم. ەكىنشى كۇنگە 70 شاقىرىم قاشىقتىقتى قالدىردىم. ەڭ قيىنى سوڭعى 20 شاقىرىم بولدى, الايدا مەن ونى جەڭدىم", - دەيدى زاڭعار الكەنوۆ.
مارەدە وفيتسەردى تۋعان-تۋىستارى مەن ارىپتەستەرى, سونداي-اق جاڭاارقا اۋدانىنىڭ تۇرعىندارى قارسى الدى.
ايتا كەتۋ كەرەك, اعا لەيتەنانت زاڭعار الكەنوۆ – قازاق كۇرەسىنەن قازاقستان رەسپۋبليكاسىنىڭ سپورت شەبەرى, دزيۋدو مەن سامبودان سپورت شەبەرىنە ۇمىتكەر. العاش رەت 15 شاقىرىم قاشىقتىقتى, سودان كەيىن 21, 42, 75, 83 شاقىرىم قاشىقتىقتى باعىندىرعان. ال قازىرگى ۋلترامارافونعا دەيىنگى ەڭ ۇزىن قاشىقتىعى 130 شاقىرىم بولعان.
اسكەري قىزمەتشىگە 200 شاقىرىمدىق ۋلترامارافوندى باعىندىرعانىن دالەلدەيتىن سەرتيفيكات مانيتورينگ پەن ءتيىستى قۇجاتتاردى راسىمدەگەننەن كەيىن بەرىلەدى.
