دەنساۋلىق ساقتاۋ ءمينيسترى الدىمەن وسكەمەندەگى №4 قالالىق اۋرۋحانانىڭ جوندەۋ جۇمىستارىمەن تانىستى. جوندەۋ جۇمىستارى جوسپار بويىنشا اياقتالعان سوڭ ستاتسيوناردىڭ دياگنوستيكالىق بلوگى جىلجىمالى رەنتگەن جانە كومپيۋتەرلىك توموگرافيا اپپاراتتارىمەن جابدىقتالادى. ال پالاتالاردىڭ بارلىعى وتتەگىمەن ورتالىقتاندىرىلماق. جاعدايى اۋىر ناۋقاستار ءۇشىن رەانيماتسيا بولىمىندە 15 توسەك جانە وكپەنى جاساندى جەلدەتۋ اپپاراتتارى ورناتىلادى.
- ءبىز بولۋى مۇمكىن كورونوۆيرۋس ينفەكتسياسىنىڭ جاڭا تولقىنىنا دايىندىقتى تىڭعىلىقتى جۇرگىزگەنىمىز ءجون. قايتا جاڭارتىلىپ جاتقان اۋرۋحانا عيماراتىنداعى جۇمىستار كەستەگە ساي ىستەلىپ جاتىر. وتكىر رەسپەراتورلىق ۆيرۋستىق اۋرۋلار كەزىندە ناۋقاستاردى ۋاقىتىلى قابىلداۋعا دايىن بولۋىمىز كەرەك, - دەدى ەلىمىزدىڭ باس دارىگەرى الەكسەي تسوي.
قازىرگى ۋاقىتتا جوندەۋدەن ءوتىپ جاتقان اۋرۋحانانىڭ پۋلمونولوگيالىق بولىمشەسى ەمدەۋ-دياگنوستيكالىق قۇرىلىمىمەن قامتىلعان جەكە عيماراتقا كوشىرىلگەن. ەپيدەميولوگيالىق جاعدايدى ەسكەرە وتىرىپ, ستاتسيونار تولىق جابدىقتالعان. الداعى ۋاقىتتا جرۆي مەن تۇماۋعا شالدىققاندار, سونىڭ ىشىندە «COVID-19» ىندەتىن جۇقتىرعاندار جاتقىزىلۋى دا مۇمكىن.
وسكەمەن قالاسىنىڭ № 2 ەمحاناسى دا ءمينيستردىڭ نازارىنان تىس قالمادى. بۇل مەديتسينالىق ۇيىم 667 ناۋقاسقا شاقتالعان. جۇزگە جۋىق دارىگەر قىزمەت ەتەتىن اۋرۋحانادان جىل باسىنان بەرى 3 مىڭنان استام ادام ەمدەلىپ شىعىپتى.
دەنساۋلىق ساقتاۋ ءمينيسترى الەكسەي تسوي شىعىس "قازاقستان وبلىستىق اۋرۋحاناسى" دياگنوستيكالىق ورتالىعىنا دا بۇرىلدى. بۇل اۋرۋحانا قىزمەتىنىڭ نەگىزگى باعىتى - قان اينالىمى جۇيەسى اۋرۋلارىن ەمدەۋ. ول ءۇشىن مەديتسينالىق ۇيىم جۇرەك, تامىر, بۋىن اۋرۋلارىن ەمدەيتىن زاماناۋي جابدىقتارمەن جابدىقتالعان.
شىعىس قازاقستان وبلىسىندا حالىق سانى - 1 378 527 ادام,
ستاتسيونارلىق ۇلگىدەگى اۋرۋحانا مەن ەمحانالار سانى - 31
ءموبيلدى بريگادا سانى - 373.
وكپەنى جاساندى جەلدەتۋ اپپاراتى – 241 دانا
وتتەگى كونتسەنتراتورى - 1056 دانا.
1 قىركۇيەكتەگى ستاتيستيكا بويىنشا ايماقتا - 8213 ادام كورونوۆيرۋستىق ينفەكتسيامەن اۋىرعان.
