ەرەكشە قاجەتتىلىگى بار ادامدارعا مەملەكەت قامقورلىعى قاي كەزدە دە اۋاداي قاجەت. ولاردى جۇمىسپەن قامتۋ نەگىزگى ماسەلەنىڭ ءبىرى. "ازاماتتارعا ارنالعان ۇكىمەت" مەملەكەتتىك كورپوراتسياسىنىڭ الماتى فيليالىندا 67 مۇمكىندىگى شەكتەۋلى جان جۇمىس ىستەيدى. الەۋمەتتىك ءومىردىڭ بارلىق سالالارىندا ازاماتتاردىڭ قاجەتتىلىكتەرى مەن مۇددەلەرىنىڭ كەشەندى تۇردە قامتاماسىز ەتىلۋىنە اتالعان ۇجىم ايرىقشا ءمان بەرىپ وتىر. سونىمەن بىرگە مۇمكىندىگى شەكتەۋلى جاندارعا مەملەكەتتىك قىزمەت كورسەتۋ ءىسى دە بارىنشا جولعا قويىلعان.
ء"اربىر فرونت-وفيستە مۇگەدەكتەرگە قىزمەت كورسەتەتىن ارنايى تەرەزەلەر جۇمىس ىستەيدى. قۇلاعى ناشار ەستيتىن نەمەسە ساڭىراۋ جاندارعا كۋرستاردان وتكەن سۋردواۋدارماشى مامان ىمداۋ-يشارا تىلىمەن قىزمەت كورسەتەدى. مۇندا كەلەتىن مۇگەدەكتىگى بار جاندار ءۇشىن كولىكتەرىن قوياتىن اۆتوتۇراق, ارباداعى مۇگەدەكتەر ءۇشىن پاندۋستار, شاقىرۋ نۇكتەلەرى, كوتەرۋ ءليفتى, كوزى ناشار كورەتىندەرگە ارنالعان تاكتيلدى جولدار, برايل ماتىنىندەگى اقپاراتتىق تاقتاشالار ورناتىلعان", دەيدى فيليال ديرەكتورى دانيار قىرىقباەۆ.
مۇگەدەكتەر ءۇشىن كوپتەگەن قىزمەتتى ونلاين رەجىمدە الۋ قاراستىرىلعان. ماسەلەن, ازامات مۇگەدەكتىك توبىن انىقتاۋ ءۇشىن كوميسسيادان وتكەندە, باسقا ەش جەرگە جۇگىنۋدىڭ قاجەتى جوق. ونىڭ قۇجاتتارى ونلاين رەجىمدە مەملەكەتتىك كورپوراتسياعا بەرىلىپ, وسىندا بارلىق جاردەماقىلار مەن تولەمدەر ءتۇرى بەلگىلەنىپ, ونىڭ تولەنۋى ۇيىمداستىرىلادى.
سونداي-اق, "ازاماتتارعا ارنالعان ۇكىمەتتىڭ" ماماندارى 1 جانە 2 توپتاعى مۇگەدەكتەرگە, 70 جاستان اسقان قارت ادامدارعا, ۇوس قاتىسۋشىلارىنا جانە مۇمكىندىگى شەكتەۋلى بالالاردىڭ ۇيىنە بارىپ قىزمەت كورسەتەدى.
– جىل باسىنان بەرى ءبىزدىڭ ماماندار 1737 ۇيگە بارىپ 2 مىڭعا جۋىق قىزمەت كورسەتتى. ەڭ كوپ تالاپ ەتىلەتىن قىزمەتتەر – پاسپورتتار مەن جەكە كۋالىكتەر بەرۋ. مۇگەدەكتەردى سۋردو-تيفلوتەحنيكالىق جانە مىندەتتى گيگيەنالىق قۇرالدارمەن قامتاماسىز ەتۋ, پروتەزدىك-ورتوپەديالىق كومەك ۇسىنۋ ءۇشىن ولارعا قۇجاتتاردى رەسىمدەۋ جانە ت. ب. قىزمەتتەر دە سۇرانىسقا يە, – دەيدى دانيار قىرىقباەۆ.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
