تانىمال الەمدىك شوۋدىڭ شيرەك فينالى تىكەلەي ەفيردە ءوتتى. جارتىلاي فيناليستەردى تاڭداۋ NBC سايتىنداعى كورەرمەندەردىڭ داۋىستارىنا تىكەلەي بايلانىستى بولدى. داۋىستى تەك اقش-تاعى ازاماتتار عانا بەرە الدى. سونداي-اق بىرنەشە قاتىسۋشى قازىلار القاسىنىڭ مۇشەلەرىنەن قوسىمشا بالل جينادى.
"لوس-اندجەلەستە قازىر مەنىمەن بىرگە انام مەن مۇعالىمىم ناتاليا الەكساندروۆنا بار. ءبىز ونەر كورسەتەر الدىندا قاتتى قوبالجىدىق. ساپارعا شىعار الدىندا وتە كوپ جۇكتەمە بولدى. مەن قوسىمشا اكادەميالىق پەداگوگ گۇلزات داۋرباەۆامەن ۆوكال بويىنشا دايىندالىپ, كىشكەنە اۋىرىپ قالدىم. ونىڭ بارلىعى قازىر ارتتا قالدى. قازىرگى ساتتەگى سەزىمىمدى ايتىپ جەتكىزۋ قيىن. بارلىقتارىڭىزعا قولداۋلارىڭىز ءۇشىن راحمەت. بۇل شوۋدا قانداي كەرەمەت اتموسفەرا بار! مۇندا ەرەكشە شابىتتانىپ, تاعى ءبىر جاڭا نارسە جاساۋعا ۇمتىلاسىڭ. كەلەسى تۋرعا بۇرىنعىشا كۇن سايىن دايىندالاتىن بولامىن!"- دەدى دانەليا تولەشوۆا.
بۇگىن شوۋ قاتىسۋشىلارىن ءباسپاسوز ءماسليحاتى مەن اقش-تىڭ جۋرناليستەرىمەن سۇحبات كۇتىپ تۇر. شيرەك فينالدا جاس ءانشى Harry Styles Sign Of The Times ءانىن ورىندادى. كورەرمەندەر مەن قازىلار القاسى بۇل جولى دا دانەليانىڭ ونەرىنە العاشقى كەزەڭدەگىدەي ەرەكشە ءسۇيسىنىپ, ءوز ورىندارىنان تۇرىپ قول شاپالاقتادى.
دانەليا اناسىمەن جانە مۇعالىمىمەن اقش-قا بىرنەشە كۇن بۇرىن ۇشىپ كەلگەن. ولار شوۋدىڭ بارلىق قاتىسۋشىلارى ءۇشىن مىندەتتى شارت - كارانتيندىك شارالاردى قاتاڭ ساقتاپ جاتقانىن ايتادى.
ء"بىز ۇشار الدىندا كوروناۆيرۋسقا تەست تاپسىردىق. ۇشىپ كەلگەننەن كەيىن بارلىق باسقا قاتىسۋشىلار سياقتى مىندەتتى كارانتين كۇندەرىن وتكىزىپ, تاعى دا تەست تاپسىردىق. بارلىعىنىڭ دانساۋلىق جاعدايى جاقسى. ءبىز قاۋىپسىزدىك شارالارىن ساقتايمىز, ءتىپتى, قوناقۇيدەگى تاماقتانۋ دا قىزمەتكەرلەرمەن بايلانىس بولماس ءۇشىن ەسىككە دەيىن عانا جەتكىزىلەدى", - دەدى دانەليانىڭ مۇعالىمى ناتاليا چۋراكوۆا.
America ' s Got Talent جارتىلاي فينالىنىڭ كۇنى مەن قازاقستاندىق ورىنداۋشىنىڭ كەلەسى كومپوزيتسياسى تۋرالى ازىرگە مالىمەت جوق.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
