بولىنگەن قارجى ءتيىمدى جۇمسالۋى قاجەت
ەل پرەزيدەنتى ق.توقاەۆ القالى جيىندا ءبىرىنشى كەزەكتە سىبايلاس جەمقورلىققا قارسى كۇرەس – ەلىمىزدىڭ ستراتەگيالىق دامۋىنداعى نەگىزگى باسىمدىقتاردىڭ ءبىرى ەكەنىن ايتا كەلىپ, اتالعان باعىتتا اتقارىلعان جۇمىستارعا توقتالدى.
– بۇل – مەنىڭ بەرىك ۇستانىمىم جانە سايلاۋالدى باعدارلامادا حالىققا بەرگەن ۋادەم. وسى جۇمىستا ەشقانداي كوزبوياۋشىلىققا, «بارماق باستى, كوز قىستى» ارەكەتتەرگە جول بەرىلمەۋگە ءتيىس.تالاپ قاتاڭ بولادى. بىلتىرعى جيىندا ءبىز ناقتى ءىس-قيمىل جوسپارىن ايقىندادىق. بۇگىندە بىرقاتار ماقساتتى جۇزەگە اسىردىق. قازاقستان بەدەلدى حالىقارالىق گرەكو ۇيىمىنا, ياعني سىبايلاس جەمقورلىققا قارسى مەملەكەتتەر توبىنا مۇشە بولدى. نورماتيۆتىك اكتىلەردى سىبايلاس جەمقورلىققا قارسى ساراپتامادان وتكىزۋ ينستيتۋتىنىڭ جۇمىسى جاڭعىردى. قول استىنداعىلاردىڭ جەمقورلىق ارەكەتتەرى ءۇشىن باسشىلارىن قىزمەتىنەن بوساتۋ قاعيداتى ەنگىزىلدى. مەملەكەتىمىزدىڭ وسى باعىتتا قولعا العان شارالارىن بەلگىلى حالىقارالىق اگەنتتىكتەر اتاپ وتۋدە. دەگەنمەن, ءبىز بۇعان توقمەيىلسىپ وتىرا بەرمەۋىمىز كەرەك, – دەدى مەملەكەت باسشى-
سى.
سىبايلاس جەمقورلىق جاعدايلارىنىڭ سانى ءالى دە ازايماي تۇرعانىن ءسوز ەتكەن پرەزيدەنت 2019 جىلمەن سالىستىرعاندا جەمقورلىق ارەكەتتەرى ءۇشىن جاۋاپقا تارتىلعان ادامداردىڭ سانى ارتقانىن جەتكىزدى.
– اشىعىن ايتقاندا, قازىر كۇندەلىكتى جاڭالىقتاردان ءتۇرلى دەڭگەيدەگى شەنەۋنىكتەردىڭ سىبايلاس جەمقورلىققا بايلانىستى زاڭ بۇزۋشىلىقتارى ءۇشىن ۇستالىپ جاتقانى تۋرالى وقيتىن بولدىق. ولاردىڭ اراسىندا 2 وبلىس اكىمى بار, بۇل الاڭداتارلىق جاعداي, – دەدى پرەزيدەنت.
مەملەكەت باسشىسىنىڭ ايتۋىنشا, 2019 جىلمەن سالىستىرعاندا جەمقورلىق ارەكەتتەرى ءۇشىن جاۋاپقا تارتىلعان ادامداردىڭ سانى 11 پايىزعا ارتقان, ياعني 820-دان 912-گە وسكەن.
پاندەميا كەزەڭىندە جانە مەملەكەت پەن ازاماتتارىمىزدىڭ تابىسى ازايعان تۇستا جەمقورلىقپەن كۇرەستى ودان ءارى كۇشەيتۋ قاجەتتىگىن ايتقان پرەزيدەنت ناقتى باعىتتارعا بولىنگەن قارجىنىڭ ءتيىمدى جۇمسالۋى ءتيىس ەكەنىن اتاپ كورسەتتى.
– حالىقارالىق ساراپشىلاردىڭ ايتۋىنشا مەملەكەتتەر پاندەميانىڭ سالدارىمەن كۇرەسكە مول قاراجات جۇمساپ جاتقان كەزدە قارجىنى ماقساتقا ساي پايدالانباۋ جانە جىمقىرۋ قاۋپى ارتا تۇسەدى. ءبولىنىپ جاتقان قاراجات مۇقيات ءارى ءتيىمدى جۇمسالۋعا ءتيىس. بۇل – ءار تەڭگە ءوزىنىڭ ماقساتىنا ساي جۇمسالۋى كەرەك دەگەن ءسوز. اسىرەسە قازىرگى جاعدايدا ەش پايداسى جوق جانە قاجەتسىز ءىس-شارالارعا قاراجاتتىڭ شىعىندالۋىنا قوعامنىڭ قالاي قارايتىنىن كورىپ وتىرمىز. سوندىقتان مۇنداي ماسەلەلەرگە بولارى بولىپ, بوياۋى سىڭگەننەن كەيىن ەمەس, الدىن الا ءمان بەرۋ – وتە ماڭىزدى, – دەدى ق.توقاەۆ.
پرەزيدەنتتىڭ سوزىنە قاراعاندا, سىبايلاس جەمقورلىقپەن ۇستالۋ وقيعالارى, ولار جونىندەگى ءتيىمدى جاريالانىمدار مەن كورسەتىلىمدەر قوعامدى باستاپقىدا ەلەڭ ەتكىزگەنىمەن, ولاردىڭ اسەرى قىسقا بولادى. كەيىن مۇنداي ىستەر سوتتا دالەل جەتىسپەگەندىكتەن كەرى قايتارىلسا, مەملەكەتتىڭ جەمقورلىقپەن كۇرەس جونىندەگى ءىس-شاراسىنا قوعامنىڭ سەنىمى السىرەيدى.
– سىبايلاس جەمقورلىقتىڭ سەبەبى مەن شارتتارىن جويماي كۇرەسۋ, بۇل – جەل ديىرمەنمەن الىسۋمەن تەڭ. حالىق الدەبىر شەنەۋنىكتىڭ نەمەسە باسشىنىڭ جاي جاۋاپكەرشىلىككە تارتىلعانىن كورىپ قانا قويماي, ول جۇمىس ىستەگەن مەملەكەتتىك مەكەمەدە ەندى مۇنداي جاعدايدىڭ قايتالانبايتىنىن دالەلدەيتىن تۇبەگەيلى وزگەرىستەردىڭ ورىن العانىنا كۋا بولۋى كەرەك. ازىرگە مەن مۇنداي كەشەندى جانە تۇبەگەيلى جۇمىستى كورىپ وتىرعان جوقپىن. شەنەۋنىكتەر شەڭبەر جاساپ, بىرىنەن كەيىن ءبىرى اۋىسىپ جاتىر. ال جۇيەلى پروبلەمالار شەشىلمەگەن كۇيى تۇر, – دەدى قاسىم-جومارت توقاەۆ.
پرەزيدەنتتىڭ ايتۋىنشا, مەديتسينا سالاسىنداعى سىبايلاس جەمقورلىقتى تەكسەرۋ جانە اشكەرەلەۋ جۇمىستارى پاندەميا شارىقتاۋ شەگىنە جەتىپ, ءدارى جەتپەي جاتقاننان كەيىن عانا باستالعان. تسيفرلاندىرۋ جۇيەسىندەگى زاڭ بۇزۋشىلىقتار ونداعان ميلليارد اقشا شىعىندالعاننان كەيىن بارىپ قوزعالعان. بۇگىندە ءبىلىم, جۇمىسپەن قامتۋ جانە الەۋمەتتىك نىساندارعا قىرۋار قارجى ءبولىنىپ جاتىر.
– ءبىر جىلدان كەيىن وسى سالالارعا بولىنگەن قارجى جىمقىرىلدى, ال جاۋاپتى مينيسترلىكتەر كوشتىڭ سوڭىندا قالدى دەمەيتىنىمىزگە ناقتى سەنىمدى بولۋىمىز كەرەك. ميللياردتاعان قارجى قولدى بولىپ كەتكەننەن كەيىن, حالىققا كىنالى ادامداردىڭ ۇستالعانى تۋرالى ادەمى راپورت بەرگەننىڭ تۇككە دە كەرەگى جوق. بۇل باعىتتاعى جۇمىستى تۇبىرىمەن قايتا قۇرۋ كەرەك دەپ سانايمىن, – دەدى مەملەكەت باسشىسى.
جازاعا تارتۋدان بولەك, ىنتالاندىرۋ دا ماڭىزدى
پرەزيدەنت سىبايلاس جەمقورلىقپەن كۇرەس قىزمەتىنىڭ بارلىق باعىتتاعى جۇمىستارىنا جاڭا سەرپىن بەرۋ كەرەك دەپ سانايدى. سىبايلاس جەمقورلىقپەن كۇرەستەگى ارەكەتسىزدىك حالىقتىڭ نارازىلىعىن تۋدىرىپ, قۇقىقتىق نيگيليزمگە اكەپ سوعادى. دەگەنمەن, جەمقورلىققا قارسى بەلسەندى كۇرەستىڭ سوڭى ناۋقانشىلدىققا ۇلاسىپ كەتپەۋى كەرەك. سونىمەن قاتار بۇل جاۋاپتى جانە زاڭعا باعىناتىن مەملەكەتتىك قىزمەتكەرلەردىڭ جۇمىسىنا كەرى اسەر ەتپەۋى ءتيىس.
– بىرىنشىدەن, سىبايلاس جەمقورلىق جونىندە جۇيەلى تۇردە ەسكەرتىپ وتىرۋعا ەرەكشە ءمان بەرگەن ءجون. وسىعان وراي, ءتۇرلى سالاداعى جەمقورلىققا جول اشاتىن جاعدايلارعا ساپالى تالداۋ جاساۋ كەرەك. زاڭ بارلىق مەملەكەتتىك ورگاندارعا تۇيتكىلدى تۇستاردى ءوز بەتىنشە انىقتاپ, جويۋعا مىندەتتەيدى. الايدا بۇل جۇمىس ءجۇرىپ جاتقان جوق. مۇنداي ارەكەتسىزدىك جاقسىلىققا اپارمايدى. دەر كەزىندە الدىن الۋ جانە ەسكەرتۋ جۇمىسى جۇرگىزىلمەسە, جەمقورلىق دەگەن كەسەل كوپتەگەن ادامنىڭ جارقىن كەلەشەگىنە بالتا شابۋى ابدەن مۇمكىن.
سىبايلاس جەمقورلىققا قارسى كۇرەستە ارەكەتسىزدىك ازاماتتار اراسىندا نارازىلىق پەن قۇقىقتىق نيگيليزمنىڭ وسۋىنە اكەلەدى. ادەتتە, سىبايلاس جەمقورلىق دەڭگەيى جوعارى وڭىرلەردە جاپپاي قىلمىستاردىڭ ورىن الۋىن كەزدەيسوقتىق دەۋگە بولمايدى.
پرەزيدەنتتىڭ ايتۋىنشا, اتالعان ماسەلەگە قاتىستى جۇمىستاردى باعالاۋ سىبايلاس جەمقورلىقتىڭ الدىن الۋ, ازايتۋ جانە مەملەكەتتىك قىزمەت الۋداعى كەدەرگىلەردى جويۋ بويىنشا قابىلدانعان شارالار نەگىزىندە قۇرىلۋى كەرەك.
ق.توقاەۆ ءاربىر باسشى ءوز قىزمەتكەرلەرىنىڭ زاڭ بۇزۋشىلىعىن جاسىرماۋى كەرەك ەكەنىنە ەكپىن بەردى.
– سوندىقتان ونى تەك جازاعا تارتۋدان بولەك, ىنتالاندىرۋ دا ماڭىزدى. بۇل الدىن الا جۇيەلى شارالار قابىلداۋعا ايتارلىقتاي سەپتىگىن تيگىزەدى. ءاربىر اكىم جانە مينيستر جۇمسالعان قاراجاتقا عانا ەمەس, ونى دۇرىس جوسپارلاۋعا دا جاۋاپتى بولۋعا ءتيىس. ناق وسى تۇستا سىبايلاس جەمقورلىققا بارۋ قاتەرى كوپ بولۋى مۇمكىن. سوندىقتان ءار باسشىعا جەكە جاۋاپكەرشىلىك جۇكتەلەدى. باس پروكۋراتۋراعا وسىنداي باعالاۋ جۇيەسىن ازىرلەۋدى تاپسىرامىن. سونىمەن قاتار مەملەكەتتىك ورگانداردىڭ قىزمەتىنە ءجونسىز ارالاسۋدى دوعارعان ءجون. سىبايلاس جەمقورلىق پەن باسقارۋ ىسىندەگى ولقىلىقتاردىڭ ارا جىگىن ناقتى اجىراتا ءبىلۋ قاجەت, – دەدى پرەزيدەنت.
مەملەكەت باسشىسىنىڭ سوزىنە قاراعاندا, وزىنە جاۋاپكەرشىلىك الۋدان قورىقپايتىن, ءادىل شەنەۋنىكتەر قىلمىستىق پروتسەستىڭ وربيتاسىنا تارتىلماۋى ءتيىس. مەملەكەتتىك اپپارات شەشىم قابىلداۋدان قورىقپاۋى قاجەت.
پرەزيدەنت قازىر مەملەكەتتىك قىزمەتشىلەر تاراپىنان باستاما كوتەرمەۋ, جاۋاپكەرشىلىكتەن قاشىپ, ارتىق قاعازباستىلىققا سالدىرۋ تەندەنتسياسى بايقالاتىنىن, مۇنىڭ مىسالى پاندەميا كەزىندە انىق اڭعارىلعانىن ايتتى.
مەملەكەت باسشىسىنىڭ ايتۋىنشا, قىلمىسقا ازعىرعانى ءۇشىن قىلمىستىق جاۋاپكەرشىلىك ەنگىزىلدى, بۇل نورما قۇقىق قورعاۋ ورگاندارىنىڭ باسسىزدىعىن بولدىرماۋعا مۇمكىندىك بەرەدى.
پرەزيدەنت باس پروكۋراتۋراعا جانە سىبايلاس جەمقورلىققا قارسى ءىس-قيمىل قىزمەتىنە جەمقورلىققا قارسى كۇرەستە لايىقتى باستامالارى جوق, بەلسەندى ەمەس باسشىلار تۋرالى جارتىجىلدىق ەسەپ ازىرلەۋدى تاپسىردى. بۇل جەرگىلىكتى اتقارۋشى ورگاندارعا دا قاتىستى ەكەنىن ەسكەرتتى.
جەمقورلىقتان جاپپاي جيرەنەتىن جاعدايعا جەتۋ كەرەك
مەملەكەت باسشىسى تۇرمىستىق سىبايلاس جەمقورلىقپەن كۇرەس ماسەلەسىنە دە ايىرىقشا توقتالدى.
– كۇندەلىكتى ومىردە جەمقورلىق جاعدايلارىنا تاپ بولعان جۇرت شاراسىز كۇيگە تۇسەدى, ادىلدىكتىڭ بار ەكەنىنە سەنبەيدى. پاندەميامەن جالپى ۇلتتىق دەڭگەيدە جاپپاي كۇرەس ءجۇرىپ جاتقاندا پايدا تابۋ ءۇشىن ادام قانشالىقتى ارسىز بولۋى كەرەك؟ مىسالى, الماتىداعى جەتىسۋ اۋدانى اكىمدىگىنىڭ قىزمەتكەرلەرى ازاماتتاردى بلوك بەكەتتەن وتكىزۋ ءۇشىن ۇنەمى پارا الىپ وتىرعان. مۇنداي دەرەكتەر بىرنەشە وڭىردە بايقالدى. ءتىپتى بارلىق جەردە وسىلاي بولعان شىعار دەپ ويلايمىن.
ازاماتتارىمىز تۇرمىستىق سىبايلاس جەمقورلىقپەن بەتپە-بەت كەلىپ وتىرعان كەزدە ءسىز بەن ءبىزدىڭ ىستەپ جاتقان جۇمىسىمىزدىڭ ەش تيىمدىلىگى بولمايدى. ەشقانداي حالىقارالىق رەيتينگتىڭ دە كەرەگى بولماي قالاتىنى تۇسىنىكتى. ءتۇرلى تارتۋ-تارالعى بەرۋ, سىيلىق تالاپ ەتۋ, ديپلوم ساتىپ الۋ – كەلمەسكە كەتۋى كەرەك.
بۇل ءۇشىن قوعامدا جەمقورلىقتان جاپپاي جيرەنۋگە قول جەتكىزۋىمىز قاجەت.
سىبايلاس جەمقورلىققا قارسى ءىس-قيمىل اگەنتتىگى ۇكىمەتپەن بىرلەسىپ, تۇرمىستىق جەمقورلىقپەن كۇرەس جونىندەگى جول كارتاسىن ازىرلەۋى كەرەك, – دەدى پرەزيدەنت.
تسيفرلاندىرۋ ءىسىن جەدەلدەتۋ قاجەت
مەملەكەت باسشىسى دەرەكتەر قورىن ودان ءارى ينتەگراتسيالاۋ جانە مەملەكەتتىك قىزمەتتەردى تسيفرلاندىرۋدى جەدەلدەتۋگە باسا ءمان بەرۋدى تاپسىردى. سونداي-اق باس پروكۋراتۋرا كاسىپكەرلەردى دالەلسىز قىلمىستىق قۋدالاۋ فاكتىلەرىنە جول بەرمەۋى كەرەك ەكەنىن اتاپ كورسەتتى.
– دەرەكتەر بازاسىن ودان ءارى ينتەگراتسيالاۋ ماسەلەسىنە ەرەكشە نازار اۋدارۋ قاجەت. بىزدە ءبىر ۆەدومستۆونىڭ تالابىنا جاۋاپ رەتىندە باسقا مەملەكەتتىك ورگاننان انىقتاما الاتىن تاجىريبە ءالى كۇنگە دەيىن جويىلعان جوق. مۇنداي اناحرونيزمدەردى تسيفرلاندىرۋ جويۋى كەرەك.
اشىق بيۋدجەتتىڭ ينتەراكتيۆتى كارتاسى 7 تريلليون تەڭگەدەن استام بيۋدجەت قاراجاتىنىڭ جۇمسالۋى تۋرالى اقپاراتتى بارشاعا قولجەتىمدى بولۋىن قامتاماسىز ەتتى (2019-2020 جىلدار)
«سەرگەك» بۇزۋشىلىقتاردى انىقتاۋدا وزىق تەحنولوگيالاردىڭ مەملەكەتكە قانداي پايدا اكەلەتىنىن كورسەتتى. ءارى بۇل جول پوليتسيالارىن جەمقورلىق ارقىلى تاباتىن كىرىستەرىنەن ايىردى. بارشا مەملەكەتتىك ورگاندار, ەڭ ءبىرىنشى اكىمشىلىكتەر وسى تاجىريبەنى قولعا الۋعا ءتيىس. مۇنداي تسيفرلى شەشىمدەر ادام فاكتورىن ازايتىپ, جەمقورلىققا اكەلەتىن جاعدايلاردى بولدىرمايدى, – دەدى ق.توقاەۆ.
زاڭدى كاسىپكەرلىككە كەدەرگى كەلتىرۋ – مەملەكەتتىك قىلمىس
پرەزيدەنت بيزنەستى قورعاۋ, قولداۋ ءىسىنىڭ دە وزەكتى ەكەنىن قوزعادى.
– ەكونوميكالىق قيىندىقتاردىڭ تۋىنداۋى كاسىپكەرلىكتى قولداۋدىڭ وزەكتىلىگىن ارتتىردى. سوڭعى بەس جىلدا زاڭدى كاسىپكەرلىكپەن اينالىسۋعا كەدەرگى كەلتىرۋ بويىنشا 11, رەيدەرلىككە قاتىستى 7 ادام جاۋاپقا تارتىلدى. بۇل ساندار قۇقىق قورعاۋ ورگاندارىنىڭ جۇمىسى ءالى اقساپ تۇرعانىن بىلدىرەدى. 2019 جىلعى جولداۋىمدا زاڭدى كاسىپكەرلىككە توسقاۋىل قويۋ مەملەكەتتىك قىلمىس بولىپ سانالاتىنىن ايتقان ەدىم. باس پروكۋراتۋرا مەن بارلىق قۇقىق قورعاۋ ورگانى وسىنى ەستەن شىعارماۋلارى كەرەك, – دەدى پرەزيدەنت.
مەملەكەت باسشىسى ۇكىمەتكە باس پروكۋراتۋرامەن بىرلەسىپ ءبىر اي ىشىندە وسى ايتىلعان ماسەلەلەردى قامتىعان ناقتى ۇسىنىس ەنگىزۋ تاپسىرىلاتىنىن جەتكىزدى.
پرەزيدەنت ودان ءارى بىرقاتار وڭ وزگەرىستەرگە قول جەتكىزىلگەنىن, ەنگىزىلگەن سىبايلاس جەمقورلىققا قارسى قولداۋ ينستيتۋتى العاشقى جەمىسىن بەرە باستاعانىن ايتا وتىرىپ, بيىلعى العاشقى جارتى جىلدا 510 بيزنەس-جوسپار بويىنشا 114 زاڭسىز ارالاسۋ فاكتى تىركەلگەنىن, بۇل جۇمىستى جالعاستىرۋ قاجەتتىگىن, باس پروكۋراتۋرا كاسىپكەرلەردى قىلمىستىق قۋدالاۋعا نەگىزسىز تارتۋ فاكتىلەرىن بولدىرماۋعا دەرەۋ كىرىسۋگە مىندەتتى ەكەنىن اتاپ ءوتتى. پرەزيدەنتتىڭ ايتۋىنشا, كاسىپكەرلەر مەن ينۆەستورلار سىبايلاس جەمقورلىقتىڭ قىسىمىنان قورعالعانىن سەزىنۋى كەرەك.
قوعامدىق باقىلاۋدى كۇشەيتۋ – ءتيىمدى جول
قاسىم-جومارت توقاەۆ قوعامدىق باقىلاۋدى كۇشەيتۋ ءىسىن دە باسىم مىندەتتەردىڭ ءبىرى رەتىندە اتادى. پرەزيدەنت سىبايلاس جەمقورلىققا قارسى كۇرەستىڭ بارلىق سالالارى بويىنشا قاتاڭ قوعامدىق باقىلاۋ جۇرگىزىلۋگە ءتيىس دەپ ەسەپتەيدى.
– مەملەكەتتىك ورگاندار قانشا تىرىسسا دا, قوعامنىڭ قولداۋىنسىز جەتىستىككە جەتە المايدى. ازاماتتاردا ادالدىق يدەولوگياسى قالىپتاسۋى ءتيىس. قازىر بۇل باعىتتا كوپتەگەن جۇمىستار اتقارىلۋدا. اكادەميالىق ادالدىق ليگاسى, سىبايلاس جەمقورلىققا قارسى ەرىكتىلەرى كلۋبتارى, ادالدىق دۇڭگىرشەكتەرى جانە ءوز وزىنە قىزمەت ەتۋ كاسسالارى – وسىنداي جوبالار تۋرالى اقپارات كەڭىنەن جاريالانۋى كەرەك.
سونىمەن قاتار سىبايلاس جەمقورلىققا قارسى كۇرەستىڭ بارلىق باعىتتارى بويىنشا قوعامدىق باقىلاۋدى كۇشەيتۋ قاجەت. ازاماتتىق قوعام مەملەكەتتىك ورگاندارعا كومەكتەسۋگە دايىن. «ادال كومەك» پلاتفورماسىن قۇرۋ ارقىلى الەۋمەتتىك وسال توپتاردان شىققان 11 مىڭنان استام ازامات تانىمال زاڭگەرلەردەن تەگىن كەڭەس الدى, – دەدى پرەزيدەنت.
مەملەكەت باسشىسى ازاماتتارمەن ديالوگ ورناتۋ ارقىلى سىبايلاس جەمقورلىق بەلەڭ الىپ, قوعام نارازىلىعىن تۋعىزىپ جۇرگەن تۇيتكىلدى سالالاردى انىقتاۋعا بولاتىنىن ايتتى.
– ادامدار بۇرىنعىشا جوعارى وقۋ ورنى, كوللەدج, ءتىپتى مەكتەپتەردەگى سىبايلاس جەمقورلىقتى ايتىپ, شاعىمدانادى. جەمقورلىق ازاماتتارىمىزدىڭ بويىنا ءسىڭىپ, ءتىپتى قوعامنىڭ قالىپتى قۇبىلىسىنا اينالىپ كەتۋى مۇمكىن. باستى ماسەلە – وسى. ال كاسىپكەرلەر جەر كوميتەتى, ورتكە قارسى قىزمەت, سالىق جانە كەدەن ورگاندارىن جەمقورلىق جايلاعان دەپ ەسەپتەيدى. جولدىڭ ساپاسىنا بايلانىستى دا جۇرتشىلىقتىڭ الاڭداۋشىلىعى جوعارى. سونداي-اق سىبايلاس جەمقورلىققا قارسى ءىس-قيمىل كوميسسياسى ماعان سۋ شارۋاشىلىعى سالاسىندا ايتارلىقتاي تۇيتكىلدەر بار ەكەنىن حابارلادى. مىنە, وسى ماسەلەلەر بويىنشا قوعامدىق باقىلاۋ تەتىگى جۇمىس جاساۋعا ءتيىس. بۇل شاراعا ۇكىمەتتىك ەمەس ۇيىمداردى تارتقان ءجون. ولاردى نورماتيۆتىك-قۇقىقتىق اكتىلەردى ساراپتاۋ ىسىنە قاتىستىرۋ كەرەك. Cىبايلاس جەمقورلىققا قارسى ءتيىمدى ءىس-قيمىل, ونىمەن ىمىراسىز كۇرەس قوعامنىڭ وزەكتى ماسەلەسىنىڭ بىرىنە اينالعالى كوپ جىلدىڭ ءجۇزى بولدى. ەلىمىزدىڭ قاۋىپسىزدىگى مەن حالقىمىزدىڭ اماندىعى وسى باعىتتاعى جۇيەلى ءارى تاباندى شارالارعا بايلانىستى.
ۇكىمەتكە قاعازباستىلىق پەن بيۋروكراتياعا سالىنباي, سىبايلاس جەمقورلىققا قارسى ءىس-قيمىل اگەنتتىگى بەرگەن ۇسىنىستاردى ءبىر اي مەرزىمدە جان-جاقتى پىسىقتاۋدى تاپسىرامىن. سونىڭ ناتيجەسى بويىنشا ناقتى شارالار كەشەنى جاسالۋى ءتيىس. نەگىزگى ماقسات – جەمقورلىقتىڭ تامىرىنا بالتا شابۋ, ونى تۇبەگەيلى جويۋ. بۇل جۇمىستى ەش سوزبالاڭعا سالماي, قارقىندى تۇردە جۇرگىزۋ قاجەت.
پرەزيدەنت اكىمشىلىگى قولعا الىنعان بارلىق شارالاردى قاتاڭ باقىلاۋعا الىپ, ناتيجەسىن ماعان ۇنەمى حابارلاپ وتىرۋى كەرەك, – دەپ تۇيىندەدى ءسوزىن پرەزيدەنت.
كەڭەستە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ, دەنساۋلىق ساقتاۋ ءمينيسترى الەكسەي تسوي, ىشكى ىستەر ءمينيسترى ەرلان تۇرعىمباەۆ, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترىنىڭ ءبىرىنشى ورىنباسارى باعدات مۋسين, قارجى ءمينيسترى ەرۇلان جاماۋباەۆ, اۋىل شارۋاشىلىعى ءمينيسترى ساپارحان وماروۆ, شىمكەنت قالاسىنىڭ اكىمى مۇرات ايتەنوۆ پەن جامبىل وبلىسىنىڭ اكىمى بەردىبەك ساپارباەۆ ەسەپ بەردى.
جولدىباي بازار,
اباي اسانكەلدى ۇلى,
«Egemen Qazaqstan»
