• 23 قازان, 2013

بوكس. الەم چەمپيوناتى. 8 بوكسشىمىز - جارتىلاي فينالدا! (ۆيدەو)

380 رەت

كورسەتىلدى

10 مين

وقۋ ءۇشىن

Egemen Qazaqstan

23-10-13-kairat eraliev-3

بۇگىن, 23 قازان كۇنى الماتىدا ءوتىپ جاتقان بوكستان XVII الەم چەمپيوناتىندا 1/4 فينالدىق شايقاستار بولىپ ءوتىپ, جاھاندىق جارىستىڭ جۇلدەلەرى جۇيەگىنە ەنەتىن ەنشىلەستەر ەسىمدەرىن انىقتادى. بۇل تالاسقا دۇنيە ءجۇزىنىڭ 30 ەلىنەن 80 بوكسشى قاتىستى. سول دۇرمەكتە قازاقستاننىڭ 9 تارلانى جارىسقا جالىن قوسىپ, 8-ءى جارتىلاي فينالعا شىقتى. ءبىزدىڭ قۇراما ءۇشىن كۇندىزگى سەسسيا ساتتىرەك اياقتالدى. مۇندا 9 بوكسشىنىڭ 4-ءى ونەر كورسەتىپ, ءبارى دە ۇلكەن ابىروي بيىگىنەن كورىندى. وسى كۆارتەتتىڭ جەڭىستى جولىنىڭ اۋەلگى ارناسىن 49 كيلوعا دەيىنگى سالماقتاعى ءبىرجان جاقىپوۆ تارتتى. ول پۋەرتو-ريكونىڭ جالعىز ءۇمىتى – ەنتوني چاكون ريۆەرانى وتە سەنىمدى ۇتىپ شىعىپ, قازاقستان قورجىنىنا العاشقى مەدالدىڭ تۇسكەنىن پاش ەتتى. ءبىز ءبىرجاندى بۇل جولى ۇلكەن جىگەر ۇستىندە كوردىك. ونىڭ قازىر ناعىز سپورتتىق بابىندا ەكەنى ايقاس باستالعان شاقتا-اق بايقالدى. ۇرىس بارىسىندا سونىمەن بىرگە ونى جۇرگىزۋدىڭ عالامات تەحنيكاسىن كورسەتكەن بوكسشىمىز قارسىلاسىنا ءۇش راۋند بويى دەس بەرمەدى. بۇل جولى شارشى الاڭدا ءبىرىنشى نومىرمەن ويناعان ول شايقاستىڭ سوڭىن دا وتە اسەرلى اياقتادى. ال كەلەسى جەكپە-جەكتە كۋبالىق يوسۆاني سوتو ۆەيتيا يتاليان مانۋەل كاپپايدى يتجىعىس تىرەس ۇستىندە ارەڭ جەڭدى. ەندى ول جارتىلاي فينالدا بىرجانمەن قولعاپ تۇيىستىرەدى. بۇل ەكى بوكسشى بۇعان دەيىن ءبىر رەت ءبىر-بىرىمەن جۇدىرىق سىلتەسىپ ۇلگەرگەن. ول 2011 جىلعى 26 قىركۇيەك كۇنى باكۋدەگى الەم چەمپيوناتىنىڭ 1/32 فينالى كەزىندە ورىن العان. شايقاس قورىتىندىسى 21:11 ەسەبىمەن بوستاندىق ارالى جاس پەرىسىنىڭ پايداسىنا شەشىلگەن. مىنە, بىرجانعا سونىڭ قارىمتاسىن قايتارۋدىڭ ادەمى وڭتايى كەلگەلى تۇر. سولاي ەتۋگە ابدەن بولاتىنىن بىزدەن وسىدان كەيىن رينگتە تاعى ءبىر كۋبالىقپەن ۇستاسقان 56 كيلوعا دەيىنگى سالماقتاعى قايرات ەراليەۆ كەرەمەت ەتىپ كورسەتتى. ول وسى چەمپيوناتتاعى ەڭ اتاعى زور, 2012 جىلعى لوندون وليمپيالىق ويىندارىنىڭ جالعىز چەمپيونى روبەيسي راميرەستى تالاسسىز جەڭدى. تەگىندە, بۇل جولى جەڭىمپاز ۇرىستىڭ تاكتيكاسىن دۇرىس قالىپتاستىرا الماي قالعان سياقتى. كەزدەسۋ باستالعان ساتتەن ەكىنشى نومىرگە ءوز ەركىمەن كوشكەن ونىڭ باسەڭدىگى قايراتتىڭ ءوز-وزىنە كەلىپ, سەنىمى ارتا تۇسۋىنە كوپ كومەكتەستى. ەكىنشى راۋندتا ول ءتىپتى ەركىن كەتتى. سونىڭ ناتيجەسىندە اتاقتى قارسىلاسىن تەڭسەلتىپ جىبەرەتىندەي بىرنەشە اۋىر سوققىلار جاسادى. سولاردىڭ بىرىندە رەفەريدىڭ ەسەپ اشاتىنداي دا رەتى بار ەدى. ال ءۇشىنشى راۋندتا ءوزىنىڭ ۇتىلىپ بارا جاتقانىن سەزگەن كۋبالىق قابىلان ىشقىنا العا ۇمتىلعان. الايدا, قايرات باعىتتىڭ بۇلاي وزگەرۋىنە دايىن بولىپ شىقتى. ول جاقسى قورعانا ءجۇرىپ, رەتى كەلگەن جەرىندە سوققىلار بەرۋدەن دە تانبادى. مۇنىڭ قورىتىندىسى سول, تورەشىلەردىڭ ۇشەۋى دە جەڭىس قازاق بوكسشىسى قانجىعاسىندا كەتكەنىن ايعاقتاپ بەردى. جارتىلاي فينالدا ول ءۇندى شيۆا تاپانى ۇتقان ازەربايجان دجاۆيد چەلەبيەۆپەن ۇشىراسادى. شىنى كەرەك, ءبىز بۇدان كەيىن ۇرىس الاڭىنا قىرعىز ەرمەك ساكەنوۆپەن بىرگە كوتەرىلگەن 64 كيلوداعى مەرەي اقشالوۆتىڭ الدىڭعى تولقىننىڭ ارىندى اعىنىن جاراسىمدى جالعاستىرا الاتىنىنا ءشۇبا كەلتىرگەن جوق ەدىك. بۇعان سەبەپ, بيىلعى شىلدە ايىندا يوردانيادا وتكەن ازيا بىرىنشىلىگىندە چەمپيون اتانعان قازاق بوكسشىسى جارتىلاي فينالدا وسى قارسىلاسىن ايقىن باسىمدىلىقپەن ۇتقان. سونىڭ دا اسەرى بولعان شىعار, ءبىزدىڭ باعلان ۇرىسقا كوتەرىڭكى كوڭىل كۇيمەن كىرىستى. ۇدايى قيمىل ۇستىندە جۇرگەن مەرەيدىڭ شەبەرلىگى جاعىنان دا, دەڭگەيى جاعىنان دا قارسىلاسىنان ەداۋىر جوعارى ەكەنى ايقىن بايقالىپ تۇردى. جاتتىقتىرۋشىلارىنىڭ نۇسقاۋىن وسىلايشا تياناقتى ورىنداپ شىققان ول كەلەسى جولى ليتۆان ەۆۋالداس پەتراۋسكاستى كۇردەلى جاعدايدا 2:1 ەتىپ ۇتقان برازيليالىق ەۆەرتون لوپەسپەن فينالعا شىعۋ جولىندا شايقاسادى. بىراق قارسىلاسىنىڭ اتاعى ۇلكەن. 2011 جىلعى الەم چەمپيونى. لوندون وليمپياداسىندا 1/8 فينالدا كۋبالىق بولاشاق چەمپيون روسنيەل يگلەسياستان ۇتىلىپ قالعان. كۇندىزگى سەسسياداعى تورتتىكتىڭ نۇكتەسىن قۇراماداعى ەڭ جاس بوكسشى جانىبەك ءالىمحان ۇلى قويدى. ول 2011 جىلعى الەم چەمپيوناتىنىڭ قولا جۇلدەگەرى, ەۋروپانىڭ بيىلعى جىلعى ءفيناليسى رۋمىن بوگدان ءجۋراتونيدى 3:0 ەتىپ تىزە بۇكتىردى. وسى ءتورت شايقاستىڭ ىشىندەگى ەڭ كۇردەلىسى دە وسى بولدى. بۇعان وسى كەزگە دەيىنگى ەكى ۇرىسىن دا كەرەمەت جارقىلمەن وتكىزىپ, كوپتىڭ كوتەرە ماقتاۋىنا ىلىگىپ قالعان جاس بەرەننىڭ ەپتەپ توقمەيىلسۋ كادەسىنە ەلىگە تۇسكەن دە ءبىر سەبەپ بولعان سياقتى. نە دەگەندە دە, ايقاستىڭ باس جاعى ول ءۇشىن اۋىرلاۋ ءوتتى. قولادان قۇيىلعان قالىپتاي ءبىر ىرعاقپەن اۋىر قوزعالىپ, اۋىر سوققى جاسايتىن بەسسارابيالىق باعلاننىڭ قيمىلى ونى ءبىراز تىعىرىققا تىرەدى. ەكىنشى راۋندتا ءتىپتى رۋمىننىڭ قارقىنىنا ىلەسۋى قيىنداپ بارا جاتقان جىگىتىمىزدىڭ تۇبىندە جەڭىسكە جەتۋى قيىن بولاتىنىن دا پايىمداي باستاعانبىز. قۋانىشتىسى, سوڭعى شەشۋشى كەزەڭدە جانىبەك بار كۇش-جىگەرىن بويىنا جيىپ, اقىرعى شابۋىلدارعا اقىرا كىرىستى. ءتۇپتىڭ تۇبىندە تارازىنىڭ باسىن سول جورىقتار جوسىعى وعان اۋدارىپ تاستادى. وسى ساتتە جارتىلاي فينالداعى باسەكەلەس تە بەلگىلى بولا قالدى. بۇل ورىندى نەمىس شتەفان حاەرتەلدى ۇتقان اعىلشىن ەنتوني فوۋلەر باستى. اراعا ءبىر ساعات ءۇزىلىس سالىپ وتكەن كەشكى سەسسيادا دا ءبىزدىڭ 4 بوكسشى الاڭ تورىندە اتويلادى. ال بەسىنشى ساڭلاعىمىز – اسا اۋىر سالماقتاعى يۆان دىچكومەن قولعاپ تۇيىستىرەر ءۇندى ساتيش كۋمار شايقاسقا شىقپاي قالدى. شاماسى, وسىدان ەكى اي عانا بۇرىن امماندا ءبىزدىڭ باتىردان وڭباي ۇتىلعانى ونى توقتاتسا كەرەك. ءسويتىپ, ۆانيا جارتىلاي فينالعا ۇرىسسىز بەتتەدى. وكىنىشتىسى, بۇل كەزەڭدەگى ۇرىستاردىڭ باسىن باستاعان 52 كيلوداعى ءىلياس سۇلەيمەنوۆتىڭ ۋەلستىك ەندريۋ سەلبيمەن كەزدەسۋى بىزگە بۇگىنگى كۇننىڭ ءبىرىنشى جانە سوڭعى جەڭىلىسىن اكەلدى. ءبىزدىڭ بالانى لوندون وليمپياداسىنىڭ 1/8 فينالىندا جولدان قاققان ەۋروپانىڭ 2013 جىلعى چەمپيونى, 2011 جىلعى الەم چەمپيوناتىنىڭ كۇمىس جۇلدەگەرى بۇل جولى تاعى دا ونىڭ الدىنا توسقاۋىل بولىپ شىعا كەلدى. بىراق ءبىز تاپ الماتىنىڭ اياسىندا ۆاللي بالاسىنا ەسەسىن جىبەرگەن ءىلياستى كورگەن جوقپىز. ءبىزدىڭ باعلاندى جولدان جاڭىلدىرعان تەك ونىڭ ءوزىنىڭ الدا تۇرعانىنا سەنىمى باسىم ءتۇسىپ, ءۇشىنشى راۋندتىڭ سوڭىن «كۇتىپ الۋ» تاكتيكاسىمەن وتكىزگەنى بولۋى عانا مۇمكىن. ەسەسىنە, بۇدان كەيىنگى ساڭلاقتارىمىز شاشالارىنا شاڭ جۇقتىرمادى. دەگەنمەن, بۇعان قاراپ, بارلىق شايقاس تاباعا قۇيىلعان مايداي ەرىپ, ءبىزدىڭ پايدامىزعا وزىنەن-ءوزى شەشىلە بەرگەن ەكەن, دەگەن دە ۇعىم تۋماۋى كەرەك. جىگىتتەرىمىزدىڭ قاي-قايسىسى دا وزدەرىنە تيەسىلى جەڭىستى كەسكىلەسكەن تارتىستىڭ تەربەۋىندە تارتىپ اكەتتى. سونىڭ ايقىن ءبىر ۇلگىسىن 60 كيلوداعى بەرىك ءابدىراحمانوۆ كورسەتىپ, پاسەيىپ بارا جاتقان كوڭىل اۋانىن قايتا كوتەرىپ تاستادى. جاسىراتىنى جوق, ونىڭ ۆەنەسۋەلالىق قارسىلاسى لۋيس دياس قولىنىڭ دا, بويىنىڭ دا ۇزىندىعىمەن ءبىراز قيىندىق كەلتىرىپ, ۇرىستىڭ بىردەن جانكۇيەر قالاعان ارنادا اعىنداپ جۇرۋىنە ىرىق بەرمەدى. ءبىر قۋانىشتىسى, بەرىك ەكىنشى راۋندتان باستاپ بۇعان باسقا امال-ايلا تاپتى. ول قارسىلاسىن ۇدايى بۇرىشتان-بۇرىشقا قۋا ءجۇرىپ, جاقىن قاشىقتىقتان سوققىلاۋعا كوشتى. ءسويتىپ, ءوزىنىڭ 3:0 ەتىپ جەڭگەنىنە تورەشىلەردىڭ دە كوزدەرىن جەتكىزدى. ەندىگى شايقاس لوندون وليمپياداسىنىڭ قولا جۇلدەگەرى, 2011 جىلعى الەم چەمپيونى كۋبالىق لازارو الۆارەسپەن وتەدى. كەلەسى كەزەكتە قازاقستاندىق كورەرمەندەردى قۋانتقان كوماندا كاپيتانى, 69 كيلو سالماقتاعى دانيار ەلەۋسىنوۆتىڭ دە قارسىلاسى وڭاي جاعىلاتىن جاڭعاق بولعان جوق. 2012 جىلعى لوندون وليمپياداسى مەن 2011 جىلعى الەم چەمپيوناتىنىڭ قولا جۇلدەگەرى كىم-كىمنىڭ دە تاقياسىنا تار كەلمەيدى. مۇنىڭ ۇستىنە ونىڭ البيون جەرىندەگى الاماندا ءبىزدىڭ كاپيتاندى جەڭىپ كەتكەنى تاعى بار. سول تارلان – يتاليان ۆينچەنتسو مانگيكاپرە بۇل جولى دا ايبىنىن اسىرماقشى بولدى. بىراق ارىنىن ءبىزدىڭ بوكسشى تەز باسىپ وتىردى. قاشىقتىقتى ۇدايى دۇرىس ۇستاي بىلگەن دانيار تىم ارتىق قيمىلعا بارماي-اق وزىنە كەرەكتى ۇپايلاردى جيناي بەردى. سوڭىندا ونىڭ جەڭگەنىنە ەشكىمنىڭ كۇمانى بولعان جوق. ەندى ونى وسى جولى لوندوننىڭ فينالىندا ءبىزدىڭ سەرىك ساپيەۆكە جول بەرگەن اعىلشىن فرەد ەۆانستان ايلاسىن اسىرعان گەرمانيالىق ارميان ارايك مارۋتيان كۇتىپ تۇر. ءدال وسىنداي ءتالىمدى تاكتيكانى 81 كيلوداعى ادىلبەك نيازىمبەتوۆ تە ۇستاندى. ونىڭ ءۇندى سۋميت سانگۆانمەن ۇرىسى اسا ءبىر قاتتى قارقىندا وتپەگەنىمەن, ءبىزدىڭ بوكسشىنىڭ باسىمدىعىن ءبۇتىن بايقاتقان بايىپتى بارلاسۋلاردىڭ ءبىرى بولدى. وسى جەڭىسى ونى ەرتەڭ امماندا وتكەن بيىلعى ازيا بىرىنشىلىگىنىڭ فينالىندا الىن وراپ كەتكەن وزبەك ويبەك مامازۋلۋنوۆپەن قايتا ۇشىراستىرادى. تاشكەنتتىڭ تۇيعىنى گوللانديالىق پەتەر مۋللەنبەرگتى ايقىن باسىمدىقپەن ۇتقاننان كەيىن الداعى اينالىمعان اياق باستى. سونىمەن, ەرتەڭ بوكسشىلار دەمالادى. ال ارعى كۇنى جارتىلاي فينالدىق ايقاستار وتەدى. وعان ءبىزدىڭ 8 بوكسشىدان باسقا, كۋبانىڭ – 5, رەسەيدىڭ – 4, يتاليا يەن ازەربايجاننىڭ ءۇش-ۇشتەن وكىلدەرى قاتىسادى. {youtube}IorXRJbw7BA {/youtube} {youtube}2rWdxHwMfPc{/youtube}