شىعىس قازاقستان وبلىسى وسكەمەن قالاسىنىڭ سول جاعالاۋىن دامىتۋعا باسىمدىق بەرىلدى. بۇل تۋرالى YK-news.kz حابارلادى.
باس جوسپار بويىنشا 20 جىل ىشىندە سول جاعالاۋدا كوپقاباتتى اۆتوتۇراق, مەكتەپتەر, سپورت الاڭى مەن اۋرۋحانالار بوي كوتەرەدى. وسىنىڭ ءبارى 19-ءشى شاعىن اۋدانعا شوعىرلانادى. «قازىر ءبىز سول جاعالاۋدان ورىن الاتىن نىسانداردىڭ ينجەنەرلىك ينفراقۇرىلىمىن پىسىقتاۋ ۇستىندەمىز. سونىڭ ىشىندە ساپالى جول سالۋ ماسەلەسى دە تۇر. جوسپار بويىنشا وسى اۋماقتا بىرنەشە نىسانداردىڭ قاتارىندا 4 مەكتەپ پەن 9 بالالار باقشاسى سالىنادى»,- دەيدى وسكەمەن قالالىق ساۋلەت جانە قۇرىلىس ءبولىمى باستىعىنىڭ ورىنباسارى داۋرەن قاسىموۆ.
باس جوسپاردا كورسەتىلگەندەي, جوعارىدا اتالعان شاعىن اۋداندا جالپى 130-دەن اسا عيمارات سالىنادى ەكەن. سولاردىڭ اراسىندا قالالىق اكىمدىك, وبلىستىق پروكۋراتۋرا مەن وبلىستىق سوت, كينوتەاتر بوي كوتەرەدى. ال قالا تۇرعىندارىنىڭ قولايلى دەم الۋى ءۇشىن ۇلكەن ساياباقتىڭ اۋماعى جاسىل-جەلەكپەن كومكەرىلەدى.
دانيار تۇيمەباي.
