ستۋدەنت قىزدى ولتىرگەن جوعارعى سوتتىڭ بۇرىنعى قىزمەتكەرى بوستاندىققا شىقتى. بۇل تۋرالى «جەتىنشى» تەلەارنا حابارلادى.
بۇعان دەيىن №2 ەسىل اۋداندىق سوتى د.الدياروۆتى 1,5 جىلعا باس بوستاندىعىنان ايىرعان بولاتىن. ەندى قالالىق سوتتىڭ جاڭا شەشىمى بويىنشا ونى 1 جىل 2 اي 3 كۇنگە باس بوستاندىعىنان شەكتەدى. وسىلايشا 3-ءشى ناۋرىزدان باستاپ تەمىر توردىڭ ارعى جاعىندا وتكىزگەن ءاربىر كۇنى ەكى كۇنگە تەڭەلىپ, ول جازاسىن وتەپ شىعىپتى. سونداي-اق سوت الدياروۆقا قىلمىستىق اتقارۋ جۇيەسى قىزمەتكەرلەرىنە ەسكەرتپەستەن قونىس اۋدارۋعا, قالادان شىعۋعا جانە تۇنگى ساعات وننان كەيىن كوڭىل كوتەرۋ ورىندارىنا بارۋعا تيىم سالدى. ەستەرىڭىزگە سالا كەتەيىك, دارحان الدياروۆ تۋعان كۇن كەشىن اتاپ ءوتىپ جاتقان ءبىر توپ ستۋدەنتپەن سوزگە كەلىپ قالىپ, ولارعا ءوزىنىڭ اڭشىلىق قارۋىنان وق اتقان ەدى. جابىق ەسىككە اتىلعان وق 18 جاستاعى ستۋدەنت مەرۋەرت قوجابەكوۆانىڭ كەۋدە تۇسىنا ءتيىپ, قىز بالا سول جەردە جان تاپسىرعان بولاتىن.
سوتتىڭ مۇنداي شەشىمگە كەلۋىنە تاراپتاردىڭ تاتۋلاسۋى سەبەپ بولىپتى. سونداي-اق ايىپكەر بارلىق كەلتىرىلگەن شىعىندى وتەگەن. ونىڭ اسىراۋىندا جاس نارەستەسى بارى جانە ءبىرىنشى رەت سوتتى بولىپ وتىرعانى دا قاپەرگە الىنعان ەكەن.
باقىتبەك كەنەش ۇلى.
