ونى ەلباسى اتىمەن اتاۋعا ۇسىنىس جاسالدى
استاناعا ايگىلى امەريكالىق ەكونوميست, «ءۇشىنشى يندۋستريالىق رەۆوليۋتسيا» ەڭبەگىنىڭ اۆتورى دجەرەمي ريفكين كەلدى. ول مەملەكەتتىك ورگاندار مەن ۇلتتىق كومپانيالاردىڭ, سونداي-اق, ىسكەرلىك قۇرىلىمداردىڭ باسشىلارىنا ارنالعان سەمينار وتكىزدى. وعان پرەمەر-مينيستر سەرىك احمەتوۆ باستاعان بىرقاتار مينيسترلەر قاتىستى.
ونى ەلباسى اتىمەن اتاۋعا ۇسىنىس جاسالدى
استاناعا ايگىلى امەريكالىق ەكونوميست, «ءۇشىنشى يندۋستريالىق رەۆوليۋتسيا» ەڭبەگىنىڭ اۆتورى دجەرەمي ريفكين كەلدى. ول مەملەكەتتىك ورگاندار مەن ۇلتتىق كومپانيالاردىڭ, سونداي-اق, ىسكەرلىك قۇرىلىمداردىڭ باسشىلارىنا ارنالعان سەمينار وتكىزدى. وعان پرەمەر-مينيستر سەرىك احمەتوۆ باستاعان بىرقاتار مينيسترلەر قاتىستى.
مۇنىمەن قاتار, سەمينارعا ۇلتتىق كومپانيالاردىڭ جەتەكشىلەرى, ەلدەگى شەتەلدىك كومپانيالاردىڭ باسشىلارى مەن ءتۇرلى سالانىڭ وكىلدەرى دە كەلدى. سەمينار 2 ساعاتقا ۇلاستى. ەكونوميكالىق ترەندتەردى زەرتتەۋ قورىنىڭ پرەزيدەنتى, جوعارىدا اتالعان ەڭبەكپەن قاتار «ەمپاتيكالىق وركەنيەت», «ەۋروپالىق ارمان», «سۋتەگىلىك ەكونوميكا», «بيوتەحنولوگيالار عاسىرى» جانە «جۇمىس سوڭى» اتتى ادامزات ومىرىنە قاجەتتى ەڭبەكتەر جازعان ريفكين بۇل جولى «ءۇشىنشى يندۋستريالىق رەۆوليۋتسيا» جونىندە باياندادى. ول الەمدەگى ەنەرگيا ماسەلەلەرىنە توقتالىپ, بارلىق ەلدەردى كومىر سۋتەگىنەن قۋات كوزىن ءوندىرۋدى بىرتىندەپ شەكتەپ, گەرمانيا سياقتى كەزەڭ-كەزەڭىمەن «جاسىل ەكونوميكا» مەن «جاسىل» ەنەرگياعا كوشۋگە شاقىردى. ءسويتىپ, اقىلدى ەنەرگياعا كوشۋدىڭ ءتۇرلى جولدارىن ۇسىندى. ەگەر ادامزات قورشاعان ورتانى بۇدان ارتىق لاستاي بەرەتىن بولسا, كەلەشەكتە ورنى تولماس اپاتتار ورىن الۋى ىقتيمال ەكەنىن دە تىلگە الدى.
دوكتور ريفكين قازاقستان حالقىن 2017 جىلى ەلىمىزدە وتەتىن ەكسپو كورمەسىن وتكىزۋ بايقاۋىن جەڭىپ الۋىمەن قۇتتىقتادى. سونىمەن قاتار, كورمە تاقىرىبى بۇكىل الەم حالقىنىڭ جاڭا داۋىرگە, ياعني «جاسىل ەنەرگياعا» ءوتۋ كەزەڭدەرىنىڭ العىشارتى بولاتىنىن ايتتى. نەگىزى دجەرەمي ريفكين قازاقستاننىڭ «جاسىل» ەكونوميكاعا كوشۋ جونىندەگى تۇجىرىمدامانى ازىرلەۋ بارىسىندا كونسۋلتانت رەتىندە تارتىلىپ, ەكسپو-2017 كورمە كەشەنىنىڭ ەسكيز-يدەيالارى بويىنشا حالىقارالىق ساۋلەتشىلىك بايقاۋدىڭ كەڭەسىن باسقارعان ەدى. سوندىقتان ونىڭ ءبىزدىڭ ەلىمىزدى جاقسى بىلەتىنى كورىنىپ تۇردى. ۇلى جىبەك جولىنىڭ ورتاسىنا ورنالاسقان قازاقستان باتىس پەن شىعىستىڭ اراسىندا «جاسىل» ەنەرگيا كوپىرىنە اينالىپ, وسى سالالاردىڭ ورتالىق حابىنا اينالۋعا دا مۇمكىندىگى مول, دەدى. سىزدەردىڭ ەلدەرىڭىز باي ءارى ماماندارىڭىز ساۋاتتى ەكەن, دەپ جالعاستىردى ول ءسوزىن. سوندىقتان تارتىناتىن ەشتەمە جوق, دەپ تۇيىندەدى.
ەگەر ەسكە الار بولساق, مەملەكەت باسشىسى نۇرسۇلتان نازارباەۆ ءوزىنىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى اتتى» جولداۋىندا ءۇشىنشى يندۋستريالىق رەۆوليۋتسيانى ححI عاسىردىڭ ون جاھاندىق سىن-قاتەرىنىڭ ءبىرى رەتىندە اتاپ وتكەنى بەلگىلى. بولعان سەميناردا سول سىن-قاتەردەن قازاقستاننىڭ لايىقتى ءوتۋى اڭگىمە ارقاۋىنا اينالدى. سەميناردىڭ ەكىنشى ءبولىمى ساۋال-جاۋاپقا, قىزىقتى پىكىرتالاسقا ۇلاستى. سونداعى ءبىرتالاي ۇسىنىستاردى سارالاعان دوكتور ريفكين نازارباەۆ ۋنيۆەرسيتەتىنە جوعارى باعا بەرە كەلىپ, الەمنىڭ ەڭ وزىق تەحنولوگيالارى وسى جەردە شوعىرلانعانىن, سوندىقتان الەم بويىنشا تەڭدەسى جوق جاڭادان اشىلاتىن عىلىمي-تەحنولوگيالىق بيوسفەرا زەرتتەۋ ورتالىعىن مەملەكەت باسشىسىنىڭ اتىمەن اتاۋعا ۇسىنىس ءبىلدىردى. ونىڭ ويىنشا, بيوسفەرالىق زەرتتەۋ ورتالىعىن ەلباسى اتىمەن اتاۋعا قازاقستان حالقىنىڭ تولىق قۇقىعى بار.
دوكتور دجەرەمي ريفكين بۇگىندە ماڭىزدى بىرقاتار كەزدەسۋلەر وتكىزىپ, نازارباەۆ ۋنيۆەرسيتەتىندە ءدارىس وقيدى.
نۇرباي ەلمۇراتوۆ,
«ەگەمەن قازاقستان».
