سوڭعى ءۇش كۇندە الماتىدا ءوتىپ جاتقان بوكستان الەم چەمپيوناتى ەكۆاتوردان استى. سونىمەن, 13 كۇننەن تۇراتىن جاھاندىق جارىس مارافونىنىڭ 8 كۇنى ارتتا قالدى. مۇندا سەنبى-جەكسەنبى كۇندەرى 1/16 فينالدىق شايقاستار بولىپ ءوتىپ, دۇيسەنبى كۇنى 1/8 فينالدىق ۇرىستار باستالىپ كەتتى. بۇل – ەندى ءبىر قىردىڭ استىنان وتكەن سوڭ مەدالداردىڭ اۋىلى دا كوز ۇشىنان كورىنەدى دەگەن ءسوز.
سوڭعى ءۇش كۇندە الماتىدا ءوتىپ جاتقان بوكستان الەم چەمپيوناتى ەكۆاتوردان استى. سونىمەن, 13 كۇننەن تۇراتىن جاھاندىق جارىس مارافونىنىڭ 8 كۇنى ارتتا قالدى. مۇندا سەنبى-جەكسەنبى كۇندەرى 1/16 فينالدىق شايقاستار بولىپ ءوتىپ, دۇيسەنبى كۇنى 1/8 فينالدىق ۇرىستار باستالىپ كەتتى. بۇل – ەندى ءبىر قىردىڭ استىنان وتكەن سوڭ مەدالداردىڭ اۋىلى دا كوز ۇشىنان كورىنەدى دەگەن ءسوز.
ەندى وسى ءۇش كۇننىڭ كورسەتكىشتەرىنە شولۋ جاساپ وتەيىك.
19 قازان, سەنبى
بۇل كۇنى باستالعان ەكىنشى اينالىمنىڭ, ياعني 1/16 فينالدىڭ ىرىكتەۋ جەكپە-جەكتەرىنە 49, 64, 75 جانە 91 كيلوعا دەيىنگى بوكسشىلار قاتىستى. ال جارىس كۇنىنىڭ تۇندىگىن 49 كيلو سالماقتاعى ءبىزدىڭ ءبىرجان جاقىپوۆ پەن رەسەيلىك بەليك گالانوۆ اشتى. اتالعان ەكى بوكسشى ءبىر-بىرىنە شىن مانىندە لايىقتى قارسىلاستار ەدى. وزىنەن 5 جاس كىشىلىگى بار قايسار جىگىتپەن ءبىرجان ۇرىس تاكتيكاسىن وتە ساۋاتتى قۇردى. ادەتتە ول ءبىرىنشى نومىرمەن وينامايتىن. وعان كوبىنە شابۋىلعا شىققان باسەكەلەسىنىڭ اشىلىپ قالعان ساتتەرىندە سوققى بەرىپ وتىرۋ ۇيرەنشىكتى قيمىل ەدى. مۇنى كۇتپەگەن بەليك جۇرىسىنەن جاڭىلدى. ءبىرىنشى راۋندتا وسىلاي باسىم تۇسكەن قازاقستاندىق سول ارتىقشىلىعىن ۇرىس سوڭىنا دەيىن ساقتاي ءبىلدى.
كەلەسى, 56 كيلوعا دەيىنگى سالماقتاعى قايرات ەراليەۆتىڭ رۋمىن نيكولاە اندرەانامەن جەكپە-جەگى بۇعان قاراعاندا اۋىرلاۋ ءوتتى. دەگەنمەن, ءبىزدىڭ باعلاننىڭ جاقىن ايقاسقا بارا بەرمەي, قارسىلاسىمەن ارا قاشىقتىقتى ساقتاي وتىرىپ, ۇرىس سالۋى ونىڭ ءتۇپتىڭ تۇبىندە جەڭىسكە جەتۋىنە باستى تيەك بولدى. ول رۋمىندى الىستان جاسقاي ۇرا ءجۇرىپ, ۇپاي قورىن مولايتا بەردى. مۇنىسىن تورەشىلەر دە دۇرىس بەزبەنگە سالىپ وتىرىپتى. قايرات 3:0 دەگەن ەسەپپەن جەڭىستى سۋىرىپ اكەتتى. ءبىزدىڭ بۇل كۇنى رينگكە كوتەرىلگەن قۇراماداعى ەڭ جاسى كىشى ساڭلاعىمىز 75 كيلوعا دەيىنگى سالماقتاعى جانىبەك ءالىمحان ۇلى كەشكى سەسسيادا ازەربايجاندىق سولتان ميگيتينوۆپەن ۇشىراستى. ايتا كەتۋ كەرەك, بۇل وسى كۇنگى ەڭ قىزۋقاندى ايقاستاردىڭ ءبىرى بولدى. قارسىلاسىنىڭ العاشقى ءنوپىر شابۋىلىنا توتەپ بەرگەن جانىبەك وزىنە قولايلى ديستانتسيا تاۋىپ الدى. سول قاشىقتىقتان سولتانعا جۇدىرىق سىلتەدى دە وتىردى. قۇلاشتاپ ۇراتىن شامادا تۇرعان ول باقتالاسىن سوققىنىڭ استىندا قالدىردى. بىراق, جەكپە-جەكتىڭ سوڭىندا قارقىنىن تومەندەتىپ الدى. سوعان قاراماستان, ونىڭ باسىمدىلىعى ايقىن كورىندى – 3:0.
قالعان سالماقتاردا دا وسىنداي تارتىستى شايقاستار از بولعان جوق. ايتالىق, كۋبا وكىلى يوسۆاني ۆەيتيانىڭ فيليپپيندىك مارك بارريگامەن تەكەتىرەسىن سوندايلاردىڭ قاتارىنا جاتقىزعان ءلازىم. سولتۇستىك كورەيا تارلانى چۋنگ ري اقش اتلەتى لەروي دەۆيدتى ۇتىپ, مۇحيتتىڭ ارعى جاعىنان كەلگەندەردىڭ ازايىپ قالعان قاتارىن بۇرىنعىدان دا سەلدىرەتە ءتۇستى. پۋەرتوريكالىق ەنتوني چاكون ريۆەرا مەن ۆەنەسۋەلالىق رونالد لەون اشىق ايقاستىڭ ۇلگىسىن كورسەتتى. تورەشىلەر 2:1 دەگەن ەسەپپەن بۇلاردىڭ الدىڭعىسىن ۇتتى دەپ ەسەپتەدى. 75 كيلوعا دەيىنگىلەر اراسىندا رەسەيلىك ارتەم چەبوتارەۆ پەن اۆستراليالىق روسس ۆەۆەردىڭ جەكپە-جەگى دە ەرەكشە توقتالۋعا تۇرادى. مۇندا ورىس بوكسشىسىنىڭ ارتىقشىلىعى ءسات سايىن بايقالا بەردى. شاماسى, قۇرلىق-مەملەكەتتىڭ باپكەرلەرى ءوز شاكىرتتەرىنىڭ جايىن ويلاسا كەرەك, ەكىنشى راۋندتا ورتاعا ورامال تاستادى. 91 كيلوعا دەيىنگى سالماقتا قازاقستاندىقتارعا جاقسى تانىس فيليپپ حرگوۆيچتىڭ شايقاسىنا جۇرتتىڭ ءبارىنىڭ نازارى اۋدى. حورۆات جىگىتى مۇنى انىق بايقادى. بايقادى دا بارىن سالدى. ول قىتاي اتلەتى گۋانمينگ گۋدى ەركىن جەڭدى.
20 قازان, جەكسەنبى
بۇل كۇنگى ەڭ جارقىن شايقاستاردىڭ ءبىرىن دانيار ەلەۋسىنوۆ كورسەتتى. ول باگام ارالدارىنان كەلگەن كارل حيەلد ەسىمدى قارسىلاسىن ەركىن جەڭدى. سونىمەن بىرگە, قازاقستاندىق اتلەتتىڭ كۇشىن كوپ سارپ ەتپەي, كەيىنگە ساقتاپ جۇرگەنى دە انىق بايقالدى. بۇدان كەيىن وسى 69 كيلوعا دەيىنگى سالماقتا رەسەيلىك الەكساندر بەسپۋتين مەن موڭعول تۋۆشينبات بيامبا اراسىنداعى ايقاس ىمىراسىز كۇرەسكە تولىلىعىمەن ەرەكشە ەستە قالدى. ەكى بوكسشى دا ايانعان جوق. ولار ۇرىس بىتكەنگە دەيىن قايتپاي شايقاستى. ناتيجەسىندە تورەشىلەر پىكىرلەرى ەكىگە جارىلدى. وسى باعا بويىنشا 2:1 دەگەن ەسەپپەن جەڭىسكە جەتكەن رەسەيلىك كەلەسى اينالىمعا ءوتتى. وسىنداي اۋىر ايقاس ۆەنەسۋەلالىق گابريەل ماەسترە مەن ۆەنگر يمرە باشكايدىڭ اراسىندا دا ورىن الدى. جەڭىس جالاۋى بۇلاردىڭ العاشقىسىنا بۇيىردى. ال كۋبالىق اريسنويديس ديسپاين ءوزىنىڭ تۋرنيردەگى ەكىنشى كەزدەسۋىن دە ايتارلىقتاي جارقىلمەن وتكىزە المادى. سوعان قاراماستان, قازىلار قاۋىمى ونى الجيرلىك يلياس ابباديمەن تەكەتىرەستە باسىم بولدى دەپ ەسەپتەدى.
81 كيلوعا دەيىنگى سالماقتا حورۆات حرۆوجە سەپ پەن سيريالىق الي گوسساۋن اراسىنداعى تالاستا دا وسىنداي كەلىسپەۋشىلىك تۋىندادى. تورەشىلەر ۇرىس تاعدىرىن سيريالىقتىڭ پايداسىنا شەشىپ بەرگەنىمەن, قارسىلاسى بۇعان كەلىسپەيتىن سىڭاي تانىتتى. رەسەيلىك بەسپۋتيننىڭ جەڭىستى جولىن ونىڭ كوماندالاسى نيكيتا يۆانوۆ تا جالعاستىردى. ول تۇرىك اۆني يىلدىرىمدى تالاسسىز ۇتتى. ونىڭ ەسەسىنە, بۇل كۇنى ءبىرىنشى ورىس بوكسشىسى جارىس جولىنان شىعىپ قالدى. ول – دميتري پوليانسكي ۋكراينالىق اتتاسى دميترو چەرنياكقا جول بەرىپ قويدى.
بۇل كۇنى ءبىزدىڭ جىگىتتەردەن رينگكە شىققان ءۇش جىگىت تە جەڭىس تويىن تويلادى. وسى قاتاردان جوعارىداعى دانياردان باسقا, 60 كيلوداعى بەرىك ءابدىراحمانوۆ پەن 81 كيلوداعى ادىلبەك نيازىمبەتوۆ تە تابىلدى. راس, بەرىكتىڭ دانيەليتو دە لا روسامەن ايقاسى وتە كۇردەلى جاعدايدا ءوربىدى. سول سەبەپتى تورەشىلەر بىرجاقتى بولا المادى. ال ادىلبەكتىڭ فين ۆيللە حۋككەنەندى ۇتقانىنا ەشبىر كۇمان بولعان جوق. ءبىزدىڭ باعلان بۇل جولى كۇشىن جارتىلاي عانا پايدالانعانداي اسەر قالدىردى.
21 قازان, دۇيسەنبى
كەشە ءۇشىنشى اينالىمعا 58 ەلدىڭ وكىلى جەتكەنى بەلگىلى بولدى. وسى 1/8 فينالدىق ايقاستاردىڭ شىمىلدىعىن اشقان ءبىرجان جاقىپوۆ وزبەك حاسانبوي دۋسماتوۆپەن ۇستاستى. شايقاس باسىنان اياعىنا دەيىن ەكى جاقتىڭ تولاسسىز شابۋىلىمەن ورنەكتەلدى. بۇعان بيىلعى اقپان ايىندا استانادا وتكەن «تورتتىك تۋرنيرىندە» اندىجاندىق بوكسشىنىڭ شىمكەنتتىك شاربولاتتى سوڭعى راۋندتا ايقىن باسىمدىقپەن جەڭىپ كەتكەنى دە سەبەپ بولعان سياقتى. بۇعان قوسا, حاسانبويدىڭ ۇستىمىزدەگى جىلعى جازدا قازاندا وتكەن ۋنيۆەرسيادادا چەمپيون اتانىپ قايتقانى تاعى بار. سودان بولار, ەكى بوكسشى دا ءبىر-بىرلەرىنە ەسە جىبەرگىلەرى كەلمەدى. دەگەنمەن, تەكەتىرەس بارىسىندا ءبىرجاننىڭ بىرەر ادىم بولسا دا ىلگەرى تۇرعانى بايقالىپ قالدى. ءسويتىپ, ول قازاقستاندىقتار ءۇشىن جەڭىستى جولدىڭ باسىن باستاپ بەردى. ەندى ءبىزدىڭ بوكسشى 1/4 فينالدا پۋەرتو-ريكو اتلەتى ەنتوني چاكون ريۆەرامەن بەتتەسەدى.
بىزگە كەلەسى جەڭىستى 56 كيلوعا دەيىنگى سالماقتاعى قايرات ەراليەۆ اپەردى. ول مۇنىڭ الدىندا وزبەكتىڭ تالانتتى بوكسشىسى شاحريەر يساقوۆتى ۇلكەن تارتىس ۇستىندە جولدان تايدىرعان قىرعىز ومۋربەك مالابەكوۆپەن قولعاپ ءتۇيىستىردى. ۇرىستىڭ باسىندا قارسىلاستار ءبىر-ءبىرىن اڭدىپ باقتى. ولار ورتا جانە الىس قاشىقتىقتى ۇستاندى. مۇنداي تاكتيكا قىرعىز بوكسشىسىنا كوبىرەك قولايلى ءتيدى. مۇنىڭ ۇستىنە, قايرات كۇتپەگەن جەردەن قاباعىن جارىپ الىپ, جانكۇيەرلەرىنە ءبىراز ۋايىم جەگىزدى. الايدا, ەكىنشى راۋندتان باستاپ ءبىزدىڭ وعلاننىڭ قيمىلى دۇرىستالدى. ەندى ول وسىنىڭ الدىنداعى ايقاسىنداعى تاكتيكاسىنا كوشىپ, باسەكەلەسىن الىستان ۇرعان سوققىلارىمەن توپەلەۋگە كوشتى. ناتيجەسىندە اۋىپ بارا جاتقان تەڭىن جوندەمگە كەلتىرىپ, جەڭىستى تارتىپ اكەتتى. الايدا, قايراتتىڭ كەلەسى قارسىلاسى وتە قاۋىپتى. ول ەندى كۋبالىق 2012 جىلعى لوندون وليمپياداسىنىڭ چەمپيونى روبەيسي راميرەسپەن شايقاسادى.
الدىڭعى اعالارىنىڭ جەڭىستى جولىن 75 كيلو سالماقتاعى جانىبەك ءالىمحان ۇلى كەرەمەت جالعاستىرا ءبىلدى. مەكسيكالىق حۋان مەركادومەن جۇدىرىق سىلتەسكەن ول ءۇش راۋند بويى قارسىلاسىنان باسىم ءتۇسىپ وتىردى. ۇرىس كەزىندە جانىبەك قورعانىستىڭ دا, شابۋىلدىڭ دا تاماشا تەحنيكاسىن كورسەتتى. ال ءۇشىنشى راۋندتا ونىڭ عالامات سوققىسىنان قارسىلاسى ۇشىپ ءتۇستى. رەفەري سول مەزەتتە مەكسيكالىقتى دارىگەرگە اپاردى. دەنساۋلىق ساقشىسى بولسا, بوكسشىنىڭ بۇدان ءارى شايقاسۋىنا رۇقسات بەرمەدى. بۇل جەڭىس ونىڭ كەلەسى اينالىمدا رۋمىن بوكسشىسى بوگدان جۋراتونيمەن ۇشىراساتىنىن انىقتاپ بەردى.
بۇدان كەيىن 64 جانە 91 كيلوعا دەيىنگى سالماقتارداعى بوكسشىلاردىڭ كەشكى سەسسياداعى ونەرلەرىن تاماشالادىق. بۇلاردىڭ الدىڭعى لەگىندە شارشى الاڭعا شىققان مەرەي اقشالوۆ دومينيكاندىق كارلوس ادامستى 3:0 ەسەبىمەن تىزە بۇكتىردى. ونىڭ كەلەسى كەزەڭدەگى قارسىلاسى قىرعىز ەرمەك ساكەنوۆ بولادى. وقىرماننىڭ ەسىندە بولار, ءبىز وسىدان بۇرىن جازعان ەسەپتەرىمىزدىڭ بىرىندە مەرەيگە تاپ وسى جىگىتتىڭ ىقتيمال قارسىلاس ەكەنىن ايتىپ قالىپ ەدىك, سول ايتقانىمىز ايداي كەلدى.
وكىنىشكە قاراي, 91 كيلو سالماقتاعى انتون پينچۋك وزبەك رۋستام تۋلياگانوۆپەن كەزدەسۋىندە ينيتسياتيۆانى دا, جەڭىستى دە قارسىلاسىنا بەرىپ قويدى.
قازىر ساپىنان شىعىن شىقپاعان بىردە-ءبىر قۇراما جوق. سونىڭ ىشىندە ءبىر-بىردەن بوكسشىسىنان ايىرىلعان قازاقستان مەن كۋبا الدا تۇر. ال رەسەي مەن وزبەكستاننىڭ قاتارىنان ءۇش بىلعارى قولعاپ شەبەرى جارىس جولىنان شىعىپ قالدى. كوماندالار وسىنداي جاعدايدا, ەرتەڭ رينگكە 52, 60, 69, 81 جانە 91-دەن اۋىر سالماقتاردا 1/8 فينالدىق ايقاستاردى اياقتايدى. سوسىن 23 قازان كۇنى شيرەك فينالدىق جەكپە-جەكتەرگە كەزەك كەلىپ, مەدالدار اۋىلىنا اياق باساتىندار انىقتالادى. سودان سوڭعى كۇنى بوكسشىلار تىنىس الىپ, 25 قازاندا جارتىلاي فينالدىق ۇرىستاردى وتكىزەدى. چەمپيونات 26 قازاندا مارەگە جەتەدى.
«ەگەمەن قازاقستاننىڭ» الەم چەمپيوناتىنداعى كوشپەلى رەداكتسياسى.
––––––––––––––––––––
سۋرەتتى تۇسىرگەن
بەرسىنبەك سارسەنوۆ.
