قاراعاندىدا كاسىپكەرلەر 10 جەدەل جاردەم كولىگىن تارتۋ ەتتى

ايماقتار • 03 تامىز، 2020

قاراعاندىدا كاسىپكەرلەر 10 جەدەل جاردەم كولىگىن تارتۋ ەتتى

19 رەت كورسەتىلدى

قاراعاندى وبلىسىنىڭ قايىرىمدى كاسىپكەرلەرى دارىگەرلەردى قولداۋ ماقساتىندا ەمحانالاردىڭ ءموبيلدى توپتارىنىڭ جۇمىسىن جەڭىلدەتۋ ءۇشىن العاشقى مەديتسينالىق كومەك كورسەتۋگە قاجەتتى اسپاپ-قۇرالدارمەن جابدىقتالعان 10 اۆتوكولىكتى سىيعا تارتتى، – دەپ حابارلايدى Egemen.kz. وبلىس اكىمىنىڭ ءباسپاسوز قىزمەتىنە سىلتەمە جاساپ.

قايرات ءابىلدا

بۇل قايىرىمدىلىق كومەكتىڭ باستاۋىندا Qaz Carbon جانە YDD CORPORATION زاۋىتتارىنىڭ ەرلان نىعماتۋلين، ونىڭ گرۋزيادان كەلگەن سەرىكتەسى داۆيد كەمەرتەليدزە جانە جارمۇحامەد اپپاز سىندى اكتسيونەرلەرى تۇرعانىن ايتا كەتكەن ءجون.

ءىرى بيزنەس وكىلى ەرلان نىعماتۋلين اتالعان يگى ءىس-شارانىڭ كوروناۆيرۋسپەن كۇرەستە الدىڭعى شەپتە جۇرگەن مەديتسينالىق قىزمەتكەرلەردىڭ جۇمىسىن جەڭىلدەتۋگە ارنالعانىن اتاپ ءوتتى.

– كەزىندە مەملەكەت بيزنەسمەندەرگە ءوندىرىستى دامىتۋعا جانە اياعىنان تۇرىپ كەتۋگە كومەكتەستى. ەندى، قازىرگى كۇردەلى كەزەڭدە بيزنەس وكىلدەرىنىڭ مەملەكەت پەن قوعامعا كومەكتەسەتىن كەزى كەلدى. بۇل اۆتوموبيلدەر العاشقى مەديتسينالىق كومەك كورسەتۋ ءۇشىن بارلىق قاجەتتى قۇرال-جابدىقتارمەن جاراقتاندىرىلعان. ولار ءموبيلدى بريگادالارعا ۇيدە قابىلداۋ جۇرگىزۋگە جانە قاجەت بولعان جاعدايدا ناۋقاستاردى تاسىمالداۋعا مۇمكىندىك بەرەدى، – دەدى ول.

شەتەلدىك ينۆەستور داۆيد كەمەرتەليدزە بۇل قولداۋدىڭ پاندەميامەن كۇرەستە قوعامنىڭ يگىلىگى ءۇشىن قىزمەت ەتەدى دەگەن ۇمىتتە ەكەنىن ايتتى.

– وسىنداي كۇردەلى كەزەڭدە مەديتسينا سالاسىنىڭ قىزمەتكەرلەرىنە قانشالىقتى قيىن ەكەنىن ءبىز جاقسى تۇسىنەمىز. ءبىز دەنساۋلىق ساقتاۋ مينيسترلىگىنىڭ جەدەل جاردەم قىزمەتىنە ەلەۋلى جۇكتەمە ءتۇسىپ جاتقانى تۋرالى مالىمەتىن زەردەلەي وتىرىپ، ارنايى اۆتوكولىكتەردى ساتىپ الۋعا شەشىم قابىلدادىق، – دەدى داۆيد كەمەرتەليدزە.

ال كاسىپكەر جارمۇحامەد اپپاز بولسا، مۇقتاج جاندارعا كومەك كورسەتۋ، جالپى ادامدارعا، ەلگە قامقورلىق جاساۋ – بۇل كومپانيانىڭ، بۇكىل ۇجىمنىڭ نەگىزگى قاعيداتتارى ەكەنىن اتاپ ايتتى.

– ءبىزدىڭ ەلىمىز وسى قيىن كەزەڭدى تەز ەڭسەرىپ، ادامدار قالىپتى ءومىر ءسۇرۋ ىرعاعىنا تەزىرەك ورالسا ەكەن دەپ تىلەيمىن، – دەدى ول.

ەمحانالىق بريگادالارعا ارنالعان «لادا-لارگۋس» بازاسىنداعى اۆتوكولىكتەر ەمدەۋ ءىس-شارالارىن جۇرگىزۋگە، ناۋقاستاردى تاسىمالداۋعا جانە اۋرۋحاناعا دەيىنگى كەزەڭدە پاتسيەنتتەردىڭ جاعدايىن باقىلاۋعا ارنالعان يسپاندىق Hersill جەدەل مەديتسينالىق كومەك شاباداندارىمەن جابدىقتالعان. ونداعى ءاربىر جيىنتىق وتتەگى باللونى، اۋا وتكىزگىشتەر، ينتۋباتسيالىق تۇتىكتەر سياقتى ومىرلىك ماڭىزدى قۇرىلعىلاردان جانە پاتسيەنتكە العاشقى شۇعىل كومەك كورسەتۋگە ارنالعان باسقا دا قۇرالداردان تۇرادى.

YDD CORPORATION فەرروقورىتپا زاۋىتىنىڭ اكتسيونەرلەرى ەرلان نىعماتۋلين، داۆيد كەمەرتەليدزە جانە جارمۇحامەد اپپازدىڭ وسى جىلدىڭ ناۋرىز ايىنداعى توتەنشە جاعداي كەزىندەگى مەملەكەتتىڭ ءىس-قيمىلىن قولداۋ ءۇشىن قۇرىلعان وبلىستىق قورعا 100 ميلليون تەڭگە اۋدارعانىن ايتا كەتكەن ءلازىم. بۇدان بولەك، بۇل ۇشتىك قاراعاندى وبلىسىنىڭ اۋرۋحانالارىنا كوروناۆيرۋسپەن اۋىراتىنداردى ەمدەۋ ءۇشىن 100 وتتەگى كونتسەنتراتورىن، پۋلسوكسيمەترلەر مەن «ەنوكساپارين» پرەپاراتىن تارتۋ ەتىپ، قايىرىمى زور ىسكە مۇرىندىق بولعان ەدى.