"اق حالاتتى ابزال جاندار اۋىرماسىن!" - بۇل "Jas Otan" جاستار قاناتى باتىس قازاقستان وبلىسى فيليالى مۇشەلەرىنىڭ باستاماسىمەن قولعا الىنعان اكتسياسى.
اكتسيانىڭ نەگىزگى ماقساتى – Covid-19 دەرتىنە شالدىققان ناۋقاستارمەن تىكەلەي قارىم-قاتىناس جاساپ, ءوز دەنساۋلىعىن قاتەرگە تىگىپ جۇرگەن دارىگەرلەر قاۋىمىنا كۇن سايىن قىمىز بەن ساۋمال جەتكىزىپ, ولاردىڭ يممۋنيتەتتەرىن كوتەرۋ, وسىلايشا بۇگىنگى كۇننىڭ باتىرلارىنا قولداۋ كورسەتۋ.
اتالعان اكتسياعا "Nur Otan" پارتياسى باتىس قازاقستان وبلىسى فيليالى توراعاسىنىڭ ءبىرىنشى ورىنباسارى مۇرات مۇقاەۆ قولداۋ كورسەتىپ, جەرگىلىكتى "جايلاۋ" شارۋا قوجالىعىمەن كەلىسسوز جاساپ بەردى. ءسويتىپ, ءبىر اي بويى باتىس قازاقستان وبلىستىق جۇقپالى اۋرۋلار اۋرۋحاناسىنا, وبلىستىق جانە قالالىق كوپبەي̆ىندى اۋرۋحانالارعا ساۋمال مەن قىمىز جەتكىزۋ باستالدى. كەيىن بۇل باستاماعا باتىس قازاقستان وبلىسىنىڭ بارلىق اۋداندارى, ءتىپتى كورشىلەس اقتوبە مەن ماڭعىستاۋ وبلىستارى دا قوسىلدى. وسىلايشا جاسوتاندىق ەرىكتىلەر كۇن سايىن قاۋىپتى ىندەتپەن كۇرەسىپ جاتقان اق جەلەڭدى ابزال جاندارعا بويعا كۇش-قۋات بەرەر ۇلتتىق سۋسىندى تەگىن جەتكىزىپ بەرىپ وتىر. اۋىل كاسىپكەرلەرى قىمىزعا قوسا مارقا مەن قوي ەتىن دە ۇسىنۋدا.
"بۇگىنگە دەيىن وبلىس بويىنشا ارناۋلى ستاتسيوناردا قىزمەت ەتەتىن مەديتسينا قىزمەتكەرلەرىنە 500 ليتر قىمىز, 500 كەلىدەي ەت تاراتىلدى. شىنىن ايتايىق, دارىگەرلەر وتە ريزا, وسى قايىرىمدىلىق شارالارىنا اتسالىسقان بارشا جەرلەستەرىنە العىس ايتۋدا. ولار اسىرەسە وسىناۋ قيىن-قىستاۋ ۋاقىتتا حالىقتىڭ قولداۋ كورسەتكەنىنە, ەلدىڭ اقجۇرەك نيەتىنە ەرەكشە رازى", - دەيدى "Jas Otan" جاستار قاناتى باتىس قازاقستان وبلىستىق فيليالىنىڭ كونسۋلتانتى ەرلىك شامعالي.
جامان ىندەت قانا ەمەس, جاقسىلىق تا جۇعىستى كەلەدى ەكەن. كۇن وتكەن سايىن كوروناۆيرۋسقا قارسى پاتريوتتىق اكتسيالاردىڭ باعىتى كوبەيىپ كەلەدى. جاسوتاندىقتار قىمىز, ساۋمال ۇلەستىرۋمەن شەكتەلمەي, 21 شىلدە كۇنى جەدەل جاردەم قىزمەتكەرلەرىنە ىستىق تاماق تاراتتى. ەرلىكتىڭ ايتۋىنشا, دارىگەرلەر عانا ەمەس, اۋرۋحانادا ەم الىپ جاتقان ناۋقاستارعا دا "دەنساۋلىق پاكەتىن" ۇلەستىرۋ جوسپاردا بار ەكەن.
پارتيا بەلسەندىلەرى دەمەۋشىلىك ەتىپ وتىرعان بۇل اكتسيا تامىزدىڭ 10-ىنا دەيىن جالعاسپاق.
باتىس قازاقستان
