مىنە, وسىنداي تىعىرىققا تىرەلگەن ساتتە قاراعاندىداعى «مەرەي» مەديتسينالىق فيرماسى» جشس بەتپەردە جانە باسقا دا مەديتسينالىق جەكە قورعانىس قۇرالدارىن ءوندىرۋدى جولعا قويا ءبىلدى. اتالعان فيرمانىڭ ديرەكتورى قانات ناۋرىزباەۆ سول كەزدە مەديتسينالىق ماسكالار شىعاراتىن ماشينا ساتىپ العاندارىن مالىمدەگەن ەدى.
– بۇل اپپارات ءبىر مينۋتتا 100-120 دانا بەتپەردە شىعارۋعا قاۋقارلى. ءبىزدىڭ ماسكالار ءۇش قاباتتى. ءبىز وبلىس تۇرعىندارىنىڭ ينفەكتسيادان قورعانىس قاجەتتىلىگىن تولىعىمەن جابا الامىز, – دەگەن بولاتىن ول.
راسىندا دا, كوپ ۇزاماي قاراعاندى مەن وبلىستىڭ باسقا وڭىرلەرىندەگى دارىحانالارعا وتاندىق ماسكالاردىڭ كوپ مولشەردەگى پارتياسى جەتكىزىلىپ, قولجەتىمدى باعامەن ساتىلا باستادى. ءسويتىپ, وبلىس بويىنشا ماسكا جەتىسپەۋشىلىگىن از دا بولسا باقىلاۋعا الۋعا مۇمكىندىك تۋعان.
جالپى, اتالعان فيرما مەديتسينالىق نىسانداعى ءبىر رەتتىك ونىمدەردى شىعارۋدى 2011 جىلدىڭ ماۋسىم ايىنان باستاپ قولعا العان ەكەن. ونىمدەردىڭ قاتارىندا بەتكە ارنالعان ءۇش قاباتتى ماسكالار, پوليەتيلەننەن جاسالعان باحيلا مەن حالاتتار بولدى.
– بۇل جۇمىستاردى باستاعانىمىزدا كوپتەگەن شەشىلمەگەن ماسەلەلەر الدىمىزدا تۇردى. ول كەزدە شيكىزاتتى قىتايدان اكەلەتىنبىز. قازىرگى تاڭدا ءبىز مەديتسينالىق جەكە قورعانىس قۇرالدارىن ءوندىرۋدى قايتا جانداندىرا باستادىق. رەسەيدىڭ قازان جانە ءنوۆوسىبىر قالالارىنان شيكىزات جەتكىزۋ ماسەلەسى شەشىمىن تاپتى. بىزدەگى تسەحتىڭ وندىرىستىك قۋاتى تاۋلىگىنە 20 مىڭ ماسكا شىعارۋعا جەتەدى, – دەيدى قانات ناۋرىزباەۆ.
«مەرەي» فيرماسىنىڭ وندىرىستىك تسەحىندا پوليەتيلەندى باحيلداردى شىعارۋ ءۇشىن تومەنگى قىسىمدى پوليەتيلەن, «سپانبوند» ماتەريالدارى جانە ەلاستيكالىق رەزەڭكە باۋ پايدالانىلادى. ءۇش قاباتتى قورعانىس بەتپەردەلەرىن دايىنداۋ ءۇشىن «سپانبوند», «مەلبلاۋن» «سپانلەيس» ماتەريالدارى, مۇرىن فيكساتورى – پوليپروپيلەندى وتكىزگىش, ەلاستيكالىق, سينتەتيكالىق جىپتەردەن جاسالعان رەزەڭكەلەر ىسكە جاراتىلادى.
بۇدان بولەك, مەديتسينالىق مەكەمەدە نەفرو-ۋرولوگيالىق ورتالىق جۇمىس ىستەيدى. بۇل جەردە گەمودياليزدى ەمدەلۋدى قاجەت ەتەتىن ناۋقاستارعا قىزمەت كورسەتىلەدى, ولاردىڭ ساپالى گەمودياليز الۋلارىنا بارلىق جاعدايلار جاسالعان. گەرمانيالىق «Fresenius Medical Care» زاۋىتىمەن كەلىسىمشارت جاسالىپ, گەمودياليزگە قاجەتتى قازىرگى زامانعى اپپاراتتار الىنعان. بۇدان باسقا, زاۋىت جۇمىسقا جانە سەرۆيستىك قىزمەت كورسەتۋگە قاجەتتى بارلىق شىعىن ماتەريالدارىن جەتكىزىپ بەرەدى. فيرما ءدياليزدى قاجەت ەتەتىن ناۋقاستاردى تاماقتاندىرۋ شىعىندارىن تۇگەلدەي ءوز موينىنا العان. سونىمەن قاتار گەمودياليزدى ەمدەۋدى قاجەت ەتەتىن ناۋقاستاردىڭ تاسىمالىن دا قامتاماسىز ەتەدى.
وبلىس تۇرعىندارىنا مەديتسينالىق, بىلىكتى, كونسۋلتاتيۆتىك-دياگنوستيكالىق كومەك بەرۋدى ماقسات ەتەتىن «مەرەي» فيرماسىنىڭ نەگىزى 2008 جىلى قالانعان. بۇگىندە مەكەمە مەديتسينالىق قىزمەتتەردىڭ ساپاسىن جەتىلدىرۋ بويىنشا ۇنەمى ىزدەنىس ۇستىندە ءجۇرىپ, اۋقىمدى جۇمىس اتقارادى. وسى ماقساتتا ەۋروپالىق جەتەكشى كاسىپورىندارمەن تىكەلەي بايلانىس ورناتقان. قازاقستاندا العاشقىلاردىڭ ءبىرى بولىپ مەديتسينالىق ءبىر رەتتىك جيىنتىقتاردى – مەديتسينالىق ماسكا, باحيل, كيىم شىعارۋدى وندىرىستىك جولعا قويعان. راسىن ايتقاندا, ەلىمىزدىڭ قازىرگى نارىعىندا مۇنداي وتاندىق ونىمدەر اسا كوپ ەمەس.
تۇرعىنداردى بۇگىنگى اسا قاجەتتى تاۋارلارمەن جانە مەديتسينالىق ءمىنسىز قىزمەتپەن قامتاماسىز ەتۋدى قولعا العان كاسىپورىن كەلەشەككە سەنىممەن قارايدى.
قاراعاندى وبلىسى
